మాక్‌డ్రిల్ చేసేటప్పుడు.. మనం ఫాలో కావాల్సిన సేఫ్టీ గైడ్ లైన్స్ ఏంటి

9పహల్గాంలో జరిగిన ఉగ్రదాడికి భారత్ ప్రతీకారం తీర్చుకుంది. ఇవాళ తెల్లవారుజామున పాక్ ఆక్రమిత కశ్మీర్‌, పాక్‌‌లోని ఉగ్రవాద స్థావరాలపై భారత సాయుధ దళాలు 'ఆపరేషన్ సిందూర్' పేరుతో మెరుపు దాడులు చేశాయి. ఈ దాడుల్లో దాదాపు 80 మందికి పైగా ఉగ్రవాదులు హతమయ్యారని భద్రతా వర్గాలు వెల్లడించాయి. ఇక భారత్-పాక్ ఉద్రిక్తతల నేపథ్యంలో.. అత్యవసర పరిస్థితుల్లో ప్రజల ఎలా స్పందిచాలనే దానిపై నేడు దేశవ్యాప్తంగా పలు ప్రాంతాల్లో మాక్ డ్రిల్ నిర్వహించనున్నారు.

  హైదరాబాద్‌ నగరంలోనూ 'ఆపరేషన్ అభ్యాస్' పేరుతో సాయంత్రం 4:15 గంటలకు నాలుగు కీలక ప్రాంతాల్లో డిఫెన్స్ మాక్ డ్రిల్ జరగనుంది. సికింద్రాబాద్, గోల్కొండ, కంచన్‌బాగ్‌లోని డీఆర్‌డీవో, మౌలాలిలోని ఎన్‌ఎఫ్‌సీ వద్ద ఈ డ్రిల్ ఉంటుంది. పోలీసులు, అగ్నిమాపక సిబ్బంది, ఎస్‌డీఆర్‌ఎఫ్, వైద్య సిబ్బంది, రెవెన్యూ అధికారులు ఈ డ్రిల్‌లో పాల్గొని ప్రజలకు అవగాహన కల్పిస్తారు. సాయంత్రం 4 గంటలకు ఎయిర్ రైడ్ డ్రిల్‌లో భాగంగా రెండు నిమిషాల పాటు సైరన్లు మెగనున్నాయి. ఇది కేవలం శిక్షణ కోసం మాత్రమేనని, ప్రజలు ఆందోళన చెందవద్దని అధికారులు స్పష్టం చేశారు. కాగా, మాక్ డ్రిల్ సమయంలో ప్రజలు తీసుకోవాల్సిన భద్రతా చర్యలను అధికారులు వెల్లడించారు. అవేంటో ఓసారి చూద్దాం.

హైదరాబాద్ నగరంలో సాయంత్రం 4 గంటలకు రెండు నిమిషాల పాటు సైరన్లను మోగిస్తారు.

4.15 గంటలకు డ్రిల్ ప్రారంభం అవుతుంది.

ఆ సమయంలో ప్రజలెవరూ ఆందోళన చెందొద్దు.

ఎట్టి పరిస్థితుల్లోనూ బహిరంగ ప్రదేశాల్లో ఉండకూడదు.

ప్రజలు వెంటనే సురక్షితమైన ప్రదేశానికి చేరుకోవాలి.

బయటకు కనిపించకుండా భూగర్భ ప్రాంతాలు, షెల్టర్లలో తలదాచుకోవాలి.

టీవీ, ప్రభుత్వ యాప్‌ల ద్వారా మాత్రమే సమాచారం తెలుసుకోవాలి.

ఎట్టి పరిస్థితుల్లోనూ పుకార్లను నమ్మకూడదు.

ఒకవేళ బయట ఉంటే నేలపై పడుకుని తలను చేతులతో కప్పుకోవాలి.

అధికారుల సూచనల ప్రకారం ఎత్తైన భవనాల్లోఉంటే ఎస్కలేటర్లు వాడకుండా మెట్ల ద్వారానే కిందికు దిగాలి.

శత్రు దేశాలకు చెందిన యుద్ధ విమానాలకు కనబడకుండా ఉండటానికి లైట్లను ఆపివేయాలి.

వీధి లైట్లు, భవనాల లైట్లు, ప్రకటనల లైట్లు అన్నీ ఆపివేయాలి.

ఇళ్లలోని, కార్యాలయాలలోని కిటికీల కర్టన్లు మూసేయాలి.

ఇంట్లో ఉంటే విద్యుత్ ఉపకరణాలు, గ్యాస్, స్టవ్ వంటి వాటిని ఆపివేయాలి.

ప్రమాదం తొలగిపోయిందని అధికారులు చెప్పేవరకు సురక్షిత ప్రాంతాల్లోనే ఉండాలి.