మగధీర సినిమాకు నేటితో 10 ఏళ్ళు

గీతా ఆర్ట్స్ సంస్థ ప్రతిష్టను మరింత పెంచి తెలుగు సినిమా మేకింగ్ పరంగా కొత్త ఒరవడిని సృష్టించింది మగధీర.. దర్శక ధీరుడు ఎస్.ఎస్.రాజమౌళి సిల్వర్ స్క్రీన్‌పై సృష్టించిన మాయాజాలం.. మగధీర.. పునర్జన్మ నేపథ్యాన్ని తీసుకుని దానికి తనదైన శైలి కమర్షియల్ ఎలిమెంట్స్‌ని జతచేసి, తన దర్శకత్వ ప్రతిభతో ప్రేక్షకులను మంత్ర ముగ్దులను చేశాడు. మెగా పవర్ స్టార్ రామ్ చరణ్‌ను స్టార్‌ని చేసింది మగధీర.. రామ్ చరణ్, కాజల్ అగర్వాల్ జంటగా.. గీతా ఆర్ట్స్ పతాకంపై అల్లు అరవింద్ భారీ బడ్జెట్‌తో నిర్మించిన ఫాంటసీ మూవీ.. మగధీర.. 2009 జూలై 30న విడుదలైంది. 2019 జూలై 30 నాటికి ఈ సినిమా విడుదలై 10 సంవత్సరాలు పూర్తవుతున్నాయి. హర్ష, కాల భైరవగా రెండు డిఫరెంట్ షేడ్స్ కలిగిన క్యారెక్టర్స్ చేసి, శభాష్ అనిపించుకున్నాడు చరణ్. మిత్రవిందా దేవి, ఇందుగా కాజల్ తన నటనతో పాటు అందంతోనూ ఆకట్టుకుంది. ఇక సాల్మన్‌గా, షేర్ ఖాన్‌గా రియల్ స్టార్ శ్రీహరి జీవించేశాడు. రాజమౌళి మార్క్ టేకింగ్, అబ్బురపరిచే వార్ సీన్స్.. ముఖ్యంగా భైరవ వంద మందితో యుద్ధం చేసే సీన్ అయితే ఆడియన్స్‌కి కొత్త అనుభూతినిచ్చాయి.
మెగాస్టార్ చిరంజీవి కొంతకాలం గ్యాప్ తర్వాత ఈ సినిమాలో గెస్ట్ అప్పీరియన్స్ ఇచ్చారు. తనయుడితో కలిసి బంగారు కోడి పెట్ట సాంగ్‌లో అభిమానులను అలరించారాయన. ముమైత్ ఖాన్ ఈ పాటలో రెచ్చిపోయింది. సాల్మన్ గర్ల్ ఫ్రెండ్‌గా కిమ్ శర్మ కనిపించగా.. ఘోరగా రావు రమేష్ నటించారు. రికార్డ్ స్థాయి కలెక్షన్లతో 365 రోజులు ఆడడమే కాకుండా ఇండస్ట్రీ హిట్‌గా నిలిచింది మగధీర. కీరవాణి కంపోజ్ చేసిన పాటలన్నీ సూపర్ హిట్ అయ్యాయి.. ఆర్ఆర్ సినిమాకి ఆయువు పట్టులా నిలిచింది.. సెంథిల్ ఫోటోగ్రఫీ, కోటగిరి వెంకటేశ్వర రావు ఎడిటింగ్, కమల్ కణ్ణన్ వీఎఫ్ఎక్స్, పీటర్ హెయిన్ పోరాటాలు సినిమాకి ప్లస్ అయ్యాయి.