తెలంగాణ యువతకు .. ఒక్కొక్కరికి రూ. 3 నుంచి 5 లక్షలు

తెలంగాణ నిరుద్యోగులకు రేవంత్ రెడ్డి సర్కార్ మరో అదిరిపోయే శుభవార్త వినిపించింది. యువతకు ఉపాధి అవకాశాలు కల్పించే దిశగా ప్రయత్నాలు చేస్తున్న ప్రభుత్వం.. ఈ మేరకు కొత్త పథకాన్ని తీసుకొస్తోంది. రాజీవ్ యువ వికాసం పేరుతో తీసుకొస్తున్న ఈ కొత్త పథకాన్ని రేపే ప్రారంభించనున్నారు. కాగా.. పథకం ప్రారంభంపై మంత్రి పొన్న ప్రభాకర్‌తో కలిసి డిప్యూటీ సీఎం భట్టి విక్రమార్క సమీక్ష నిర్వహించారు. ఈ సమావేశంలోత.. యువ వికాసం పథకం విధి విధానలపై చర్చించారు. అయితే.. సోమవారం (మార్చి 17న) నుంచి రాజీవ్ యువ వికాసం పథకం దరఖాస్తుల ప్రక్రియను సీఎం రేవంత్ రెడ్డి లాంఛనంగా ప్రారంభించనున్నారు. ఈ ప్రారంభ కార్యక్రమంలో డిప్యూటీ సీఎం భట్టి విక్రమార్క, బీసీ సంక్షేమ శాఖ మంత్రి పొన్నం ప్రభాకర్ ఇతర మంత్రులు పాల్గొననున్నారు.

అయితే.. నిరుద్యోగ యువతకు ఉపాధి అవకాశం కల్పించేందుకే ఈ యువ వికాం పథకాన్ని ప్రారంభిస్తున్నట్లు డిప్యూటీ సీఎం మల్లు భట్టి విక్రమార్క తెలిపారు. తెలంగాణ సంక్షేమ శాఖ, ఎస్సీ, ఎస్టీ, బీసీ, మైనార్టీ కార్పొరేషన్ల సహాకారంతో ఈ పథకం అమలు చేయనున్నట్టు తెలిపారు. ఈ కార్పొరేషన్ల ద్వారా నిరుద్యోగ యువతకు ఉపాధి కల్పించేందుకు ప్రభుత్వం ఆర్థిక సాయం అందజేయనుంది.

యువత సొంత వ్యాపారాలు చేసుకునేందుకు.. ఆర్థికంగా నిలదొక్కుకునేందుకు రూ.3 లక్షల నుంచి రూ. 5 లక్షల వరకు ప్రభుత్వం ఆర్థిక సాయం చేయనుంది. ఈ ఆర్థిక సాయం కోసం దరఖాస్తు చేసుకునేందుకు షెడ్యూల్ కూడా విడుదల చేశారు. మార్చి 15 నుంచి ఏఫ్రిల్ 5 వరకు అర్హులైన వారు ఈ పథకం కోసం దరఖాస్తు చేసుకోవచ్చని ప్రభుత్వం తెలిపింది. మెుత్తం రూ. 6 వేల కోట్లతో ఈ పథకాన్ని రూపొందించామని.. తెలంగాణ వ్యాప్తంగా 5 లక్షల మంది యువతకు తగ్గకుండా సాయం చేయనున్నట్టు భట్టి విక్రమార్క ఇప్పటికే వెల్లడించారు.

 ఎన్నికల్లో ఇచ్చిన హామీలను ఒక్కొక్కటిగా అమలు చేసే పనిలో పడిన రేవంత్ రెడ్డి సర్కార్.. మహిళలు, రైతుల సంక్షేమం, అభివృద్ధి కోసం ఇప్పటికే పలు పథకాలు, కార్యక్రమాలు అమలు చేస్తున్న విషయం తెలిసిందే. ఈ క్రమంలోనే.. రాష్ట్రాంలో ప్రధాన సమస్యగా ఉన్న నిరుద్యోగాన్ని రూపుమాపేందుకు ప్రభుత్వం అన్ని రకాలుగా కృషి చేస్తోంది. ఇందులో భాగంగా.. ఇప్పటికే పలు రంగాల్లో ఉద్యోగాలకు నోటిఫికేషన్లు, పరీక్షలు నిర్వహిస్తున్న ప్రభుత్వం.. తాజాగా రాజీవ్ యువ వికాసం పేరుతో కొత్త పథకాన్ని అమలు చేసేందుకు సిద్ధమైంది.