కన్నీరు పెట్టుకున్న న‌టి విద్యా బాల‌న్‌!

బాలీవుడ్ నటి విద్యాబాలన్ కన్నీరు పెట్టుకున్నారు. ఇతరుల శరీరాకృతిని, రూపును చూసి వెక్కిరించొద్దని పాట పాడుతూ విద్య కన్నీరు పెట్టుకున్నారు. బాడీ షేమింగ్‌ (శరీరాకృతిని హేళన చేయడం) విషయంలో ఎన్నో అవమానాలు ఎదుర్కొంటున్న వారికోసం విద్య, బిగ్ ఎఫ్ఎంతో కలిసి ఓ వీడియోను రూపొందించారు. ‘ధున్‌ బదల్‌ కే దేఖో’ పేరుతో వచ్చిన ఈ వీడియోలో విద్య చాలా విషయాలు చెప్పారు. తెలిసో తెలియకో ఎందరికో ఎన్నో పేర్లు పెట్టివ వారి మనసు నొప్పించే ఓ సాటి మనుషులారా ఆలోచించండి.. మీ ఆలోచన మార్చుకుని తోటి మనుషులను చూడండి.. నలుపు, తెలుపుల మధ్య మనుషులు ఇరుక్కున్నారు.. కేవలం ఒంటి రంగును, రూపును చూసి మనుషులను ఎలా జడ్జ్ చేస్తారు.. ఇలాంటి ఎగతాళుల వల్ల ఎదుటివాళ్లు ఎంతగా కుమిలిపోతారో ఆలోచించండి.. అంటూ విద్య కన్నీళ్లు పెట్టుకున్నారు వీడియోలో.
ఒకరి రంగును, సైజును, బరువును చూపిస్తూ జోకులు పేల్చకండి అని విద్య చివర్లో హితవు పలికారు. ప్రతీ మనిషి విభిన్నంగా వుంటాడు.. ప్రతీ మనిషి ముఖ్యమైనవాడే అని ముగించారు. ఇప్పుడున్న ట్రెండ్‌లో చాలామంది యువత చేస్తున్న పొరపాట్లలో ముందున్నది బాడీ షేమింగ్ మాత్రమే. ఇది చాలా పెద్ద తప్పు అని వీడియోలో చెప్పే ప్రయత్నం చేశారు. తమ ప్రయత్నం కొంతలో కొంతైనా మార్పు తీసుకువస్తే చాలు అంటున్నారు. లావుగా ఉన్నందుకు తన దేహాన్ని తానే అసహ్యించుకునేదాన్నని ఎన్నోసార్లు విద్య వెల్లడించారు. ఇలాంటి అవమానాలు ఎదుర్కొనేవారికి సాయం చేసేందుకు, ఇతరుల్లో స్ఫూర్తి నింపేందుకే ఆమె ఈ వీడియో చేశానని పేర్కొన్నారు. ప్రస్తుతం ఈ వీడియో సోషల్ మీడియాలో వైరల్‌ అవుతోంది. జీవితంలో బాడీ షేమింగ్‌ సంఘటనలు ఎదుర్కొన్న యువతీయువకులు ఈ కార్యక్రమం ద్వారా తమ సమస్యలు చెప్పుకునే అవకాశం ఉందని అంటున్నారు విద్య.