మరో కొత్త ఫ్లైఓవర్.. వారం రోజుల్లో అందుబాటులోకి, తీరనున్న ట్రాఫిక్ కష్టాలు

హైదరాబాద్ నగరంలో ఇప్పటికే అనేక కొత్త ఫ్లైఓవర్లు అందుబాటులోకి వచ్చాయి. నగర ప్రజల ట్రాఫిక్ కష్టాలకు చెక్ పెట్టేలా వీటిని నిర్మించగా.. ప్రస్తుతం రాకపోకలు సాగుతున్నాయి. ఇక హైదరాబాద్ తర్వాత ఇండస్ట్రీయల్ ఏరియాగా పేరున్న సంగారెడ్డి జిల్లా లింగపల్లిలో మరో కొత్త ఫ్లైఓవర్ అందుబాటులోకి రానుంది. ట్రాఫిక్ కష్టాలు తీర్చేందుకు గాను సంగారెడ్డి, రంగారెడ్డి జిల్లాల పరిధిలో బీహెచ్ఈఎల్ జంక్షన్ వద్ద కొత్త ఫ్లైఓవర్ నిర్మించారు. మెుత్తం రూ.130.65 కోట్ల వ్యయంతో 1.65 కిలోమీటర్ల పొడవున నిర్మించిన ఈ ఫ్లై ఓవర్ మరో వారం రోజుల్లో వాహనదారులకు అందుబాటిలోకి రానుంది.

గత బీఆర్ఎస్ ప్రభుత్వ హయంలో 2022లో ఫ్లై ఓవర్ పనులు ప్రారంభించగా.. తాజాగా పనులు పూర్తయ్యాయి. ఇప్పటికే ఫ్లైఓవర్‌పై తాత్కాలికంగా వాహనాలకు ఎంట్రీ ఇచ్చారు. త్వరలో బ్రిడ్జిని అధికారికంగా ప్రారంభించేందుకు అధికారులు కసరత్తు చేస్తున్నారు. సంగారెడ్డి జిల్లా జహీరాబాద్, జోగిపేట, సదాశివపేట, సంగారెడ్డి, నారాయణఖేడ్ వాసులు పటాన్‌చెరు నుంచి బీరంగూడ మీదుగా లింగంపల్లి ఫ్లై ఓవర్ ఎక్కి ఎలాంటి ట్రాఫిక్ చిక్కులు లేకుండా చాలా వేగంగా హైదరాబాద్ నగరం చేరుకునే ఛాన్స్ ఉంది. ప్రస్తుతం పటాన్ చెరు, పాశమైలారం, అమీన్పూర్, బీరంగూడ వాసులు సంగారెడ్డి, జహీరాబాద్ ఇండస్ట్రియల్ ఏరియాకు వెళ్లే వాహనాలు అశోక్ నగర్, బీహెచ్ఈఎల్ సర్కిల్ మీదుగా ప్రయాణాలు సాగిస్తున్నాయి. దీంతో ఈ రహదారి నిత్యం రద్దీగా ఉండేది.

ఈ నేపథ్యంలో కొత్తగా ఫ్లైఓవర్ నిర్మాణం చేపట్టారు. ప్రస్తుతం లింగంపల్లి ఫ్లైఓవర్ పైనుంచి వాహనాలకు తాత్కాలికంగా అనుమతి ఇచ్చారు. బెల్ జంక్షన్ వద్ద మూడు రోడ్లు కలవడంతో ఇక్కడ ప్రతిరోజూ ట్రాఫిక్ రద్దీ ఉంటుంది. ఈ నేపథ్యంలో ప్లైఓవర్ అందుబాటులోకి రావటంతో ప్రయాణికులు హర్షం వ్యక్తం చేస్తున్నారు. ఈ ఫ్లైఓవర్‌పై ఉన్న చిన్న చిన్న పనులు పూర్తి చేసి త్వరలో అధికారింగా ప్రారంభించనున్నారు. అందుకు సంబంధించిన ఏర్పాట్లు చురుగ్గా సాగుతున్నాయి. ఇప్పటికే ఫ్లైఓవర్‌కు సంబంధించి నాణ్యత పనులు పూర్తయినట్లు అధికారులు తెలిపారు. మరో వారం రోజుల్లో ఫ్లైఓవర్ పూర్తిగా అందుబాటులోకి వస్తుందన్నారు. అధికారికంగా ప్రారంభించేందుకు ఏర్పాట్లు చేస్తున్నట్లు ఎన్‌హెచ్‌ఏఐ అధికారి రామకృష్ణ తెలిపారు.