తెలంగాణలో మళ్లీ వర్షాలు.. దంచికొట్టనున్న వానలు, నేటి వెదర్ రిపోర్ట్

గత 15 రోజుల క్రితం రెండు తెలుగు రాష్ట్రాలను భారీ వర్షాలకు అతాలకుతలం చేసిన సంగతి తెలిసిందే. భారీ వర్షాలు, వరదలకు రెండు రాష్ట్రాల్లోని ప్రజలు అల్లాడిపోయారు. బంగాళాఖాతంలో ఏర్పడిన అల్ప పీడన ప్రభావంతో వర్షాలు తెలుగు రాష్ట్రాలను ముంచెత్తాయి. వాగులు, వంకలు పొంగిపొర్లాయి. ఖమ్మం, మహబూబాబాద్ జిల్లాల్లో అయితే అపార నష్టం వాటిల్లింది. 33 మంది ప్రాణాలు కోల్పోవటమే కాదు.. దాదాపుగా 10 వేల కోట్ల నష్టం వాటిల్లినట్లు ప్రభుత్వం అంచనా వేసింది. వరదలు, వర్షాల నుంచి ప్రజలు ఇప్పుడిప్పుడే కోలుకుంటున్నారు. గత వారం రోజులుగా వరుణడు కాస్త బ్రేక్ ఇచ్చాడు. అయితే తాజాగా.. తెలంగాణకు హైదారాబాద్ వాతావరణశాఖ మరోసారి రెయిన్ అలర్ట్ జారీ చేసింది.

నేడు పలు జిల్లాల్లో వర్షాలు కురుసే ఛాన్స్ ఉందని చెప్పింది. బంగాళాఖాతంలో ఏర్పడిన వాయుగుండం ప్రభావం పెద్దగా లేకపోయినా.. ఏపీ, యానాం ప్రాంతంలో దిగువ ట్రోపో ఆవరణంలో మార్పులు, నైఋతి/వాయవ్య దిశగా గాలులు వీస్తున్నాయని చెప్పారు. వీటి కారణంగా తెలుగు రాష్ట్రాల్లోని పలు జిల్లాల్లో వర్షాలు కురిసే అవకాశం ఉందని అన్నారు. నేడు ఆసిఫాబాద్, ఆదిలాబాద్, నిర్మల్, పెద్దపల్లి, కరీంనగర్, ములుగు, భద్రాద్రి కొత్తగూడెం, నిజామాబాద్, జగిత్యాల, మంచిర్యాల, రాజన్న సిరిసిల్ల, జయశంకర్ భూపాలపల్లి, వరంగల్, హనుమకొండ, జనగాం, మేడ్చల్ మల్కాజిగిరి, హైదరాబాద్, రంగారెడ్డి జిల్లాల్లో మోస్తరు నుంచి తేలిక పాటి వర్షాలు కురుస్తాయన్నారు. ఉదయం ఎండకాసినా.. సాయంత్రానికి వాతావరణం చల్లబడి వర్షాలు కురుస్తాయని చెప్పారు.

సెప్టెంబర్ 20, 21 తేదీల్లో తెలంగాణలోని పలు జిల్లాల్లో భారీ వర్షాలు కురిసే అవకాశం ఉందని వాతావరణశాఖ అంచనా వేసింది. ఈ మేరకు పలు జిల్లాలకు ఎల్లో అలెర్ట్ జారీ చేసింది. 21న ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, పెద్దపల్లి, రాజ్నన సిరిసిల్ల, కరీంనగర్, జయశంకర్ భూపాలపల్లి, ములుగు, భద్రాద్రి కొత్తగూడెం జిలాల్లో అక్కడక్కడ భారీ వర్షాలు కురుస్తాయన్నారు. ఈ మేరకు ఆయా జిల్లాలకు ఎల్లో అలర్ట్ జారీ చేశారు. బలమైన ఉపరితల గాలులు గంటకు 30-40 కి.మీ వేగంతో వీచే అవకాశం ఉందన్నారు. ఇదిలా ఉంటే గత రెండు రోజులుగా తెలంగాణలో పలు ప్రాంతాల్లో ఉష్ణోగ్రతలు పెరిగి ఎండలు దంచికొడుతున్నాయి.