విమానాల్లో ప్రయాణించే ఆ మహిళలే టార్గెట్.. హెల్ప్ చేస్తున్నట్టు నటించి, వాష్ రూంకు వెళ్లినప్పుడు

విమానాల్లో తిరుగుతూ వయసు పైబడిన మహిళలు, ఒంటరి మహిళలనే టార్గెట్‌గా చేసుకుని లగేజీ బ్యాగుల్లో బంగారు ఆభరణాలను దొచుకుంటూ.. దొరక్కుండా సవాల్ విసురుతున్న దొంగను శంషాబాద్ ఎయిర్ పోర్ట్ పోలీసులు అదుపులోకి తీసుకున్నారు. నిందితుడి వద్ద నుంచి ఏకంగా కిలో బంగారు ఆభరణాలను స్వాధీనం చేసుకున్నారు. ఢిల్లీకి చెందిన దినేష్ గుప్తా.. అదే ప్రాంతానికి చెందిన రాజేష్ కపూర్‌కు టికెట్ బుక్ చేయించి వివిధ ప్రాంతాలకు విమానాల్లో పంపిస్తాడు. రాజేష్ కపూర్ విమానాల్లో ప్రయాణిస్తున్న వయసు పైబడిన మహిళలు, ఒంటరి మహిళలను ఎంచుకొని వారికి సహాయం చేస్తున్నట్టు నటిస్తూ వారి లగేజీ బ్యాగులను మోస్తూ అందులో ఉన్న బంగారు ఆభరణాలను తీసి తన బ్యాగులో వేసుకుంటూ.. చోరీలు చేస్తున్నట్టుగా పోలీసులు గుర్తించారు.

ఈ ఘరనా దొంగపై.. శంషాబాద్ ఆర్జీఐఏ పోలీస్ స్టేషన్ పరిధిలో 5 కేసులు నమోదు కాగా.. రాచకొండ కమిషనరేట్ పరిధిలోని వనస్థలిపురంలో ఒక కేసు నమోదైంది. శంషాబాద్ ఎయిర్ పోర్ట్ వద్ద సీసీ కెమెరాల ఆధారంగా నిందితున్ని గుర్తించి అదుపులోకి తీసుకొని విచారించారు. కేసులో ప్రధాన సూత్రధారి ఢిల్లీకి చెందిన వ్యాపారి దినేష్ గుప్తా పరారీలో ఉన్నట్లు పోలీసులు తెలిపారు.

ఎలా దోచుకుంటాడంటే..?

విమానం ఎక్కిన తర్వాత ఒంటరి మహిళ పక్కనే తన వెంబడి తీసుకువెళ్లే బ్యాగును.. మహిళ భద్రపరిచిన బ్యాగుల పక్కనే పెట్టుకుంటాడు. వాళ్లు వాష్ రూంకు వెళ్లిన వెంబడే అక్కడికి వెళ్లి సదరు మహిళల బ్యాగులో నుంచి విలువైన బంగారు ఆభరణాలను అతని బ్యాగులో పెట్టేసుకుంటాడు. తర్వాత విమానం దిగి బంగారు ఆభరణాలను పాన్ బ్రోకర్లకు అమ్ముకుని సొమ్ము చేసుకుంటాడు. ఇలా.. కేవలం 110 రోజుల్లో 200 సార్లు విమానాల్లో తిరుగుతూ దొంగతనాలకు పాల్పడినట్లు పోలీసులు తెలిపారు.

 నిందితుడు జల్సాలకు అలవాటు పడి ఈ దొంగతనాలు చేస్తున్నట్టు పోలీసులు తెలిపారు. అతనికి సహకరిస్తున్న మరో నిందితుడు పరారీలో ఉన్నట్లు తెలిపారు. నిందితుడి నుంచి కిలో బంగారాన్ని స్వాధీనం చేసుకున్నట్లు తెలిపారు. ఇలాంటి దొంగలున్న నేపథ్యంలో.. విమానాల్లో ప్రయాణించే మహిళలు జాగ్రత్తగా ఉండాలని పోలీసులు సూచిస్తున్నారు.