మంచువారి ఫ్యామిలీ ఫైట్‌లో మరో ట్విస్ట్.. మోహన్ బాబు మేనేజర్ అరెస్ట్

మంచువారి ఫ్యామిలీ ఫైట్‌ ఎపిసోడ్‌లో పూట పూటకో ట్విస్ట్‌ చోటుచేసుకుంటోంది. ఒకరిపై ఒకరు దాడి చేసుకోవటమే కాదు.. మీడియా ప్రతినిధిపై దాడి చేయటం.. ఆ తర్వాత పోలీసుల నోటీసులు, హైకోర్టులో పిటిషన్, ఆపై న్యాయస్థానం ఆదేశాలు ఇలా రకరకాల మలుపులు తీసుకుంటోంది. ఈ క్రమంలోనే.. మరో ట్విస్ట్ చోటుచేసుకుంది. తనపై కొందరు వ్యక్తులు దాడి చేశారంటూ మూడు రోజుల క్రితం మంచు మనోజ్‌ చేసిన ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టిన విషయం తెలిసిందే. ఈ క్రమంలోనే.. బుధవారం రోజున(డిసెంబర్ 11న) మోహన్ బాబు మేనేజర్, విష్ణు ప్రధాన అనుచరుడు కిరణ్‌ను పోలీసులు అరెస్టు చేశారు. మరో నిందితుడు విజయ్‌ రెడ్డి కోసం గాలిస్తున్నారు.

జల్‌పల్లి నివాసంలో తనపై దాడి చేయడమే కాకుండా.. సీసీటీవీ ఫుటేజ్‌ను మాయం చేశారంటూ కిరణ్‌తో పాటు వినయ్ రెడ్డిపై పహాడీ షరీఫ్ పోలీసులకు మనోజ్‌ ఫిర్యాదు చేసిన విషయం తెలిసిందే. ఈ క్రమంలోనే.. కిరణ్‌ను పోలీసులు అరెస్టు చేసినట్టు సమాచారం. దీంతో.. ఈ మంచువారి ఫ్యామిలీ ఫైట్ వ్యవహారంలో మరో కీలక పరిణామం చోటుచేసుకున్నట్టయింది.

అయితే.. మంచు వారి ఫ్యామిలీలో ఎప్పటి నుంచో వివాదాలు జరుగుతున్నప్పటికీ లోపల లోపలే జరుగుతూ వస్తున్నాయి. కానీ.. గత నాలుగు రోజులుగా వీరి గొడవలు గోడలు దాటుకుని గేట్లు బద్దలు కొట్టుకుని బజారున పడటం గమనార్హం. ముఖ్యంగా.. మంగళవారం (డిసెంబర్ 10న) రాత్రి జరిగిన హైడ్రామాతో మంచు వారి ఫ్యామిలీ ఫైట్.. పూర్తిగా పబ్లిక్ అయిపోయింది. ఇందులో భాగంగా.. మనోజ్‌కు మోహన్ బాబుకు మధ్య ఘర్షణ జరగటం ఒకేత్తయితే.. ఆ తర్వాత మీడియా ప్రతినిధిపై మోహన్ బాబు చేసిన దాడితో ఒక్కసారిగా సీన్ మొత్తం మారిపోయింది.

ఆ ఊహించని పరిణామంతో.. ఈ వ్యవహారాన్ని సీరియస్‌గా తీసుకున్న పోలీసులు మోహన్ బాబుతో పాటు మంచు విష్ణు, మంచు మనోజ్‌కు నోటీసులు ఇచ్చిన విషయం తెలిసిందే. అయితే.. నోటీసులపై స్పందించిన మంచు మనోజ్ సీపీ కార్యాలయంలో విచారణకు హాజరయ్యాడు. కాగా.. మోహన్ బాబు మాత్రం హైకోర్టును ఆశ్రయించగా.. భారీ ఊరట లభించింది. వచ్చే 24వ తేదీ వరకు విచారణకు మినహాయింపుతో పాటు మోహన్ బాబు నివాసంపై నిఘా పెట్టాలని పోలీసులకు ఆదేశాలు జారీ చేసింది.