ఖమ్మంలో బోల్తా పడ్డ కారు.. డిక్కీలో కనిపించిన 2 బ్యాగులు.. ఏంటని తెరిచి చూస్తే మైండ్ బ్లాక్..!

ఖమ్మం జిల్లాలోని కూసుమంచి మండలం దేవుని తండాలో ఓ కారు అదుపుతప్పి బోల్తా పడింది. సమాచారం అందుకున్న పోలీసులు ఘటనా స్థలికి చేరుకుని పరిశీలించారు. ఈ క్రమంలోనే కారు డిక్కీ తెరిచి చూశారు. కాగా.. డిక్కీలో రెండు బ్యాగులు కనిపించాయి. ఇంతకీ ఏంటా బ్యాగులు అని పోలీసులు వాటిని తెరిచి చూస్తే.. ఒక్కసారిగా అవాక్కయ్యారు. రెండు బ్యాగుల నిండా నోట్ల కట్టలు దర్శనమిచ్చాయి. వాటిని లెక్కించగా.. మొత్తం కోటీ 50 లక్షల రూపాయలు ఉన్నట్టు పోలీసులు తెలిపారు. అయితే.. ఆ కారు ఎవరిది.. ఎక్కడికి వెళ్తోంది.. అన్న వివరాలు మాత్రం తెలియరాలేదు.

అయితే.. కారులో నగదు తీసుకుని అతివేగంతో వెళ్తున్న సమయంలోనే కారు ప్రమాదానికి గురైనట్టు పోలీసులు గుర్తించారు. కాగా.. ఆ నగదుకు సంబంధించిన ఎలాంటి రసీదులు లేకపోవడంతో అంత డబ్బును అక్రమంగా తరలిస్తున్నట్టు ప్రాథమిక అంచనాకు వచ్చారు. కాగా.. ఈ ప్రమాదంలో వాహన డ్రైవర్‌కు తీవ్రంగా గాయాలు కావడంతో వెంటనే ఖమ్మం ప్రైవేట్ ఆస్పత్రికి తరలించారు.

డ్రైవర్‌ను విచారిస్తే.. ఈ నగదుకు సంబంధించిన వివరాలు.. దాని వెనుక ఉన్న వారి వివరాలు బయటికి వచ్చే అవకాశముందని పోలీసులు భావిస్తున్నారు. అయితే.. డబ్బుకు సంబంధించి ఎలాంటి రసీదులు లేకపోవడంతో పోలీసులు క్యాష్‌ని సీజ్ చేశారు. ఈ డబ్బును ఓటర్లకు పంచేందుకే తీసుకెళ్తున్నారని పోలీసులు అనుమానిస్తున్నారు. అయితే.. ఏ పార్టీ నాయకుడికి సంబంధించిన డబ్బు.. ఎవరికి వెళ్తుందన్నది విచారణ చేస్తున్నారు.

మరికొన్ని గంటల్లో పోలింగ్ జరగనుండగా.. రాజకీయ నేతలు ప్రలోభాల పర్వానికి తెర తీశారు. ఇప్పటికి సరంజామా మొత్తం సిద్ధం చేసుకున్న నేతలు గుట్టుగా మద్యం, డబ్బు పంచుతున్నారు. కాగా కొందరు మాత్రం ఇలా డబ్బును తరలిస్తున్నారు. ఈ నేపథ్యంలోనే పోలీసులు ఎక్కడికక్కడ గట్టి బందోబస్తు నిర్వహిస్తున్నారు. అన్ని వాహనాలను క్షుణ్ణంగా తనిఖీ చేస్తూ.. ప్రలోభాలకు తావు లేకుండా నిఘా పెట్టారు.