హైదరాబాద్‌లో విషాదం.. ఇంట్లో పేలిన దీపావళి టపాసులు.. దంపతులు మృతి

హైదరాబాద్ పాత బస్తీలో భారీ అగ్ని ప్రమాదం చోటుచేసుకుంది. దీపావళి టపాసులు పేలటంతో దంపతులు ప్రాణాలు కోల్పోయారు. యాకత్‌పురా రైల్వేస్టేషన్‌ దగ్గరలోనే రెయిన్‌బజార్‌లో ఘటన జరిగింది. ఓ ఇంట్లో టపాసులు అక్రమంగా నిల్వ ఉంచగా..ఒక్కసారిగా మంటలు అంటుకున్నాయి. క్షణాల్లోనే మంటలు వ్యాపించి ఇంట్లో ఉన్న దంపతులు అక్కడికక్కడే మృతి చెందారు. మరొకరు తీవ్రంగా గాయపడ్డారు.

స్థానికులు, పోలీసులు తెలిపిన వివరాల ప్రకారం.. రెయిన్ బజార్ ప్రాంతానికి చెందిన మోహన్ లాల్, ఉష దంపతులు దీపావళికి టపాసులు విక్రయించేందుకు ప్లాన్ చేసుకున్నారు. అందుకు భారీ ఎత్తున టపాసులు ఇంట్లో నిల్వ ఉంచారు. ప్రమాదవశాత్తు వాటికి నిప్పంటుకోవడంతో ఉన్నట్టుండి భారీ ఎత్తున మంటలు వ్యాపించాయి. ప్రమాద సమయంలో ఇంట్లో ఉన్న మోహన్‌లాల్, ఉష అక్కడికక్కడే ప్రాణాలు కోల్పోయారు. మరో బాలిక తీవ్రంగా గాయపడింది. ఘటనాస్థలికి చేరుకున్న పోలీసులు, అగ్నిమాపక సిబ్బంది మంటలను అదుపులోకి తీసుకొచ్చారు. అగ్ని ప్రమాద ఘటనపై పోలీసులు కేసు నమోదు చేసుకొని విచారణ చేపట్టారు.

ఇక హైదరాబాద్ అబిడ్స్‌లోని ఓ బాణాసంచా దుఖాణంలోనూ భారీ అగ్నిప్రమాదం చోటు చేసుకుంది. ఆదివారం రాత్రి ఈ ప్రమాదం జరిగింది. ప్రమాద సమయంలో షాపులో కొందరు కస్టమర్లు టపాసులు కొనుగోలు చేస్తుండగా.. వేగంగా మంటలు వ్యాపించటంతో వారందరూ బయటకు పరుగులు తీశారు. దుకాణం నుంచి టపాసులు ఒకదానికొకటి అంటుకుని భారీ ఎత్తున మంటలు ఎగసిపడ్డాయి. బాణాసంచా దుకాణం నుంచి మంటలు భారీగా చెలరేగటంతో దుకాణం బయట ఉన్న దాదాపు 10కి పైగా బైక్‌లు అగ్నికి ఆహుతయ్యాయి. అగ్ని ప్రమాదం విషయం తెలుసుకున్న పోలీసులు, ఫైర్ సిబ్బంది.. హుటాహుటిన అక్కడికి చేరుకున్నారు. ఐదు ఫైరింజన్ల సాయంతో అతి కష్టంమీద మంటల్ని అదుపులోకి తీసుకొచ్చారు. అందుకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.

కాగా, దీపావళి టపాసులు లైసెన్స్ లేకుండా విక్రయించటం నేరమని పోలీసులు చెబుతున్నారు. లైసెన్సులు తీసుకొని సరైన భద్రతా ప్రమాణాలు పాటించేవారు మాత్రమే టపాసులు విక్రయించాలని సూచిస్తున్నారు. లేదంటే క్రిమినల్ కేసులు బుక్ చేస్తామని హెచ్చరిస్తున్నారు.