బంగాళాఖాతంలో తీవ్ర వాయుగుండం.. ఈ జిల్లాల్లో నేడు భారీ వర్షాలు

తెలంగాణకు హైదరాబాద్ వాతావరణశాఖ అధికారులు రెయిన్ అలర్ట్ జారీ చేశారు. రాష్ట్రంలో నేటి నుంచి నాలుగు రోజుల పాటు భారీ వర్షాలు కురుస్తాయని చెప్పారు. బంగాళాఖాతంలో ఏర్పడిన అల్పపీడనం వాయుగుండంగా మారిందని.. రానున్న 48 గంటల్లో దీని ప్రభావం తెలుగు రాష్ట్రాల్లో మరింతగా ఉంటుందని చెప్పారు. ప్రస్తుతం పశ్చిమ మధ్య బంగాళాఖాతంలో కొనసాగుతున్న వాయుగుండం ఏపీలోని కళింగపట్నం, ఒడిశాలోని గోపాల్పూర్ ప్రాంతాల మధ్య కేంద్రీకృతమైందని చెప్పారు. దీని ప్రభావంతో ముఖ్యంగా తెలంగాణలో వచ్చే మూడు, నాలుగు రోజులపాటు భారీ వర్షాలు కురుస్తాయని హెచ్చరించారు.

నేడు కొమురం భీమ్ ఆసిఫాబాద్, మంచిర్యాల జిల్లాల్లో అతి భారీ వర్షాలు కురిసే ఛాన్స్ ఉందని హెచ్చరించారు. ఈ మేరకు ఈ జిల్లాలకు ఆరెంజ్ అలర్ట్ను జారీ చేశారు. జయశంకర్ భూపాలపల్లి, ములుగు, ఆదిలాబాద్, నిర్మల్, పెద్దపల్లి, భద్రాద్రి కొత్తగూడెం, ఖమ్మం జిల్లాల్లో భారీ వర్షాలు కురుస్తాయని చెప్పారు. ఈ జిల్లాలకు అధికారులు ఎల్లో అలర్ట్ జారీ చేశారు. మిగతా జిల్లాల్లో ఓ మోస్తరు వర్షాలకు ఛాన్స్ ఉందని వెల్లడించారు. అయా జిల్లాల ప్రజలు అప్రమత్తంగా ఉండాలని సూచించారు.

భారీ వర్షాలకు తోడుగా.. ఈదురు గాలులు కూడా వీస్తాయన్నారు. గంటకు 40-50 కి.మీ వేగంతో బలమైన ఈదురు గాలులు వీస్తాయని.. కొన్ని చోట్ల పిడుడుగు కూడా పడే ఛాన్స్ ఉందని ప్రజలు అప్రమత్తంగా ఉండాలని సూచించారు. హైదరాబాద్ నగరంలో మరో రెండ్రోజుల పాటు వాతావరణం చల్లగా ఉంటుందన్నారు. ఉదయం ఆకాశం మేఘావృతమై ఉంటుందని.. సాయంత్రం తర్వాత ఓ మోస్తరు వర్షం కురిసే అవకాశం ఉందని పేర్కొన్నారు. దీంతో నగర ప్రజలను జీహెచ్‌ఎంసీ అధికారులు అప్రమత్తం చేశారు.

ఇక రాష్ట్రంలోని పలు జిల్లాల్లో ఆదివారం భారీ నుంచి అతి భారీ వర్షాలు కురిశాయి. మహబూబాబాద్, ఖమ్మం జిల్లాల్లో శనివారం రాత్రి నుంచి ఆదివారం ఉదయం వరకు అతి భారీ వర్షాలు పడ్డాయి. దీంతో మున్నేరుగా భారీగా వరద పెరిగింది. అప్రమత్తమైన అధికారులు ఖమ్మం పట్టణ ప్రజలను పునరావాస కేంద్రాలకు తరలించారు. వికారాబాద్, రంగారెడ్డి, భద్రాద్రి కొత్తగూడెం జిల్లాల్లోనూ అధిక వర్షపాతం నమోదైంది. హైదరాబాద్‌లోని పలు ప్రాంతాల్లోనూ వర్షం దంచికొట్టింది. ఆరగంట పాటు కురిసిన వర్షంతో రహదారులపై భారీగా వరద నీరు వచ్చి చేరింది. దీంతో వాహనదారులు ఇబ్బందులు పడ్డారు.