అతి సామాన్యుడిలా రైల్వే స్టేషన్‌ బెంచ్‌పై పడుకున్న మాజీ ఎమ్మెల్యే

అసలే తెలుగు రాష్ట్రాల్లో ఎన్నికల హడావుడి నడుస్తోంది. కోట్లల్లో డబ్బు చేతులు మారుతోంది. ఇలాంటి సమయంలో ఓ ఆసక్తికర దృశ్యం కనిపించింది. మాజీ ఎమ్మెల్యే, ఆర్టీసీకి ఛైర్మన్‌గా వ్యవహరించిన నేత.. అతి సామాన్యుడిలో రైల్వేస్టేషన్‌లో ఓ బెంచ్‌ మీద పడుకుని కనిపించాడు. అందుకు సంబంధించిన ఫొటోలు నెట్టింట వైరల్ అవుతున్నాయి. అటుగా వెళ్తున్న ఓ వ్యక్తి.. అటుగా చూడగా.. బెంచ్‌ మీద పడుకున్న వ్యక్తిని ఎక్కడో చూసినట్టు ఉందని దగ్గరి వెళ్లి గమనించగా.. ఆయన ఎవరో కాదు.. పెద్దపల్లి మాజీ ఎమ్మెల్యే, రాజకీయ విశ్లేషకుడు గోనే ప్రకాశ్ రావు అని గుర్తుపట్టాడు.

అయితే.. గోనే ప్రకాశ్ రావు కనిపించింది తెలంగాణలో కాదు.. ఏపీలోని భీమవరం రైల్వే స్టేషన్‌లో. సామన్యుడిగా బెంచ్ పడుకుని కనిపించటం ఇప్పుడు సర్వత్రా చర్చనీయాంశంగా మారింది. అసలు విషయం ఏంటా అని కనుక్కోగా.. హైదరాబాద్ వెళ్లేందుకు భీమవరం రైల్వే స్టేషన్‌కు వచ్చిన ప్రకాశ్ రావు.. కాకినాడ నుంచి హైదరాబాద్ వెళ్లే రైలు 12 గంటలు ఆలస్యం అని చెప్పటంతో.. అదే రైల్వేస్టేషన్‌లో ఓ బెంచీ చూసుకొని తన లగేజీని పక్కనే పెట్టుకొని అలా నడుము వాల్చారు. దీంతో.. మెల్లిగా నిద్రలోకి జారుకున్నాడు.

ఆయనను చూసి గుర్తుపట్టిన ఓ వ్యక్తి ఫోటోలు తీసి సోషల్ మీడియా ఖాతాలో పోస్ట్ చేశాడు. దీంతో అవి కాస్త వైరల్ అవుతున్నాయి. లోక్ సభ ఎన్నికల వేళ రాజకీయ విశ్లేషకుడైన గోనే ప్రకాశ్ రావు సామాన్యుడిలా బెంచ్ మీద పడుకుని కనిపించటం ఒక ఎత్తయితే.. ఏపీలో కనిపించడం మరింత ఆసక్తిని రేకెత్తిస్తోంది. తాను చివరగా వీడిన వైఎస్ఆర్ కాంగ్రెస్ పార్టీలో ఉండగా.. ఇప్పుడు ఆ పార్టీ తరపున ప్రచారం చేసేందుకు వెళ్లారా..? లేక ఎన్నికల సర్వే కోసం వెళ్లారా..? అనేది చర్చ నడుస్తోంది.

 పెద్దపల్లి ఎమ్మెల్యేగా స్వతంత్ర అభ్యర్థిగా గెలిచిన గోనే ప్రకాశ్ రావు.. అనంతరం తన పదవికి రాజీనామా చేసి కాంగ్రెస్ పార్టీలో చేరారు. దివంగత నేత వైఎస్ రాజశేఖర్ రెడ్డి హయాంలో ఆర్టీసీ ఛైర్మన్‌గా కూడా బాధ్యతలు నిర్వర్తించారు. వైఎస్ఆర్ మరణం తర్వాత వైఎస్ఆర్ కాంగ్రెస్ పార్టీలో చేరి కొన్నాళ్లు జగన్ వెంట కూడా నడిచారు. ఇక.. తెలంగాణ రాష్ట్రం ఏర్పాడ్డాక రాజకీయాలకు పూర్తిగా దూరంగా ఉంటున్న గోనే ప్రకాశ్ రావు.. కేవలం రాజకీయ విశ్లేషకుడిగా ఉంటున్నారు.