'క' సినిమాలోని 'కృష్ణగిరి' లాంటి ఊరు నిజంగానే ఉంది.. ఏపీలో కాదు, మన తెలంగాణలోనే..

కిరణ్ అబ్బవరం హీరోగా ఇటీవలే విడుదలైన సినిమా 'క'. పిరీయాడికల్, యాక్షన్ థ్రిల్లర్ డ్రామాగా తెరకెక్కిన ఈ చిత్రాన్ని దర్శక ద్వయం సందీప్, సుజీత్ తెరకెక్కించారు. అయితే.. ఇంతకుమునుపు ఎవరూ టచ్ చేయని ఓ కథాంశంతో తెరకెక్కించిన ఈ సినిమా కథ మొత్తం 'కృష్ణగిరి' అనే ఓ విచిత్ర గ్రామం బ్యాక్ డ్రాప్‌లో నడుస్తుంటుంది. అయితే.. అన్ని గ్రామాల్లా కాకుండా ఆ ఊరికి కొన్ని ప్రత్యేకతలుంటాయి. ఈ విషయాన్ని ట్రైలర్‌లోనే చెప్పేశారు. "ఈ ఊరేంటి విచిత్రంగా ఉంది.. సాయంత్రం 3 గంటలకే చీకటి పడిపోతుంది.." అంటూ హీరో కిరణ్ అబ్బవారం వాయిస్ ఓవర్‌తో ట్రైలర్‌లోనే ఓ ఇంట్రెస్ట్ క్రియేట్ చేశారు. అయితే.. ఆ చీకట్లోనే చాలా విషయాలు జరుగుతుంటాయి. అదే సినిమా కథాంశం.

  సినిమా కాబట్టి.. డైరెక్టర్ ఆ సినిమాటిక్ లీనియన్స్ తీసుకున్నాడు కాబోలు.. లేకపోతే ఇలా మూడు గంటలకే చీకటయ్యే ఊరు ఎక్కడైనా ఉంటుందా అని చాలా మందే పెదవి విరిచి ఉంటారు. అయితే.. నిజానికి ఇక్కడ డైరెక్టర్ సినిమాటిక్ లీనియన్స్ తీసుకుని.. ఓ విలేజ్ బ్యాక్ డ్రాప్‌లో కథరాసుకుని, అందుకు సంబంధించిన సెట్ వేసుకుని సినిమా తీసిన మాట నిజమే అయినా.. "క" సినిమాలో చూపించిన కృష్ణగిరి లాంటి గ్రామం నిజంగానే ఉంది. నమ్మటానికి కాస్త ఆశ్చర్యంగా ఉన్నా.. ఆ నిజంగానే నిజం. అయితే.. చుట్టూ కొండలూ గుట్టలు అనగానే.. ఏ తిరుపతి కొండల మధ్యనో ఉందనుకునేరు. మన తెలంగాణలోనే అలాంటి గ్రామం ఉంది.

తెలంగాణలోని పెద్దపల్లి జిల్లా సుల్తానాబాద్ మండలంలోని కొదురుపాకనే ఆ గ్రామం. ఈ గ్రామాన్ని అంతా "మూడు జాముల కొదురుపాక" అని పిలుస్తుంటారు. ఎందుకంటే.. సాధారణంగా అన్ని గ్రామాలు నాలుగు జాముల (జాముకు 3 గంటలు) కాలాన్ని అనుభవిస్తే.. కొదురుపాక గ్రామస్థులు మాత్రం మూడు జాముల కాలాన్నే వెల్లదీస్తున్నారు. 10 కిలో మీటర్ల దూరంలో ఉన్న ఆ గ్రామాన్ని "మూడు జాముల కొదురుపాక" అని పిలుస్తారు. ఈ గ్రామంలో ఉదయం, మధ్యాహ్నం, రాత్రి మాత్రమే ఉంటాయి.. సాయంత్రం ఉండకపోవటమే ఈ గ్రామం ప్రత్యేకత.

సినిమాలో చెప్పినట్టుగా మరీ మూడు గంటలకే చీకటి పడకపోయినా.. మూడు జాముల కొదురుపాకలో కూడా సాయంత్రం నాలుగు గంటల ప్రాంతంలో చీకటి అలుముకుంటుంటుంది. అదే చలికాలంలో అయితే ఇంకాస్త ముందుగానే చీకటిపడుతుంటుంది. అయితే.. ఇందుకు కారణం మాత్రం సినిమాలో వివరించినట్టుగానే.. ఇక్కడ కూడా గ్రామం చుట్టూ ఎత్తైన గుట్టలు ఉండటమే కారణం. పాముబండ గుట్ట, గొల్లగుట్ట, రంగనాయకుల గుట్ట, దేవునిపల్లి గుట్ట అనే నాలుగు గుట్టల మధ్యలో ఈ గ్రామం ఉంది. ఈ ఎత్తైన గుట్టల కారణంగా కొదురుపాకలో ఆలస్యంగా సూర్యోదయం, ముందుగానే సూర్యాస్తమయం జరుగుతుంటాయి. గుట్టల నీడతో గ్రామంలో చీకటి అలుముకున్నట్టుగా ఉంటుంది.

అయితే.. మూడు జాముల కొదురుపాకలో ఉదయం 8 గంటల తర్వాతే సూర్యోదయం అవుతుండగా.. సాయంత్రం 4 గంటలకే సూర్యుడు కొండెక్కుతాడు. ఈ కారణంగానే ఈ గ్రామానికి మూడు జాముల కొదరుపాక అని పేరొచ్చిందంట. శతాబ్దాల తరబడి ఇదే పరిస్థితి కొనసాగుతుండడంతో ఇక్కడి ప్రజలు కూడా ఇదే వాతావరణానికి అలవాటు పడిపోయారు. అందులోనూ రంగనాయకుల గుట్టను ఆనుకుని ఉన్న వారికి కాస్త ఇబ్బంది ఎక్కువ ఉండటంతో అక్కడ నివసించే వాళ్లు చాలావరకు వేరే ప్రాంతాలకు వలస వెళ్లిపోయినట్టు తెలుస్తోంది.

అయితే.. ఇప్పుడు చెప్పుకుంటున్నట్టుగా నాలుగు గంటలకే పూర్తిగా చిమ్మ చీకట్లు కమ్ముకునే రోజులు ప్రస్తుతం అంతగా కనిపించకపోయినా ఒకప్పుడు మాత్రం ఇలాగే ఉండేవని అక్కడి స్థానికులు చెప్తుంటారు. గుట్టలు కరిగిపోవటమో.. వాతావరణ పరిస్థితులు మారిపోవటమో కారణాలేవైనా.. గతంతో పోలిస్తే ఇప్పుడు వేరేగా ఉందని స్థానికులు చెప్తున్నారు. ఏదేమైనా.. ఆ గ్రామంపై మాత్రం సూర్యుడి కనికరం కొంచెం తక్కువే. అయితే.. ఈ ఊరు గురించి ఇప్పటికే చాలా మందికి తెలియగా.. ప్రస్తుతం క సినిమా విడుదలైన వేళ.. మూడు జాముల కొదురుపాక మరోసారి చర్చనీయాంశంగా మారింది. ఈ సినిమా ద్వారానైనా.. మూడు జాముల కొదురుపాక గురించి తెలియని ఇప్పటి తరానికి తెలుసుకునే ఛాన్స్ వచ్చినట్టయింది.

అయితే.. ఈ మూడు జాముల కొదురుపాకకు మరో ప్రత్యేకత కూడా ఉందండోయ్. రంగనాయకుల గుట్టకు దిగువన నిర్మించిన ఆలయంలో దేవుడి విగ్రహం ఉండదు. ఏడాదిలో ఒక్కసారి మాత్రమే భక్తులకు దేవుడు దర్శనమిస్తాడు. దసరా పండగ వేల జరిగే వేడుకకు.. దేవునిపల్లి నుంచి నంబులాద్రి నరసింహ స్వామిని దేవాలయానికి తీసుకొచ్చి ప్రత్యేక పూజలు నిర్వహిస్తుంటారు. ఆలయంలో ఒకరోజు వైభవంగా ఉత్సవాలు జరిపిన తర్వాత తిరిగి దేవునిపల్లికి చేరుస్తారు. ఈ సంప్రదాయం తరతరాలుగా వస్తుండటంతో.. ఇప్పటికే ఇదే ఆచారాన్ని పాటిస్తున్నారు మూడు జాముల కొదురుపాక గ్రామస్థులు.