ఐసీసీసీ నుంచి జీహెచ్ఎంసీ ప్రజలకు మెసేజ్ వస్తుందన్న సీవీ ఆనంద్
Telangana Telugu | Suryaa Desk | Published : Wed, May 07, 2025, 07:09 PM
హైదరాబాద్ నగరంలో అత్యవసర పరిస్థితులను ఎదుర్కొనే సన్నద్ధతను పరీక్షించేందుకు మరికొద్దిసేపట్లో మాక్డ్రిల్ నిర్వహించనున్నట్లు నగర పోలీసు కమిషనర్ సీవీ ఆనంద్ వెల్లడించారు. ఈ మాక్డ్రిల్ సందర్భంగా నగర ప్రజలు అప్రమత్తంగా ఉండాలని, అధికారులకు సహకరించాలని ఆయన కోరారు.ఈ మాక్డ్రిల్లో భాగంగా, ఇంటిగ్రేటెడ్ కమాండ్ అండ్ కంట్రోల్ సెంటర్ నుంచి గ్రేటర్ హైదరాబాద్ మున్సిపల్ కార్పొరేషన్ పరిధిలోని ప్రజల మొబైల్ ఫోన్లకు హెచ్చరిక సందేశాలు పంపనున్నట్లు సీపీ తెలిపారు. అలాగే, నగరంలోని పలు ప్రాంతాల్లో రెండు నిమిషాల పాటు పెద్దగా సైరన్ మోగిస్తారని ఆయన వివరించారు.సైరన్ శబ్దం వినపడగానే, ఆ సమయంలో బయట ఉన్న పౌరులు తక్షణమే సమీపంలోని సురక్షిత భవనాలు లేదా ప్రాంతాలకు తరలివెళ్లాలని సీపీ సీవీ ఆనంద్ సూచించారు. ఎలాంటి ఆందోళనకు గురికావద్దని, ఇది కేవలం సన్నద్ధతలో భాగమేనని ఆయన స్పష్టం చేశారు.అంతేకాకుండా, విధి నిర్వహణలో నిబద్ధతతో పనిచేస్తున్న భద్రతా దళాలకు సంఘీభావం తెలియజేస్తూ, వారి సేవలను స్మరించుకుంటూ గురువారం హైదరాబాద్ నగరంలో ఒక ర్యాలీని కూడా నిర్వహించనున్నట్లు సీపీ సీవీ ఆనంద్ ఈ సందర్భంగా పేర్కొన్నారు. ఈ కార్యక్రమాల్లో ప్రజలు భాగస్వాములు కావాలని ఆయన పిలుపునిచ్చారు
|
|