మల్కన్‌గిరి-భద్రాచలం- పాండురంగాపురం మార్గంలో ,,, కొత్త ట్రైన్ మార్గం

తెలంగాణలో మరో కొత్త ట్రైన్ మార్గం అందుబాటులోకి రాబోతుంది. దక్షిణ అయోధ్యగా పేరుగాంచిన భద్రాద్రికి ట్రైన్ మార్గం వేయనున్నారు. ఒడిశాలోని మల్కన్‌గిరి నుంచి భద్రాచలం మీదుగా పాండురంగాపురం వరకు ఈ ట్రైన్ మార్గాన్ని నిర్మించనున్నారు. వచ్చే ఐదేళ్లలో అంటే 2029-30 కల్లా పూర్తిచేయాలని రైల్వేశాఖ టార్గెట్‌గా పెట్టుకుంది. ట్రైన్ మార్గంలో ఒక్క లెవల్‌ క్రాసింగ్‌ కూడా లేకుండా ఈ మార్గాన్ని నిర్మించేలా డిజైన్ రూపొందించారు. ఈ కొత్త ట్రైన్ మార్గం మెుత్తం పొడవు 200.60 కి.మీ. కాగా.. ఈ మార్గంలో ఏకంగా 301 వంతెనలను నిర్మించనున్నారు. అంటే ప్రతి రెండు కిలోమీటర్లకు మూడు బ్రిడ్జిల చొప్పున నిర్మించనున్నారు. మూడు భారీ వంతెనలు, 34 పెద్ద వంతెనలు 264 చిన్న వంతెనలు, 41 ఆర్వోబీలు, 76 ఆర్‌యూబీలు ఈ మార్గంలో నిర్మించనున్నారు.

మల్కన్‌గిరి వయా భద్రాచలం నుంచి పాండురంగాపురం మార్గంలో నిర్మించే ఈ కొత్త రైల్వే మార్గంలో మొత్తం 14 రైల్వే స్టేషన్లను ఏర్పాటు చేయనున్నారు. అయితే అవి ఎక్కడ ఏర్పాటు చేయనున్నారనే విషయాలపై త్వరలోనే స్పష్టత రానుంది. భద్రాచలం వద్ద గోదావరి నదిపై భారీ వంతెన నిర్మించేందుకు డీపీఆర్ సిద్ధం చేశారు. అయితే తొలుత మల్కన్‌గిరి నుంచి భద్రాచలం వరకు మాత్రమే ట్రైన్ మార్గం నిర్మించాలని రైల్వేశాఖ ప్రతిపాదనలు సిద్ధం చేసింది. కానీ పెద్ద ఎత్తున ఉన్న ఖనిజ సంపద దేశవ్యాప్త రవాణాకు వీలుగా భద్రాచలానికి 20 కి.మీ. దూరంలోని పాండురంగాపురం వరకు ఈ ట్రైన్ మార్గాన్ని పొడగించారు.

డోర్నకల్‌-మణుగూరు మధ్యలో పాండరంగాపురం ఉంటుంది. ఈ ట్రైన్ లైన్‌ ఖాజీపేట-విజయవాడ ప్రధాన ట్రైన్ మార్గానికి బ్రాంచి లైన్‌గా ఉంది. దీంతో ఒడిశా, ఛత్తీస్‌గఢ్‌తో పాటు వివిధ ప్రాంతాల్లోని ఖనిజ సంపద, బొగ్గును భద్రాచలం, పాండురంగాపురం నుంచి వరంగల్ జిల్లా ఖాజీపేట మీదుగా ఇతర రాష్ట్రాలకు తరలించనున్నారు. అలాగే విజయవాడ మీదుగా దక్షిణాది రాష్ట్రాలకు కూడా ఖనిజ సంపద రవాణా చేసేందుకు ఈ ట్రైన్ మార్గం ఉపయోగపడనుంది. కొత్త ట్రైన్ మార్గం రాకతో కృష్ణపట్నం, మచిలీపట్నం పోర్టులతో పాటు రెండు తెలుగు రాష్ట్రాలు తమిళనాడుకు రైలు మార్గంలో సరుకు రవాణాకు ఆస్కారం ఉండనుంది.