లండన్ నుంచి వచ్చిన సైబర్ నేరస్తుడిని అరెస్టు చేసిన పోలీసులు

లండన్ నుంచి వచ్చిన సైబర్ నేరస్థుడు షణ్ముఖ కృష్ణ యాదవ్ ను హైదరాబాద్ ఎయిర్ పోర్టులో అరెస్టు చేసి శుక్రవారం రిమాండ్ కు తరలించారు.  మెట్ పల్లి సర్కిల్ కార్యాలయంలో శుక్రవారం విలేకరుల సమావేశం ఏర్పాటు చేసి సిఐ నిరంజన్ రెడ్డి, మల్లాపూర్ ఎస్ఐ రాజు సైబర్ నేరానికి సంబంధించిన వివరాలు వెల్లడించారు. మల్లాపూర్ మండలంలోని ముత్యంపేట్ గ్రామానికి చెందిన విద్యార్థి మామిడాల నితీష్ కుమార్ ఉన్నత చదువులు చదివేందుకు లండన్ యూనివర్సిటీలో సీటు కోసం ప్రయత్నం చేశాడు. ఈ క్రమంలో టెలిగ్రామ్ యాప్ ద్వారా లండన్ లో ఉన్న షణ్ముఖ కృష్ణ యాదవ్ నితీష్ కుమార్ తో పరిచయం పెంచుకున్నాడు. తనది ఆంధ్రప్రదేశ్ లోని తిరుపతి పట్టణమని లండన్ లో తాను చదువుకుంటున్నాని నితీష్ కుమార్ కు తెలిపాడు. లండన్ వచ్చిన తర్వాత యూనివర్సిటీలో ఇండియా డబ్బులు చెల్లించాల్సి స్తే అధిక మొత్తంలో చెల్లించాల్సి ఉంటుందని నితీష్ కుమార్ ను నమ్మించాడు.
తిరుపతి పట్టణంలోని తన బ్యాంకు ఖాతాలో డబ్బులు జమ చేస్తే లండన్ యూనివర్సిటీలో డబ్బులు చెల్లించి రసీదు పంపిస్తానని షణ్ముఖ కృష్ణ యాదవ్ నమ్మ బలికాడు. అతని మాటలు నమ్మిన నితీష్ కుమార్ బ్యాంక్ ఆఫ్ ఇండియా తిరుపతి టౌన్ బ్రాంచ్ లోని షణ్ముఖ కృష్ణ యాదవ్ అకౌంట్ కు స్థానిక బ్యాంకు నుంచి రెండు దపాల్లో రూ.6 లక్షలు పంపించాడు. యూనివర్సిటీలో డబ్బులు కట్టిన రసీదు పంపాలని నితీష్ కుమార్ లండన్ లో ఉన్న కృష్ణ యాదవులను ఫోన్లో అడగగా పంపుతాని కొన్ని రోజుల తర్వాత ఫోన్ స్విచ్ ఆఫ్ చేశాడు. దీంతో మోసపోయానని గ్రహించిన నితీష్ కుమార్ మల్లాపూర్ పోలీస్ స్టేషన్ లో ఫిర్యాదు చేయడంతో 2023 మే 27న నిందితుడిపై కేసు నమోదు చేశారు. తల్లిదండ్రులు డబ్బులు సమకూర్చడంతో కొద్దిరోజుల తర్వాత నితీష్ కుమార్ చదువుకునేందుకు లండన్ వెళ్లాడు. తనను మోసం చేసిన షణ్ముఖ కృష్ణ యాదవ్ ఆచూకీ తెలుసుకునేందుకు నితీష్ కుమార్ లండన్ లో తీవ్రంగా ప్రయత్నించినప్పటికీ ఫలితం లేకుండా పోయింది. గురువారం షణ్ముఖ కృష్ణ యాదవ్ లండన్ నుంచి ఫ్లైట్ లో హైదరాబాద్ ఎయిర్ పోర్ట్ కి రాగా ఇమిగ్రేషన్ అధికారులు నిందితుడైన షణ్ముఖ కృష్ణ యాదవ్ గురించి సీఐ నిరంజన్ రెడ్డికి సమాచారం ఇచ్చారు. సిఐ ఆదేశం మేరకు మల్లాపూర్ ఎస్ఐ రాజు హైదరాబాద్ వెళ్లి ఇమిగ్రేషన్ అధికారుల అనుమతితో నిందితుడైన షణ్ముఖ కృష్ణ యాదవును అదుపులోకి తీసుకున్నారు. పోలీసు విచారణలో మోసం చేసినట్లు షణ్ముఖ యాదవ్ అంగీకరించాడు. షణ్ముఖ కృష్ణ యాదవ్ తో పాటు అతనికి  సహకరించిన అతని తండ్రి జయ రామయ్య పై వివిధ సెక్షన్ల కింద కేసు నమోదు చేసి రిమాండ్ కు తరలించినట్లు సిఐ తెలిపారు. ఫోన్ లో, టెలిగ్రామ్ లో పరిచయమయ్యే గుర్తు తెలియని వ్యక్తులను నమ్మవద్దని సిఐ నిరంజన్ రెడ్డి యువకులకు సూచించారు. సైబర్ నేరగాళ్లతో మోసపోయిన వ్యక్తులు తక్షణమే 1930 కి ఫోన్ చేయాలని, దగ్గరలో ఉన్న పోలీస్ స్టేషన్ కి సమాచారం సూచించారు.