రెండురోజుల్లో ఇద్దరు,,,కోర్టులోనే గుండెపోటుతో మరో లాయర్‌ మృతి

 గత కొంత కాలంగా గుండెపోటుతో మృతి చెందుతున్న వారి సంఖ్య పెరుగుతుండటం తీవ్ర కలకలం రేపుతోంది. చిన్నా పెద్దా తేడా లేకుండా నిత్యం ఎక్కడో ఒకచోట ఇలాంటి గుండెపోటుతో చనిపోయే ఘటనలు పెరుగుతున్నాయి. అప్పటివరకు యాక్టివ్‌గా ఉన్నవారు.. ఒక్కసారిగా ఉన్నట్టుండి కుప్పకూలిపోతున్నారు. వెంటనే ఆస్పత్రికి తరలించినా వారి ప్రాణాలు దక్కడం లేదు. ఇలాంటి గుండెపోటు ఘటనలు పెరుగుతున్న నేపథ్యంలో.. ప్రభుత్వాలు, ఆస్పత్రులు, స్వచ్ఛంద సంస్థలు సీపీఆర్ చేయడం ద్వారా వారికి ప్రథమ చికిత్స అందించి చివరి క్షణాల్లో ప్రాణాలు దక్కించుకునేందుకు చర్యలు తీసుకుంటున్నారు.

తెలంగాణ హైకోర్టులో కేసు వాదిస్తూనే ఓ సీనియర్ లాయర్.. గుండెపోటుతో కుప్పకూలిపోయి ప్రాణాలు కోల్పోయిన ఘటన మరిచిపోకముందే.. తాజాగా మరొకటి అలాంటి ఘటనే చోటు చేసుకుంది. సికింద్రాబాద్ జిల్లా కోర్టులో ఇవాళ ఒక లాయర్ గుండెపోటుతో మృతి చెందారు. దీంతో రెండు రోజుల్లోనే ఇద్దరు లాయర్లు.. కోర్టుల్లోనే గుండెపోటుతో ప్రాణాలు విడిచిన సంఘటన సంచలనంగా మారింది. సికింద్రాబాద్ కోర్టు ఆవరణలో వెంకటరమణ అనే లాయర్ గుండెపోటుతో ప్రాణాలు విడిచారు. సికింద్రాబాద్ కోర్టులోని బ్యాంకులో డబ్బులు డిపాజిట్ చేసేందుకు వెళ్లిన లాయర్ వెంకటరమణ.. ఒక్కసారిగా కుప్పకూలిపోయారు.

అది గమనించిన తోటి లాయర్లు.. వెంకటరమణను ఆస్పత్రికి తరలించేందుకు ప్రయత్నించగా.. మార్గ మధ్యలోనే ప్రాణాలు కోల్పోయారు. అప్పటివరకు మాట్లాడుతూ ఉన్న వెంకటరమణ ఒక్కసారిగా కుప్పకూలి ప్రాణాలు కోల్పోవడంతో తోటి లాయర్లు షాక్‌కు గురయ్యారు. గత 25 ఏళ్లుగా సికింద్రాబాద్ కోర్టులో అడ్వకేట్‌గా విధులు నిర్వహిస్తున్న వెంకటరమణ మృతితో.. లాయర్లు అందరూ సంతాపం వ్యక్తం చేశారు.

ఇక మంగళవారం తెలంగాణ హైకోర్టులో లాయర్ పసునూరు వేణుగోపాలరావు గుండెపోటుతో చనిపోయారు. 21వ కోర్టు హాలులో ఓ కేసు విచారణ సందర్భంగా.. జడ్జి ముందు వాదనలు వినిపిస్తూనే.. ఒక్కసారిగా లాయర్ వేణుగోపాలరావు కుప్పకూలిపోయారు. వెంటనే అతడ్ని అంబులెన్స్‌లో పక్కనే ఉన్న ఉస్మానియా ఆస్పత్రికి తరలించగా.. అప్పటికే చనిపోయినట్లు డాక్టర్లు ధృవీకరించారు. వరుసగా రెండురోజుల వ్యవధిలోనే ఇద్దరు లాయర్లు.. కోర్టు ఆవరణలోనే హఠాన్మరణం చెందడం గమనార్హం.