డేంజర్ జోన్‌లో హైదరాబాద్ నగరవాసులు,,,,భారీగా పెరుగుతున్న వాయి కాలుష్యం

దేశ రాజధాని ఢిల్లీలో ప్రజలు వాయు కాలుష్యంతో అల్లాడిపోతున్న విషయం తెలిసిందే. అక్కడ గత కొన్ని రోజులుగా 300లకు పైగానే ఎయిర్ క్వాలిటీ ఇండెక్స్ నమోదుకావడం ఆందోళన కలిగిస్తోంది. ఇక దీపావళి తర్వాత అక్కడి పరిస్థితి మరింత దారుణంగా తయారైంది. వాయు కాలుష్యం మరింత ప్రమాదకరస్థాయికి చేరుకుంది. తీవ్ర వాయు కాలుష్యంతో అక్కడి ప్రజలు ఊపిరి పీల్చుకునేందుకు కూడా ఇబ్బందులు పడుతున్నారు. ఇలాంటి పరిస్థితే హైదరాబాద్ నగరానికి పొంచి ఉన్నట్లు అర్థమవుతోంది. గత వారం వరకు హైదరాబాద్ నగరంలో గాలి నాణ్యత అంత ప్రమాదకర స్థాయిలో లేదు. అయితే గత రెండు, మూడు రోజులుగా నగరంలో కాలుష్యం విపరీతంగా పెరిగింది.

 గత మూడు రోజుల్లో నగరంలో గాలి నాణ్యత బాగా క్షీణించిందని తెలంగాణ రాష్ట్ర కాలుష్య నియంత్రణ మండలి అధికారులు తెలిపారు. భారీగా బాణసంచా కాల్చడమే దీనికి కారణంగా వివరిస్తున్నారు. వారు విడుదల చేసిన గణాంకాల ప్రకారం.. గత ఏడాదితో పోలిస్తే ఈ ఏడాది వాయు కాలుష్యం 10 శాతం వరకు పెరిగింది. సాధారణంగా ఎయిర్ క్వాలిటీ ఇండెక్స్ (AQI) సూచిక 0-50 ఉంటే ఉత్తమమని, 51-100 ఉంటే మితమైనదిగా.. 101-150 మధ్య ఉంటే అనారోగ్యకరమైనదిగా పరిగణించబడుతుంది. హైదరాబాద్‌లో ఆదివారం నాటి రియల్ టైమ్ ఇండెక్స్ చూసిట్లయితే యూఎస్ కాన్సులేట్ సమీపంలో AQI 159, సనత్‌నగర్ 134, ఇక్రిసాట్-పటాన్‌చెరు 131గా ఉంది. బొల్లారం ఇండస్ట్రియల్ ఏరియా, ఐడీఏ జీడిమెట్లలోనూ విపరీతమైన గాలి కాలుశ్యం నమోదైంది. దీనికి దీపావళి టపాసులతో పాటుగా.. నగరంలో దుమ్ము రోడ్లు, పరిశ్రమల ఎగ్జాస్ట్ ఫ్యాన్ల ద్వారా వచ్చే పొగ, డీజిల్ వాహనాలు ప్రధాన కారణాలుగు చెబుతున్నారు.

ఢిల్లీలో వాయు కాలుష్యానికి ప్రధాన కారణం.. అక్కడి వాహనాలతో పాటుగా పంజాబ్, హర్యానాలో రైతులు తగులబెట్టే పంట వ్యర్థాలు. హైదరాబాద్ నగరంలోనూ దాదాపు అదే పరిస్థితులు ఉన్నాయి. ఇక్కడ పంట పొలాల వ్యర్థాలు లేకపోయినా... పరిశ్రమల నుంచి వెలువడే విషపూరిత రసాయనాలు, నగర శివారులో తగులబెట్టె చెత్త, వాహనాల పొగ కారణంగా చెబుతున్నారు. గాలి కాలుష్యం ప్రజల ఆరోగ్యంపై తీవ్ర ప్రభావాలను చూపుతుందని డాక్టర్లు హెచ్చరిస్తున్నారు. కాలుష్యం శరీరంలోని దాదాపు ప్రతి అవయవాన్ని ప్రభావితం చేస్తుందని అంటున్నారు. శ్వాసకోశ వ్యవస్థ తీవ్రంగా దెబ్బతింటుందని హెచ్చరిస్తున్నారు.

ఆస్తమా, క్రానిక్ అబ్స్ట్రక్టివ్ పల్మనరీ డిసీజ్, దగ్గు, శ్వాసలోపం, ఛాతీ బిగుతు వంటి తీవ్రమైన అనారోగ్య లక్షణాలు కనిపిస్తాయని అంటున్నారు. ఊపిరితిత్తుల క్యాన్సర్, గుండెపోటుకు సైతం వాయు కాలుష్యం కారణం అవుతుందని చెబుతున్నారు. వాయు కాలుష్యం ప్రధానంగా చిన్న పిల్లలపై తీవ్ర ప్రభావం చూపే అవకాశం ఉందని.. పిల్లల్లో ఊపిరితిత్తుల అభివృద్ధికి ఆటంకం కలిగిస్తుందని డాక్టర్లు హెచ్చరిస్తున్నారు. కాలుష్యం పెరగకుండా ప్రభుత్వం చర్యలు తీసుకోవాలని సూచిస్తున్నారు.