ఆ కన్వెన్షన్‌లో వాటాలు.. అందుకే హరీష్ రావు డ్రామాలు.. కాంగ్రెస్ ఎంపీ

హైదరాబాద్‌లో హైడ్రా కూల్చివేతలతో పాటు మూసీ ప్రక్షాళన అంశం ఇప్పుడు రాజకీయాల్లో ప్రకంపనలు సృష్టిస్తోంది. ఓవైపు బుల్డోజర్లు తమ పని తాము చేసుకుంటూ పోతుంటే.. ప్రతిపక్ష పార్టీల నేతలు ప్రభుత్వంపై తీవ్ర స్థాయిలో విమర్శలు చేస్తున్నారు. ఈ క్రమంలోనే.. బీఆర్ఎస్ తరపును హరీష్ రావు సహ పలువురు నాయకులు బాధితులకు అండగా నిలబడుతున్నారు. ఈ నేపథ్యంలో.. కాంగ్రెస్ రాజ్యసభ సభ్యుడు అనిల్ కుమార్ యాదవ్ సంచలన ఆరోపణలు చేశారు. ఈమేరకు ట్విట్టర్ వేదికగా అనిల్ కుమార్ యాదవ్ వర్సెస్ హరీష్ రావు మాటల యుద్ధం నడుస్తోంది.

"మూసీ పర్యటన, హైడ్రా సమావేశాల పేరుతో హరీష్ రావు గారు, సబితా ఇంద్రారెడ్డి, కార్తీక్ రెడ్డి చేస్తున్న రాజకీయ డ్రామాలు ఎందుకో తెలుసా..? హిమాయత్ సాగర్ ఎఫ్టీఎల్ భూముల్లో అక్రమంగా నిర్మించిన ఆనంద కన్వెన్షన్‌లో బీఆర్ఎస్ ఎమ్మెల్యే హరీష్ రావుకు వాటాలు ఉన్నాయి. తను అక్రమంగా నిర్మించిన వందల కోట్ల విలువ గల ఆనంద కన్వెన్షన్ ను కాపాడుకునేందుకు హరీష్ రావు డ్రామాలు చేస్తున్నారు."అంటూ అనిల్ కుమార్ యాదవ్ ట్వీట్ చేశారు.

"నువ్వు అక్రమంగా సంపాదించిన వందల కోట్ల విలువైన ఆస్తులను కాపాడుకునేందుకు సామాన్య ప్రజలను అడ్డుపెట్టుకుంటున్న అగ్గిపెట్టె హరీష్ రావు ఖబర్దార్. ఎవరెన్ని కుట్రలు చేసినా, చెరువులు, నాలా భూముల్లో నిర్మించిన అక్రమ కట్టడాల కూల్చివేత ఆగదు అనే విషయాన్ని గుర్తు పెట్టుకుంటే మంచింది. చెరువులు, నాలాలు, మూసీ నది పరివాహక ప్రాంతాలను కాపాడి భవిష్యత్ తరాలకు భరోసా అందించేందుకు కృషి చేస్తున్న సీఎం రేవంత్ రెడ్డికి యావత్ తెలంగాణ రాష్ట్ర ప్రజానీకం మద్దతుగా నిలుస్తోంది." అంటూ ఘాటు ట్వీట్ చేశారు అనిల్ కుమార్ యాదవ్.

అనిల్ కుమార్ యాదవ్ చేసిన ట్వీట్‌పై స్పందించిన హరీష్ రావు కూడా అదే స్థాయిలో కౌంటర్ ఇచ్చారు. "ప్రజా సమస్యలపై పోరాడుతున్న తనపై బురద జల్లె వికృత రాజకీయాలకి తెరలేపినట్లు ఉంది కాంగ్రెస్ ప్రభుత్వ తీరు. ప్రభుత్వంపై వస్తున్న వ్యతిరేకతను డైవర్ట్ చేయడానికి గోబెల్స్ ప్రచారాల్ని ఆశ్రయిస్తున్నట్లు ఉన్నారు. గోల్కొండ కోట, చార్మినార్‌లో కూడా హరీష్ రావుకు వాటాలు ఉన్నాయి అని అంటారేమో? అబ్బద్దపు ప్రచారాలు చేస్తున్నందుకు గాను లీగల్ నోటీస్ పంపుతున్నా.. బహిరంగ క్షమాపణ చెప్పకుంటే పరువు నష్టం దావా ఎదుర్కోవడానికి సిద్ధంగా ఉండాలని అనిల్ కుమార్ యాదవ్‌ను హెచ్చరిస్తున్నా." అంటూ అనిల్ కుమార్ యాదవ్‌కు హెచ్చరికలు చేశారు.

హరీష్ రావు స్పందనపై కూడా అనిల్ కుమార్ యాదవ్ తనదైన శైలిలో మరో ట్వీట్ చేశారు. "హరీష్ రావు గారు.. మీ ట్వీట్ చూశాను. గోబెల్స్ ప్రచారం అంటున్నారే కానీ. నేను చేసిన ఆరోపణలపై వివరణ మాత్రం ఇవ్వలేదు. ఇంతకీ దాంట్లో మీకు వాటా ఉందా..? లేదో చెప్పలేదు. దాస్తున్నారు అంటే.. నిప్పు లేనిదే పొగ రాదు అనుకోవాలా..?" అంటూ అనిల్ మరో ట్వీట్ వదిలారు. మరి ఈ ట్వీట్ల యుద్ధం ఎంతవరకు వెళ్తుందో చూడాలి.