హైదరాబాద్‌లో 'ఫ్యూచర్ ప్యాకింగ్ డేట్‌‌'తో మష్రూమ్స్.. క్లారిటీ ఇచ్చిన జొమాటో సీఈవో

ఇటీవల హైదారాబాద్ జొమాటో వేర్ హౌస్‌లో జరిగిన తనిఖీల్లో ఫ్యూటర్ ప్యాకింగ్ డేట్‌తో మష్రూమ్స్ పట్టుబడటం సర్వత్రా చర్చనీయాంశమైన సంగతి తెలిసిందే. కాగా.. ఈ విషయంపై జొమాటో సంస్థ క్లారిటీ ఇచ్చింది. అక్టోబర్ 29న హైదరాబాద్‌లోని జొమాటో హైపర్‌ప్యూర్ వేర్‌హౌస్‌లో ఫుడ్ సేఫ్టీ అధికారులు తనిఖీలు నిర్వహించగా.. 18 కిలోల బటన్ మష్రూమ్‌లు ఫ్యూచర్ ప్యాకింగ్ తేదీ (అక్టోబర్ 30, 2024)తో లేబుల్ చేసినట్టుగా గుర్తించారు.

ఈ విషయంపై జొమాటో సీఈఓ దీపిందర్ గోయల్ సోమవారం (నవంబర్ 04న) స్పందిస్తూ.. క్లారిటీ ఇచ్చారు. ఒక విక్రేత ద్వారా మాన్యువల్ టైపింగ్ లోపం కారణంగా ఈ తప్పు జరిగినట్టుగా గుర్తించామని.. అది కస్టమర్లకు చేర్చే కంటే ముందే కంపెనీ ఇన్‌వర్డ్ క్వాలిటీ కంట్రోల్  ప్రక్రియలో భాగంగా.. ఆర్డర్ క్యాన్సిల్ చేసినట్టుగా దీపిందర్ స్పష్టం చేశారు. భవిష్యత్తులోనూ ఇలాంటి లోపాలను నివారించేందుకు బాధ్యుడైన విక్రేతను డేటాబేస్ నుంచి తొలగించినట్లు కూడా దీపిందర్ పేర్కొన్నాడు.

టాస్క్ ఫోర్స్ తనిఖీల్లో భాగంగా.. వేర్ హౌస్‌లో కొన్ని పరిశుభ్రత సమస్యలు గుర్తించినట్టుగా అధికారులు తెలిపారు. ఇన్‌సెక్ట్ ప్రూఫ్ స్క్రీన్ లేకుండా ఓపెన్ ఫెసిలిటీ ప్రవేశ ద్వారం ఉందని.. వేర్ హౌస్ లోపల ఈగలు కూడా ఉన్నాయని అధికారులు గుర్తించారు. అంతేకాకుండా.. హెయిర్ క్యాప్స్, అప్రాన్లు లేకుండా కొంతమంది ఫుడ్ హ్యాండ్లర్లు పని చేస్తున్నట్టు నివేదికలో అధికారులు పేర్కొన్నారు. ఈ పరిశీలనలు ఉన్నప్పటికీ.. ఫుడ్ హ్యాండ్లర్‌లకు మెడికల్ ఫిట్‌నెస్ సర్టిఫికేట్లు, పెస్ట్ కంట్రోల్ రికార్డులు అందుబాటులో ఉన్నాయని తెలిపారు.

జొమాటో సీఈవో దీపిందరు గోయల్ మాత్రం.. హైపర్‌ప్యూర్‌ వేర్ హౌస్‌లో కఠినమైన ప్రమాణాలను పాటిస్తున్నట్టుగా తెలిపారు. "మా కఠినమైన అంతర్గత మార్గదర్శకాలు, సాంకేతిక వ్యవస్థలు ఈ లోపాన్ని సమయానికి పట్టుకోవడానికి మా బృందాన్ని అనుమతించాయి. అత్యున్నత పరిశ్రమ ఆహార భద్రతా ప్రమాణాలను నిర్వహించేందుకు మేము కట్టుబడి ఉన్నాం." అని గోయల్ తెలిపారు. జొమాటో హైపర్‌ప్యూర్ వేర్‌హౌస్ A+ రేటింగ్‌ను సంపాదించిందని.. ఇది అత్యధికంగా సాధించగల బెంచ్‌మార్క్ అని గోయల్ చెప్పుకొచ్చారు. అయితే.. పుట్టగొడుగులకు సంబంధించిన సంఘటన మీడియాలో వైరల్ కావటంపై నిరాశ వ్యక్తం చేశారు.