ఈ నెల 20 వరకు వర్షాలు.. ఆ జిల్లాలకు అతి భారీ వర్షసూచన

హైదరాబాద్‌ నగరంతో పాటు రాష్ట్రవ్యాప్తంగా గురువారం సాయంత్రం భారీ వర్షం కురిసింది. భాగ్యనగరంలో ఆకాశానికి చిల్లుపడిందా? అన్నట్టు కురిసిన కుండపోత వర్షానికి రోడ్లన్నీ జలమయమయ్యాయి. ఎక్కడికక్కడ జనజీవనం స్తంభించింది. భారీ వర్షానికి నాలాలు పొంగి ప్రవహించాయి. మేడ్చల్‌, రంగారెడ్డి, సిద్దిపేట జిల్లాల్లో ఈదురుగాలులు, ఉరుములు, మెరుపులతో భారీ వర్షాలు రైతులకు తీరని నష్టాన్ని మిగిల్చాయి. పిడుగుపాటకు రాష్ట్రంలో ముగ్గురు ప్రాణాలు కోల్పోయారు. సిరిసిల్ల జిల్లాలో ఇద్దరు, రంగారెడ్డి జిల్లాలో ఓ యువకుడు మృతిచెందారు. నల్గొండ జిల్లా కనగల్‌లో అత్యధికంగా 10.2 సెంటీమీటర్లు వర్షపాతం నమోదయ్యింది. ఖైరతాబాద్‌లో 9 సెం.మీ, షేక్‌పేటలో 8.7 సెం.మీ. వర్షం కురిసింది.

ఉమ్మడి రంగారెడ్డి, నల్లగొండ, మహబూబ్‌నగర్‌, కరీంనగర్‌, మెదక్‌ జిల్లాల్లో మోస్తరు వర్షాలు, ఉమ్మడి వరంగల్‌ జిల్లాలో పలుచోట్ల భారీ వర్షం కురిసింది. దీంతో పలు ప్రాంతాల్లో కొనుగోలు కేంద్రాల్లోని ధాన్యం తడిసిపోయాయి. కొద్ది రోజులుగా ధాన్యంలో తేమ తగ్గడం లేదని రైతులు వాపోతున్నారు. కళ్లాల్లో ఆరబెడితే వర్షాల ముప్పు, కుప్పగా ఉంచితే తేమ శాతం ఇబ్బంది పెడుతోందని ఆవేదనకు గురవుతున్నారు.

మరోవైపు, రాష్ట్రంలోని పలు ప్రాంతాల్లో ఈ నెల 20 వరకు వర్షాలు కురిసే అవకాశముందని వాతావరణ విభాగం హెచ్చరించింది. ఉరుములు, మెరుపులతో పాటు గంటకు 30-40 కి.మీ. వేగంతో ఈదురుగాలులు వీస్తాయని పేర్కొంది. తూర్పు విదర్భ దాని పరిసర ప్రాంతాల్లో కొనసాగిన ఆవర్తనం.. గురువారం మధ్యప్రదేశ్‌కు నైరుతి ప్రాంతాల్లో సగటు సముద్ర మట్టానికి 0.9 కిలోమీటర్ల ఎత్తులో కేంద్రీకృతమై ఉన్నట్టు తెలిపింది. దీని ప్రభావంతో తెలంగాణలో ఆగ్నేయ దిశ నుంచి గాలులు వీస్తున్నాయని చెప్పింది. ఆదిలాబాద్‌, ఖమ్మం, వరంగల్‌, కరీంనగర్‌, మెదక్‌, మహబూబ్‌నగర్‌, నల్గొండ జిల్లాల్లో కొన్నిచోట్ల ఈదురుగాలులతో కూడిన భారీ వర్షాలకు అవకాశం ఉందని సూచించింది. అటు, హైదరాబాద్‌ నగరంలోనూ పలు ప్రాంతాల్లో శుక్ర, శనివారాలు ఓ మోస్తరు వానలకు అవకాశాలున్నాయని తెలిపింది.