'హైడ్రా'.. భయంతో ఫామ్‌హౌస్ కూల్చేసుకున్న నేత

గ్రేటర్ హైదరాబాద్ పరిధిలోని అక్రమ కట్టడాలపై హైడ్రా ఉక్కుపాదం మోపుతోంది. చెరువులు, కుంటలు, ప్రభుత్వ స్థలాలు, పార్కులు కబ్జా చేసి నిర్మించిన కట్టడాలను కూల్చేస్తుంది. గత నెల రోజుల నుంచి వందలాది కట్టడాలను నేలమట్టం చేసింది. ఆక్రమణలకు పాల్పడిన వారు ఎంతటివారైనా ఏమాత్రం ఉపేక్షించటం లేదు. సీని హీరో అక్కినేని నాగార్జున ఎన్ కన్వెన్షన్ , కేంద్ర మాజీ మంత్రి సోదురుడు నిర్మాణాలు, పలువురు ఎమ్మెల్యేలు, ఎమ్మెల్సీల కట్టడాలు కూల్చేయటం సంచలనం మారింది.

పలువురు సినీ రాజకీయ ప్రముఖులకు కూడా నోటీసులు జారీ చేశారు. సీఎం రేవంత్ రెడ్డి సోదరుడు తిరుపతి రెడ్డికి, సీనియర్ నటుడు మురళీ మోహన్ రియల్ ఎస్టేట్ సంస్థకు కూడా నోటీసులు జారీ చేశారు. కోట్ల విలువైన విల్లాలపై హైడ్రా అధికారులు బుల్డోజర్లు పంపిస్తున్నారు. దీంతో అక్రమ నిర్మాణాలు చేపట్టిన బడా బాబుల గుండెల్లో బుల్డోజర్లు పరుగులు పెడుతున్నాయి. ఎప్పుడు, ఎట్నుంచి బుల్డోజర్లు దూసుకొస్తాయోనన్న టెన్షన్‌తో వారికి నిద్ర కూడా పట్టడం లేదు. హైడ్రా నోటీసులు, కూల్చివేత భయంతో కంటి మీద కునుకు లేకుండా హడలిపోతున్నారు. కొందరు తమ అక్రమ కట్టడాలను కాపాడుకునేందుకు శతవిధాలుగా ప్రయత్నిస్తుండగా.. మరికొందరు చేసేదేంలేక చేతులెత్తేస్తున్నారు.

ఈ నేపథ్యంలో హైడ్రా అధికారుల కూల్చివేతలకు భయపడి ఓ రాజకీయ నాయకుడు తానంతటే తానే ఫామ్‌ హౌస్‌ షెడ్డు కూల్చేసుకున్నాడు. ఈ ఘటన హైదరాబాద్ శివారు మోయినాబాద్ మండలం అజీజ్ నగర్ గ్రామ రెవెన్యూ పరిధిలో చోటు చేసుకుంది. గ్రామస్థులు తెలిపిన వివరాల ప్రకారం.. హిమాయత్ సాగర్ జలాశయం ఎఫ్‌టీఎల్, బఫర్ జోన్‌లోని అక్రమ నిర్మాణాలపై అధికారులు ఉక్కుపాదం మోపుతున్నారు. కొన్ని రోజులుగా ఆయా కట్టడాలను నేలమట్టం చేస్తున్నారు. దీంతో భయపడిన ఓ నేత బఫర్ ‌జోన్‌లో నిర్మించిన ఫామ్ హౌస్ రేకుల షెడ్డును తానంతట తానే కూల్చుకున్నాడు.

ఈ ఘటన స్థానికంగా చర్చనీయాంశంగా మారింది. హైడ్రా అంటేనే అక్రమమార్కులు వణికిపోతున్నారని.. ఆ మాత్రం భయం ఉండాలని అంటున్నారు. ఇప్పటికైనా అక్రమ నిర్మాణాలు చేపట్టినవారు ఆయా నిర్మాణాలను సొంతంగా కూల్చేసుకుంటే సొసైటీలో గౌరవం అయినా ఉంటుందని చెబుతున్నారు. ఇక ఆదివారం కూడా నగరంలోని పలు చోట్ల హైడ్రా అక్రమ నిర్మాణాలు కూల్చేసింది. మాదాపూర్ సున్నం చెరువులోని నిర్మాణాలతో పాటు దుండిగల్‌ కత్వా చెరువులో నిర్మించిన విల్లాలను నేలమట్టం చేశారు. సంగారెడ్డి జిల్లా అమీన్‌పూర్‌లో ఏపీ మాజీ ఎమ్మెల్యే కాటసాని రాంభూపాల్ రెడ్డికి చెందిన కట్టడాలను కూల్చేశారు. రెవెన్యూ, పోలీసు సిబ్బంది సహకారంతో కట్టడాలను నేలమట్టం చేశారు.