రైతులకు సరిపడా యూరియా నిల్వలు అందుబాటులో ఉన్నాయి.....జిల్లా కలెక్టర్ కోయ శ్రీ హర్ష

రైతుల అవసరాలకు సరిపడా యూరియా నిల్వలు జిల్లాలో అందుబాటులో ఉన్నాయని, ఎటువంటి యూరియా కొరత లేదని  జిల్లా కలెక్టర్ కోయ శ్రీ హర్ష శనివారం ఒక ప్రకటనలో తెలిపారు.యాసంగి సీజన్ లో సాగు విస్తీర్ణం, రైతుల అవసరాలను పరిగణనలోకి తీసుకుని 37000 మెట్రిక్ టన్నుల యూరియా అవసరమవుతుందని ప్రణాళికలు తయారు చేసి సరఫరా కోసం అన్ని మండలాల్లో సమగ్రచర్యలు చేపట్టామని అన్నారు. మార్కెఫెడ్ ద్వారా యూరియా నిల్వలను  ప్రాథమిక వ్యవసాయ సహకార సంఘాలు,వ్యవసాయ రైతు సేవా కేంద్రాలు,  జిల్లా కోపెరేటివ్ మార్కెటింగ్ సోసైటీస్,  రైతు ఉత్పత్తిదారుల సంస్థలుద్వారా రైతులకు అందుబాటులోకి తీసుకురావడానికి అవసరమైన అన్ని ఏర్పాట్లు చేయడం జరిగిందని అన్నారు.
పెద్దపల్లి జిల్లాలో యూరియా కొరత ఉందని వచ్చిన వార్త పూర్తిగా అవాస్తవమని,  రైతులు యూరియా కొరకు బారులు తీయడం అనేది పెద్దపల్లి జిల్లాలో ఎక్కడా జరగడం లేదని , యూరియా అమ్మకాలు జరిగే ప్రక్రియ లో భాగంగా ఈ-పాస్ మెషిన్ లో రైతుల వేలి ముద్రలు తీసుకొని, తదుపరి కాప్ కౌంటర్ లో నగదు చెల్లించి పక్కన వున్నా గోడౌన్ లో యూరియా బస్తాను తోసుకోవడం జరుగుతుందని,  ఈ ప్రక్రియ లో   వేగవంతమైన ఇంటర్నెట్ సదుపాయం ఎక్కడైనా లేనపుడు కొంత సమయము పట్టడం జరుగుతుందని అన్నారు. 
యాసంగి సీజన్ లో అక్టోబర్ 1,2024 నుండి ఫిబ్రవరి 8,2025 వరకు 28293 మెట్రిక్ టన్నుల యూరియా మన జిల్లాకు రావడం జరిగిందని,  రైతులకు ఇప్పటి వరకు 22 వేల 720 మెట్రిక్ టన్నులు అమ్మడం జరిగిందని,   జిల్లాలో  ప్రస్తుతం 5573 మెట్రిక్ టన్నుల యూరియా అందుబాటులో ఉన్నాయని, ఫిబ్రవరి మార్చ్ నెలలో మరో 11 వేల 531 మెట్రిక్ టన్నుల యూరియా జిల్లాకు వస్తుందని కలెక్టర్ తెలిపారు.రైతుల అవసరాలను సకాలంలో తీర్చేందుకు మార్క్ ఫెడ్ వద్ద 2759 మెట్రిక్ టన్నుల యూరియా బఫర్ నిల్వలు సిద్ధంగా ఉన్నాయని, ప్రతి మండలంలో సొసైటీలు, ప్రైవేట్ డీలర్ల వద్ద యూరియా నిల్వలను అందుబాటులో ఉంచడమే కాకుండా, సకాలంలో సరఫరా కొనసాగించేందుకు జిల్లా యంత్రాగం కూడా తరచుగా జిల్లాకు యూరియా కేటాయింపుల కోసం వ్యవసాయ శాఖా డైరెక్టర్ దృష్టికి తీసుకెళ్లడం జరుగుతుందని అన్నారు. యూరియా సరఫరా అనేది నెల సప్లై ఫ్లాన్ ప్రకారం ప్రతి రోజు సరఫరా ఉంటుందని, రైతులు ఎటువంటి ఆందోళన చెందవలసిన అవసరంలేదు. జిల్లా యంత్రాగం, జిల్లా వ్యవసాయ శాఖ యూరియా సరఫరాను నిరంతరం పర్యవేక్షిస్తోందని, ఎటువంటి సమస్యలు ఉన్నా మీ 'మండల వ్యవసాయ అధికారిని" సంప్రదించవచ్చని కలెక్టర్ ఆ ప్రకటనలో పేర్కొన్నారు.