యాదాద్రి చిన్నారికి రూ. 16 కోట్ల ఇంజెక్షన్‌కు సాయం.. ఇంతలోనే విషాదం

దురదృష్టం వెంటాడి లక్షల్లో ఏ ఒక్కరికో వచ్చే అరుదైన ప్రాణాంతక వ్యాధితో నెలల తమ బిడ్డ బాధపడుతోందని తెలిసిన ఆ తల్లిదండ్రులు తల్లడిల్లిపోయారు. ఆరు నెలల తమ చిన్నారిని బతికించుకునేందుకు ఆ తల్లిదండ్రులు చేసిన ప్రయత్నాలకు విధి సహకరించలేదు. కోట్ల ఖరీదైన ఇంజెక్షన్‌ కోసం దాతల నుంచి సగానికి పైగా సాయం సమకూరింది. మిగిలిన సాయం అందేలోపే పరిస్థితి చేజారిపోయింది. యాదాద్రి చిన్నారి భవిక్‌రెడ్డి ఉదంతం విషాదాంతంగా ముగిసింది. ‘స్పైనల్ మస్కులర్ అట్రోఫీ’ టైప్-1‌తో బాధపడుతున్న బాలుడి చికిత్స కోసం క్రౌడ్‌ ఫండింగ్‌ ద్వారా రూ.10 కోట్లు సమకూరింది. చివరికి ప్రాణాలు దక్కక ఆ తల్లిదండ్రులకు తీరని శోకాన్ని మిగిల్చింది.

యాదాద్రి భువనగిరి జిల్లా వలిగొండ మండలం పులిగిల్ల మదిర గ్రామానికి చెందిన దిలీప్‌రెడ్డి ఎలక్ట్రీషియన్‌గా పనిచేస్తూ కుటుంబంతో కలిసి హైదరాబాద్‌లో ఉంటున్నాడు. ఆరు నెలల కిందట దిలీప్‌కు బాబు పుట్టాడు. అయితే, మూడో నెల నుంచి ఆ చిన్నారి శరీర కదలికలు సరిగా లేకపోవడంతో వైద్యులను సంప్రదించారు. పలు ఆస్పత్రులు చుట్టూ తిరిగి చికిత్స అందించినప్పటికీ ఫలితం లేకపోయింది. చివరకు బంజారాహిల్స్‌లోని రెయిన్‌బో చిల్డ్రన్ హాస్పిటల్‌కు తీసుకెళ్లడంతో. అక్కడ వైద్యులు పరీక్షలు నిర్వహించి భవిక్‌రెడ్డి స్పైనల్‌ మస్కులర్‌ అట్రోఫీ టైప్‌-1 హైరిస్క్‌తో బాధపడుతున్నట్లు గుర్తించారు.

ఆ వ్యాధి నయం కావాలంటే జోల్జెన్స్మా ఇంజెక్షన్‌ ఒక్కటే మార్గమని చెప్పారు. రూ.16 కోట్ల ఖరీదైన ఆ ఇంజెక్షన్ అమెరికాలో లభిస్తుందని చెప్పారు. మధ్యతరగతి కుటుంబం కావడంతో కుమారుడి వైద్యం కోసం దిలీప్‌రెడ్డి దాతల సహకారం కోరారు. క్రౌడ్‌ ఫండింగ్‌ ద్వారా ఓ ఫార్మా కంపెనీ రూ.10 కోట్లు సమకూర్చింది. మిగతా రూ.ఆరు కోట్లు సమకూరకపోవడంతో ఇంజెక్షన్‌ను తెప్పించలేకపోయారు. ఆసుపత్రిలో చికిత్స పొందుతున్న ఆ చిన్నారి పరిస్థితి విషమించి గురువారం ఉదయం మృతి చెందాడు. దీంతో అతని తల్లిదండ్రుల గుండెలవిసేలా విలపిస్తున్నారు. వారి ఓదార్చడం ఎవరితరం కావడం లేదు.