లాంగ్ లీవ్‌తో విధులకు డుమ్మా.. ఆ 16 మంది టీచర్లకు షాకిచ్చిన ప్రభుత్వం

వారంతా ప్రభుత్వ ఉపాధ్యాయులు. భావిభారత పౌరులను తయారుచేయాల్సిన గురుతన బాధ్యత వారిపై ఉంది. ప్రభుత్వ ఉద్యోగులుగా వేతనాలు తీసుకుని తమ బాధ్యతలను విస్మరించారు. ప్రభుత్వ సిబ్బందిగా తమకున్న హక్కులను వినియోగించుకుని.. విధులను మాత్రం నిర్వర్తించలేదు. ఒకటి రెండు కాదు ఏకంగా 17 ఏళ్ల పాటు దీర్ఘకాలిక సెలవులపై స్కూల్‌కు డుమ్మా కొట్టారు. చివరకు దీనిని ప్రభుత్వం తీవ్రంగా పరిగణించి.. ఏకంగా ఊస్టింగ్ ఆర్డర్ ఇచ్చింది. యాదాద్రి జిల్లాలో 16 మంది ఉపాధ్యాయులను సర్వీసు నుంచి తొలగిస్తూ ఉత్తర్వులు జారీచేయడం సంచలనంగా మారింది.

లాంగ్ లీవ్‌తో విధులకు గైర్హాజరవుతున్న 16 మంది ప్రభుత్వ టీచర్లపై యాదాద్రి డీఈవో సత్యనారాయణ కొరడా ఝుళిపించారు. జిల్లా పరిధిలోని పలు పాఠశాలల్లో పని చేస్తున్న ఒక స్కూల్ అసిస్టెంట్, 15 మంది ఎస్జీటీలను సర్వీసుల నుంచి తొలగిస్తూ మంగళవారం ఉత్తర్వులు జారీ చేశారు. స్కూల్‌ అసిస్టెంట్‌ గీతారాణి.. సెకెండరీ గ్రేడ్ టీచర్లు విజయలక్ష్మి, శ్రీనివాస్‌రెడ్డి, ఉమారాణి, ప్రభాకర్‌రెడ్డి, అబ్దుల్‌ హమీద్, స్వప్న, మాధవి, నవీన్‌ కుమార్, ఎం.ఉమాదేవి, క్రాంతి కిరణ్, జె.ఉమాదేవి, నర్సింహారావు, శైలజ, భాగ్యలక్ష్మి, కిరణ్‌ కుమారీలు 2005 నుంచి 2022 వరకు దీర్ఘకాలిక సెలవు పేరుతో అనధికారికంగా విధులకు డుమ్మా కొట్టారు.

వీరికి ఐదు దఫాలుగా నోటీసులు జారీచేసిన విద్యా శాఖ.. వివరణ కోరింది. కానీ, వారి నుంచి ఎలాంటి సమాధానం లేకపోవడంతో చర్యలకు ఉపక్రమించారు. గెజిట్‌ నోటిఫికేషన్‌ ప్రచురించి.. తదుపరి సర్వీసు నుంచి తొలగిస్తూ ఉత్తర్వులు జారీ చేశామని డీఈవో వెల్లడించారు. ఇప్పటికే పాఠశాలల్లో సరిపడా ఉపాధ్యాయులు లేక విద్యార్థులు నాణ్యమైన విద్యను కోల్పోతున్నారు. ఉన్నవారు దీర్ఘకాలిక సెలవుల్లో విధులకు గైర్హాజరు కావడం అరకొర ఉపాధ్యాయులతోనే బోధన సాగించే పరిస్థితి ఎదురవుతోంది. విద్యార్థులకు తగినంత ఉపాధ్యాయులు లేక.. తల్లిదండ్రులు తమ పిల్లలను ప్రయివేట్ పాఠశాలల్లో చేర్పిస్తున్నారు. దీంతో పలుచోట్ల పాఠశాలలు మూతబడుతున్నాయి. ఇప్పటికే ప్రభుత్వ పాఠశాల్లో విద్యార్థుల సంఖ్య గణనీయంగా తగ్గుతోంది. ఇది ఇలాగే కొనసాగితే మరిన్ని స్కూల్స్ మూతపడే పరిస్థితి.