హైదరాబాద్‌వాసుల తాగునీటి కష్టాలకు చెక్.. నగరానికి గోదావరి జలాలు, రూ.5,560 కోట్ల టెండర్

ఎండాకాలం వచ్చిందంటే చాలు హైదరాబాద్ నగరంలో చాలా ప్రాంతాల్లో తాగునీటి ఎద్దడి మెుదలవుతుంది. కొన్ని ఏరియాల్లో కృష్ణా జలాలు సరఫరా చేసినా.. కొన్ని ప్రాంతాల్లో మాత్రం తీవ్రమైన నీటి ఎద్దడి ఉంటుంది. ఈ నేపథ్యంలో నగరవాసుల నీటి కష్టాలు తీర్చటంతో పాటుగా.. మూసీ నది పునరుజ్జీవనానికి అవసరమైన నీటిని మళ్లించేందుకు రాష్ట్ర ప్రభుత్వం సిద్ధమైంది. మల్లన్నసాగర్ నుంచి నగరానికి నీటి మళ్లించే టెండర్‌ ప్రక్రియను రేవంత్ సర్కార్ చేపట్టనుంది. ఇందుకు మున్సిపల్ శాఖ గ్రీన్‌ సిగ్నల్‌ ఇవ్వడంతో ఈ వారంలోనే రూ.5560 కోట్ల పనికి టెండర్‌ నోటీసు విడుదల కానున్నట్లు అధికార వర్గాలు వెల్లడించాయి.

ప్రాణహిత-చేవెళ్ల ఎత్తిపోతల, కాళేశ్వరం ఎత్తిపోతలతో హైదరాబాద్‌ నగర తాగునీటి అవసరాలకు 30 టీఎంసీల నీటి కేటాయింపు ఉంది. ప్రాణహిత-చేవెళ్ల ఎత్తిపోతల ప్రారంభించిన వెంటనే ఎల్లంపల్లి ప్రాజెక్టు నుంచి నగరానికి తాగునీటిని మళ్లించే పనిని అప్పటి సర్కార్ చేపట్టింది. 10 టీఎంసీల గోదావరి నీటిని హైదరాబాద్‌ నగరానికి మళ్లిస్తున్నారు. ఇవే కాకుండా మరో 20 టీఎంసీల వినియోగానికి అవకాశం ఉన్నట్లు అధికారులు చెబుతున్నారు.

ఈ నీటిని కాళేశ్వరం ఎత్తిపోతల పథకంలో భాగంగా నిర్మించిన మల్లన్నసాగర్‌ నుంచి నీటిని నగరానికి మళ్లించాలని నిర్ణయం తీసుకున్నారు. ముందుగా కొండపోచమ్మ రిజర్వాయర్‌ నుంచి అని నీటిని తరలించాలని అనుకున్నా... దీని నిల్వ సామర్థ్యం 15 టీఎంసీలే కావటంతో అధికారులు వెనకడగు వేశారు. 50 టీఎంసీల సామర్థ్యమున్న మల్లన్నసాగర్‌ నుంచి నగరానికి నీటిని మళ్లించాలని నిర్ణయం తీసుకున్నారు. నీటి మళ్లింపులో భాగంగా ముందుగా మల్లన్నసాగర్‌ నుంచి శామీర్‌పేట వద్ద గల ఘనపూర్‌కు నీటిని తరలిస్తారు. ఇక్కడ 10 టీఎంసీల నీటిని శుద్ధి చేసేందుకు ట్రీట్‌మెంట్‌ ప్లాంట్‌ను ఏర్పాటు చేస్తారు. ఈ నీటిని నేరుగా హైదరాబాద్‌ తాగునీటి అవసరాలకు వినియోగించనున్నారు. మిగిలిన 5 టీఎంసీల నీటిని హిమాయత్‌సాగర్, ఉస్మాన్‌సాగర్‌ జలాశయాలకు మళ్లిస్తారు.

మూసీ పునరుజ్జీవంలో భాగంగా అక్కడ 2 నీటి శుద్ధి ప్లాంట్లను నిర్మించనున్నారు. శుద్ధి చేసిన తర్వాత 2.5 టీఎంసీల నీటిని దశల వారీగా మూసీ నదిలోకి వదిలేలా అధికారులు చర్యలు తీసుకోనున్నారు. మూసీ నది పునరుజ్జీవం జరిగిన తర్వాత గోదావరి నీటిని బాపూఘాట్‌ నుంచి ఎగువకు విడుదల చేస్తారు. ఈ పనులన్నీ వచ్చే రెండేళ్లలో పూర్తి చేయాలని ప్రభుత్వం టార్గెట్‌గా పెట్టుకుంది. మల్లన్నసాగర్‌ నుంచి నీటిని నగరానికి మళ్లించే పనులను రెండు ప్యాకేజీలుగా విభజించి ప్రభుత్వం టెండర్లు పిలవనుంది.