జీన్స్, టీషర్టులతో ఆఫీసుకు రావొద్దు.. సిబ్బందికి టీఎస్ ఆర్టీసీ కండీషన్

చాలా సంస్థల్లో సిబ్బందికి డ్రెస్ కోడ్ మెయిన్‌టేన్ చేస్తుంటాయి యాజమాన్యాలు. కాగా.. టీఎస్ ఆర్టీసీ కూడా తమ సిబ్బందికి కూడా ప్రత్యేక యూనిఫామ్ ఉంటుంది. డ్రైవర్లు, కండక్టర్లకు ఖాకీ యూనిఫామ్ ఉండగా.. కొన్ని చోట్ల నీలిరంగు డ్రెస్ కూడా ధరించటం కనిపిస్తుంటుంది. కాగా.. బస్ స్టేషన్లలో పనిచేసే సూపర్ వైజర్లు తెల్లటి యూనిఫామ్ ధరిస్తారు. కాగా.. పబ్లిక్ ట్రాన్స్ పోర్టు కార్యాలయాల్లో విధులు నిర్వహించే సిబ్బందికి మాత్రం ఎలాంటి డ్రెస్ కోడ్ లేదు. దీంతో.. తాజాగా వారికి కూడా టీఎస్ ఆర్టీసీ డ్రెస్ కోడ్ పెట్టింది. టీఎస్ ఆర్టీసీ ఉద్యోగులు ఇకపై జీన్స్, టీషర్టులు ధరించి ఆఫీసులకు రావొద్దని యాజమాన్యం కోరింది.

ఈ మేరకు.. టీఎస్ ఆర్టీసీ ఎండీ వీసీ సజ్జనార్.. కార్యాలయ ఉద్యోగులందరూ అధికారిక డ్రెస్ కోడ్‌కు కట్టుబడి ఉండాలని ఆదేశాలు జారీ చేశారు. అయితే.. తెలంగాణ అసెంబ్లీ ఎన్నికలకు ముందు బీఆర్ఎస్ ప్రభుత్వం హయాంలో టీఎస్ ఆర్టీసీని మాజీ సీఎం కేసీఆర్.. రాష్ట్ర ప్రభుత్వంలో విలీనం చేసిన విషయం తెలిసిందే. 2023 ఆగష్టు 6న తెలంగాణ రాష్ట్ర శాసన సభ విలీన బిల్లును ఆమోదించింది. దీంతో.. ప్రజా రవాణా సంస్థలోని 46 వేల మందికి పైగా ఉద్యోగులను ప్రభుత్వ సిబ్బందిగా పరిగణిస్తున్నారు.

అయితే.. ఇప్పటికే డ్రైవర్లు, కండక్టర్లు ఖాకీ యూనిఫామ్ ధరిస్తుండాగా.. టీఎస్ ఆర్టీసీ కార్యాలయాల్లో పని చేస్తున్న సిబ్బందికి ఇప్పటివరకు డ్రెస్ కోడ్ లేదు. అయితే.. సిబ్బంది తమకు ఇష్టమున్న దుస్తులు వేసుకురావటం సంస్థ గౌరవానికి భంగం కలిగిస్తోందని భావించిన టీఎస్ ఆర్టీసీ.. ఈ నిర్ణయం తీసుకున్నట్లు సమాచారం.