ఆ యువకుడి మాటలు విని మంత్రి కన్నీళ్లు.

"నాకు క్రికెట్ అంటే చాలా ఇష్టం సార్.. పెద్ద క్రికెటర్ కావాలని ఎన్నో కలలు గన్నా.. నాకొక క్రికెట్ కిట్ ఇప్పిస్తారా.. ప్లీజ్.." అంటూ ధీనంగా అడిగాడు క్యాన్సర్‌తో బాధపడుతూ చికిత్స పొందుతున్న యువకుడు. ఆ మాటలు విని మనసున్న మనిషెవ్వరికైనా కళ్లు చెమర్చక మానవు. అచ్చంగా అదే జరిగింది. క్యాన్సర్‌తో పోరాడుతున్న ఆ యువకుడు చెప్పిన మాటలు విని తెలంగాణ మంత్రి దుద్దిళ్ల శ్రీధర్ బాబు కూడా చలించిపోయారు. తీవ్ర భావోద్వేగాన్ని అపుకోలేక కన్నీళ్లు పెట్టుకున్నారు. ఈ ఘటన హైదరాబాద్‌లో చోటుచేసుకుంది.

జయశంకర్ భూపాలపల్లి జిల్లా మంథని నియోజకవర్గంలోని పలిమేల మండలం సర్వాయ్‌పేట గ్రామానికి చెందిన భౌత్ నితిన్ అనే యువకుడు కాన్సర్‌తో బాధపడుతూ. హైదరాబాద్‌ ఖాజాగూడలోని స్పర్శ ఆస్పత్రిలో చికిత్స పొందుతున్నాడు. ఈ విషయం తెలుసుకున్న మంత్రి శ్రీధర్ బాబు.. స్వయంగా ఆసుపత్రికెళ్లి నితిన్‌ను పరామర్శించారు. నితిన్ ఆరోగ్య పరిస్థితిని అడిగి తెలుసుకున్నారు. డాక్టర్లతో మాట్లాడి.. మెరుగైన వైద్యం అందించాలని సూచించారు. నితిన్ కుటుంబ సభ్యులతో మాట్లాడిన మంత్రి శ్రీధర్ బాబు.. ధైర్యం చెప్పారు. తానున్నాననే భరోసానిచ్చారు.

తనకు క్రికెట్ అంటే చాలా ఇష్టమని, పెద్ద క్రికెటర్ అవ్వాలని ఎన్నో కలలు కన్నట్టు నితిన్ చెప్తున్న క్రమంలో భావోద్వేగానికి గురయ్యారు. నితిన్ మాటలకు మంత్రి శ్రీధర్ బాబు కన్నీళ్లు పెట్టుకున్నారు. అప్పటికప్పుడు.. తన సిబ్బందికి చెప్పి క్రికెట్ కిట్ తెప్పించి.. నితిన్ కోరికను నెరవేర్చారు. అంతేకాదు.. "సొంతన్నలా నితిన్‌కు అండగా ఉంటా.. ఏ అవసరమున్నా నేరుగా నన్ను సంప్రదించండి.." అంటూ యువకుడి తల్లిదండ్రులకు మంత్రి శ్రీధర్ బాబు ధైర్యం చెప్పారు.

 ఇందుకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఈ వీడియోపై పలువురు నెటిజన్లు స్పందిస్తూ.. క్యాన్సర్ నుంచి నితిన్ తొందరగా కోలుకోవాలని కోరుకుంటున్నారు. మంత్రి శ్రీధర్ బాబు చేసిన పనికి అభినందనలు చెప్తున్నారు. కాగా.. ప్రభుత్వం తరపున నితిన్‌కు మెరుగైన వైద్యం అందించి.. అతన్ని కాపాడాలని విజ్ఞప్తులు చేస్తున్నారు.