అక్రమ అరెస్టులను ఖండించండి
Telangana Telugu | Suryaa Desk | Published : Sat, Dec 14, 2024, 04:40 PM
తమ సమస్యలు పరిష్కరించాలని హైదరాబాద్ వెళుతున్న కోదాడ మున్సిపల్ మెప్మా ఆర్పీలను అక్రమంగా అరెస్టు చేసిన పోలీసు చర్యను తీవ్రంగా ఖండిస్తున్నామని సిఐటియు జిల్లా కోశాధికారి కోటగిరి వెంకట్ నారాయణ ప్రభుత్వాన్ని డిమాండ్ చేశారు. శుక్రవారం పట్టణంలో పనిచేస్తున్న ఆర్పీలు వారి సమస్యలు పరిష్కారం కోసం హైదరాబాద్ లో ధర్నా నిర్వహించడానికి వెళ్తుంటే వారిని పోలీసులు ముందస్తుగా అరెస్ట్ చేయడంతో వారికి సంఘీభావం తెలుపుతూ ఆయన మాట్లాడారు.
పది సంవత్సరాలుగా పనిచేస్తున్న ఆర్పీలకు కనీస వేతనం 26 వేల రూపాయలు ఇవ్వాలని, గుర్తింపు కార్డులు, డ్రెస్ కోడ్, పండగ సెలవులు, ప్రమాద బీమా సౌకర్యం, అమలు చేయాలని వారు అన్నారు.
రాష్ట్ర ప్రభుత్వం ఆర్పీలతో వెట్టిచాకిరి చేయించుకుంటూ పనిబారాన్ని పెంచుతుందని మున్సిపాలిటీలో 35 రకాల పనులు చేస్తూ అదనంగా ఇందిరమ్మ ఇళ్ళ సర్వే చేపిస్తున్నారని వారు అన్నారు. మున్సిపాలిటీలో ఏ పని వచ్చినా ప్రభుత్వ ఉద్యోగులు చేయనటువంటి పనిని వీరు చేస్తున్నారని తడి చెత్త పొడి చెత్త, వీధి విక్రయాలు, స్వచ్ఛభారత్, నర్సరీ అనేక రకాల పనులు టైమింగ్స్ లేకుండా పనిచేపిస్తున్నారని వారు ఆవేదన వ్యక్తం చేశారు. తక్షణం ఆర్పిల సమస్యలు పరిష్కరించాలని లేనట్లయితే ప్రభుత్వాన్ని దిగ్బంధం చేస్తామని సిఐటియు వారికి అండగా ఉంటుందని వారన్నారు. ఈ కార్యక్రమంలో సిఐటియు పట్టణ కార్యదర్శి ఎం ముత్యాలు, టౌన్ కమిటీ సభ్యులు దాసరి శ్రీనివాస్, యూనియన్ అధ్యక్షురాలు ప్రమీల, రాజ్యలక్ష్మి, మమత, సత్య కుమారి, దేవి, దుర్గ తదితరులు పాల్గొన్నారు.
|
|