రూ.500కే 5 బ్లౌజులు.. ఆఫర్‌కు షాకింగ్ రెస్పాన్స్

ఆఫర్ అనే మూడు అక్షరాల మంత్రానికి సామాన్యులు ఎలా అట్రాక్ట్ అవుతారో ప్రత్యేకంగా చెప్పక్కర్లేదు. ఇదే మంత్రాన్ని చాలా మంది వ్యాపారులు వినియోగదారులపై ప్రయోగించి మాయ చేసి లాభాలు గడిస్తుంటారు. పబ్లిసిటీకి పబ్లిసిటీ.. వ్యాపారానికి వ్యాపారం.. జరుగుతుందన్నది వ్యాపారుల స్ట్రాటజీ కాబోలు.. షాప్ ఓపెనింగులకు అందమైన హీరోయిన్లను పిలుస్తుంటారు. అయితే.. ఈ మధ్య దుకాణాలు ఓపెనింగ్ సందర్భంగా అందమైన ముద్దుగుమ్మలను పిలవటమే కాదు.. అదిరిపోయే ఆఫర్లు పెట్టి.. జనాలను ఆకర్షిస్తున్నారు. అచ్చంగా అదే జరిగింది హైదరాబాద్‌లోని దిల్‌సుఖ్‌నగర్‌‌లో కూడా. అక్కడ కొత్తగా వెలిసిన "బ్లౌజ్ వరల్డ్" షాపు ఓపెనింగ్‌ రోజున దుకాణానికి జనాలు పోటెత్తిన తీరు అందరిని విస్తుపోయేలా చేస్తోంది. మరి అంతగా రావటానికి కారణం.. అక్కడికి ఏ హీరోయినో రాలేదు.. జస్ట్.. 500 రూపాయలకే ఐదు బ్లౌజ్‌లు అని ఆఫర్ పెట్టారు. ఇంకేముంది.. ఈ ఆఫర్ విన్న మహిళామణులు.. క్షణం కూడా ఆలస్యం చేయకుండా షాపు వైపు పరుగులు తీశారు.

సాధారణంగా మార్కెట్‌లో ఒక మంచి బ్లౌజ్ కొనాలంటే కనీసం రూ.200 నుంచి రూ.500 వరకు వెచ్చించాల్సి వస్తుంది. అలాంటి పరిస్థితుల్లో.. కేవలం 500 రూపాయలకే 5 బ్లౌజ్‌ల ఆఫర్ అంటే మామూలు విషయం కాదు. ఇది విన్న మహిళలు తమ ఇంటి పనులను, ఇతరత్రా పనులను వదిలిపెట్టి దిల్‌సుఖ్‌నగర్‌కు క్యూ కట్టారు. రాజీవ్ చౌక్ ప్రాంతమంతా మహిళలతో కిక్కిరిసిపోయింది. షాపు ముందు సుమారు ఒక కిలోమీటరు మేర పొడవైన క్యూ లైన్ ఏర్పడింది. ఈ ఆఫర్ కోసం ఎదురు చూస్తున్న మహిళలు రోడ్ల మీద బారులు తీరటంతో.. ఆ ప్రాంతంలో కాసేపు ట్రాఫిక్ జామ్ కూడా ఏర్పడిందంటే పరిస్థితి ఎలా ఉందో అర్థం చేసుకోవచ్చు.

"బ్లౌజ్ వరల్డ్" షాపు యజమాని ఈ ఊహించిన స్పందన చూసి ఆశ్చర్యపోయారు. "మేము కేవలం మా షాపు ప్రారంభోత్సవం సందర్భంగా కొంత పబ్లిసిటీ పొందాలని మాత్రమే అనుకున్నాం. కానీ, ఇంత భారీ స్థాయిలో రెస్పాన్స్ వస్తుందని కలలో కూడా ఊహించలేదు." అంటూ నవ్వుతూ చెప్పారు. వ్యాపారం మాత్రం ఊహించిన దానికంటే 'బ్లాక్‌బస్టర్' హిట్ అయిందట! ప్రస్తుతం ఈ షాపు ముందు మహిళలు బ్లౌజ్‌ల కోసం ఎగబడుతున్న వీడియోలు సోషల్ మీడియాలో తెగ వైరల్ అవుతున్నాయి.

మొదటి రోజే ఊహించిన దానికంటే అనేక రెట్లు ఎక్కువ వ్యాపారం జరిగిందని దుకాణ యజమాని తెలిపారు. ఈ ఆఫర్‌కు సంబంధించిన వీడియోలు, ఫోటోలు సోషల్ మీడియాలో క్షణాల్లో వైరల్ అయ్యాయి. లక్షల మంది వీటిని చూసి ఆశ్చర్యపోతున్నారు. ఆఫర్ లేదా డిస్కౌంట్ అనే పదం వింటే చాలు.. దాన్ని పొందేందుకు ఎంత దూరమైనా వెళ్లడానికి సామాన్యులు సిద్ధంగా ఉంటారన్న విషయం మరోసారి రుజువైంది. చిన్న వ్యాపారాల నుండి పెద్ద కంపెనీల వరకు, అందరూ ఈ సూత్రాన్ని ఉపయోగించి తమ ఉత్పత్తులను విక్రయిస్తున్నారు.