తెలంగాణ పరువు తీయొద్దు: ఈటల రాజేందర్

స్వాతంత్య్రానికి ముందే, నిజాం కాలంలో తెలంగాణ ప్రాంతంలో రైల్వే, విద్యుత్, టెలిఫోన్ వంటి సౌకర్యాలు ఉన్నాయని బీజేపీ నేత, మల్కాజిగిరి ఎంపీ ఈటల రాజేందర్ తెలిపారు. కాకతీయులు తవ్వించిన చెరువులు తెలంగాణలో ఉన్నాయని అన్నారు. సన్న బియ్యం తిన్న మొట్ట మొదటి రాష్ట్రాన్ని దివాలా తీసిన రాష్ట్రంగా చూపడం సరికాదన్నారు. 2014 లోనే తెలంగాణ సొంత పన్నుల ఆదాయం రూ.29 వేల కోట్లు అని ఈటల తెలిపారు. ఒక వ్యక్తిని, ఒక పార్టీని దోషిగా నిలబెట్టేందుకు తెలంగాణను దివాలా రాష్ట్రంగా చూపొద్దు అని సూచించారు.

రాష్ట్ర ఆర్థిక పరిస్థితిపై ముఖ్యమంత్రి రేవంత్ రెడ్డి చేసిన వ్యాఖ్యలు రాజకీయ వర్గాల్లో చర్చకు దారితీసాయి. ఈ క్రమంలో.. తెలంగాణ ఎన్నడు కూడా పేద రాష్ట్రం కాదని ఈటల రాజేందర్ అన్నారు. నాంపల్లిలోని బీజేపీ రాష్ట్ర కార్యాలయంలో ఏర్పాటు చేసిన మీడియా సమావేశంలో మాట్లాడుతూ.. సీఎం రేవంత్ రెడ్డి తెలంగాణ ఆత్మగౌరవాన్ని ముఖ్యమంత్రి ధ్వంసం చేస్తున్నారని మండిపడ్డారు.

2014లోనే తెలంగాణ సొంత పన్నుల ఆదాయం 29 వేల కోట్ల రూపాయలని ఈటల రాజేందర్ చెప్పారు. ఏటా 5 వేల కోట్ల రూపాయల నుంచి 10 వేల కోట్ల ఆదాయం పెరిగిందని పేర్కొన్నారు. 2023-24 ఆర్థిక సంవత్సరంలో లక్షా 19 వేల కోట్ల రూపాయలు, 2024-25వ సంవత్సరంలో లక్షా 25 వేల కోట్ల రూపాయల ఆదాయం వచ్చిందని వివరించారు. పన్నేతర ఆదాయం 2014లో 6వేల కోట్ల రూపాయలు ఉండగా.. అది 2023-24లో 20 వేల కోట్ల రూపాయలకు పెరిగిందని ఆయన చెప్పారు. చేతకాకపోతే రాజీనామ చేయాలి కానీ, రాష్ట్రాన్ని దివాళా తీసిన రాష్ట్రంగా చూపించొద్దని హితవు పలికారు.

అధికారంలోకి వచ్చిన తర్వాత లక్షా 30 వేల కోట్ల రూపాయల అప్పు చేసిన రేవంత్ రెడ్డి.. ప్రజలకు క్షమాపణ చెప్పి, రాజీనామా చేయాలని ఈటల డిమాండ్ చేశారు. దివాళా తీసింది తెలంగాణ కాదు.. కాంగ్రెస్ దివాళ తీసిందని అన్నారు. నెలకు దాదాపు 20 వేల కోట్ల రూపాయల ఆదాయం వస్తుంటే.. దివాళా తీసిందని ఎలా అంటారని ప్రశ్నించారు. రేవంత్ రెడ్డి వ్యాఖ్యలపై రాహుల్ గాంధీ, సోనియా గాంధీ సమాధానం చెప్పాలని డిమాండ్ చేశారు. కాంగ్రెస్ పార్టీ తెలంగాణకు శనిలా దాపురించిందని ఈటల మండిపడ్డారు.