మంత్రి పదవిపై మనసులో మాట చెప్పిన కోమటిరెడ్డి రాజగోపాల్ రెడ్డి

తెలంగాణలో ఆసక్తకిర పరిణామాలు చోటుచేసుకుంటున్నాయి. అందులో ముఖ్యంగా మంత్రి వర్గ విస్తరణ ఉండబోతుందన్న వార్తలు జోరుగా ప్రచారమవుతున్నాయి. మొత్తంగా ఆరు మంత్రి పదవులకు అవకాశం ఉండగా.. ఈసారి నాలుగురికి ఛాన్స్ ఇవ్వనున్నట్టు సమాచారం. అయితే.. రేసులో మునుగోడు ఎమ్మెల్యే కోమటిరెడ్డి రాజగోపాల్ రెడ్డి పేరు గట్టిగా వినిపిస్తోంది. మంత్రి పదవి మీదే కాదు.. ఏ శాఖ కూడా ఇవ్వనున్నారన్నది కూడా పార్టీ శ్రేణుల్లో చర్చ జరుగుతోంది. ఈ నేపథ్యంలో.. మంత్రి పదవిపై తన మనసులో మాట బయటపెట్టారు కోమటిరెడ్డి రాజగోపాల్ రెడ్డి.

ఈసారి కేబినెట్ విస్తరణలో తనకు మంత్రి పదవి వస్తుందనుకుంటున్నట్లు కోమటిరెడ్డి రాజగోపాల్ రెడ్డి ఆశాభావం వ్యక్తం చేశారు. అయితే.. తనకు హోంశాఖ అంటే ఇష్టమని మనసులో మాట చెప్పారు. ఈ క్రమంలోనే.. ఏ పదవి వచ్చినా సమర్థవంతంగా నిర్వహిస్తానని.. ప్రజల పక్షాన నిలబడతానని రాజగోపాల్ రెడ్డి తెలిపారు. కెపాసిటీని బట్టి మంత్రులను ఎంపిక చేయాలని అభిప్రాయపడ్డారు. కేబినెట్ విస్తరణపై ఢిల్లీలో సీరియస్‌గానే చర్చ జరిగినట్లుందని చెప్పిన కోమటిరెడ్డి రాజగోపాల్ రెడ్డి.. తనకు ఇప్పటివరకు ఢిల్లీ నుంచి ఎలాంటి ఫోన్ రాలేదని స్పష్టం చేశారు.

త్వరలో చేపట్టనున్న కేబినెట్ విస్తరణలో కోమటిరెడ్డి రాజగోపాల్ రెడ్డికి మంత్రి పదవి ఖాయమంటు ప్రచారం జరుగుతున్న నేపథ్యంలో.. ఆయన చేసిన ఇంట్రెస్టింగ్ కామెంట్లు ఇప్పుడు చర్చనీయాంశంగా మారాయి.

కాగా.. తెలంగాణలో కేబినెట్ విస్తరణకు కాంగ్రెస్ అధిష్ఠానం గ్రీన్ సిగ్నల్ ఇచ్చినట్టు తెలుస్తోంది. ప్రస్తుతం రేవంత్ రెడ్డి ప్రభుత్వంలో ఆరు మంత్రి పదవులు ఖాళీగా ఉండగా.. ఇందులో నాలుగింటిని భర్తీ చేయాలని భావిస్తున్నట్టు సమాచారం. అది కూడా ఉగాది పండుగ వరకు.. భర్తీ చేయనున్నట్లు తెలుస్తోంది.

అయితే.. ఈ మంత్రి పదవుల కోసం చాలా మంది ఆశావాహులు ఉండగా.. మంత్రి పదవులు దక్కని వారికి డిప్యూటీ స్పీకర్, చీఫ్ విప్ పదవులను ఇవ్వాలని యోచిస్తున్నట్టు సమాచారం. కాగా.. డిప్యూటీ స్పీకర్ పదవి ఎస్టీలోని లంబాడకు ఇవ్వడంపై చర్చించినట్లు తెలిసింది. చీఫ్ విప్ పదవి మాదిగ సామాజికవర్గానికి లేదంటే బీసీలో మంత్రి పదవి దక్కని మరో సామాజికవర్గానికి ఇచ్చే అవకాశం ఉన్నట్టు సమాచారం.

అయితే.. కేబినెట్ విస్తరణలో సామాజిక సమతుల్యం తప్పక పాటించాలని కాంగ్రెస్ అధిష్ఠానం నిర్ణయించినట్టు సమాచారం. బీసీ, ఎస్సీ, మైనార్టీ, రెడ్డి సామాజిక వర్గాలకు ఒక్కో పదవి ఇచ్చే అవకాశం ఉంది. అయితే.. కొత్తగా నలుగురిని కేబినెట్లోకి తీసుకోనుండటంతో పాటు ముగ్గురు, నలుగురు మంత్రుల శాఖల్లో మార్పు జరిగే ఆస్కారం ఉందని పార్టీ వర్గాల్లో చర్చ నడుస్తోంది. ఒక మంత్రిని కూడా కేబినెట్ నుంచి తప్పించే అవకాశం కూడా ఉందని గుసగుసలు వినిపిస్తున్నాయి.