గిరిజనులకు 'ఇందిరా సౌరగిరి జలవికాస పథకం' .. ఈనెల 18న కొత్త పథకం ప్రారంభం

తెలంగాణ సర్కార్ గిరిజనులకు గుడ్‌న్యూస్ చెప్పింది. వారి కోసం కొత్త పథకం ప్రారంభించనున్నట్లు డిప్యూటీ సీఎం భట్టి విక్రమార్క వెల్లడించారు. తమ ప్రభుత్వం ప్రతిష్టాత్మకంగా ప్రారంభించనున్న 'ఇందిరా సౌరగిరి జలవికాస పథకం' గిరిజనుల ఆర్థిక స్వావలంబనకు గొప్ప అవకాశమని చెప్పారు. నాగర్‌కర్నూల్ జిల్లా మన్ననూరులో ముఖ్యమంత్రి రేవంత్ రెడ్డి ఈ నెల 18న ఈ పథకాన్ని లాంఛనంగా ప్రారంభిస్తారని వెల్లడించారు. సచివాలయంలో గురువారం ఈ పథకంపై జరిగిన సమీక్షా సమావేశంలో డిప్యూటీ సీఎం భట్టి విక్రమార్క మాట్లాడారు. గిరిజనులకు ఆర్‌వోఎఫ్‌ఆర్‌ చట్టం కింద కేటాయించిన భూములను పూర్తిస్థాయిలో సాగులోకి తెచ్చి వారిని ఆర్థికంగా బలోపేతం చేయాలనే లక్ష్యంతో ప్రభుత్వం ఈ పథకాన్ని రూపొందించిందని తెలిపారు.

ఈ పథకం కోసం ప్రభుత్వం రూ.12,600 కోట్లు కేటాయించిందని భట్టి వెల్లడించారు. రాబోయే ఐదేళ్లలో 2.10 లక్షల మంది రైతులకు 6 లక్షల ఎకరాలకు సాగునీరు అందించడానికి ఈ పథకం ఉపయోగపడుతుందన్నారు. పోడు భూములను సాగు చేయడానికి ఇంత భారీ మొత్తంలో నిధులు కేటాయించిన రాష్ట్రం భారతదేశంలో మరేదీ లేదని ఆయన అన్నారు. ఈ పథకం కింద ఎంపిక చేసిన గ్రామాల్లో జల వనరుల కోసం జియోలాజికల్ సర్వేలు, బోర్లు వేయడం, సోలార్ పంపుసెట్లు అమర్చడం, ప్లాంటేషన్, డ్రిప్ ఇరిగేషన్ వంటి పనులు చేపట్టనున్నట్లు తెలిపారు. అవకాడో, వెదురు, దానిమ్మ, డ్రాగన్ ఫ్రూట్, అంజీర్ వంటి లాభదాయకమైన పంటల సాగు, ప్రకృతి వ్యవసాయంపై గిరిజనులకు అవగాహన కల్పించనున్నట్లు వెల్లడించారు. ఐటీడీఏ ప్రాజెక్టు, విద్యుత్, ఉద్యానవన శాఖల అధికారులు ఈ పథకాన్ని సమర్థవంతంగా అమలు చేయడంలో కీలక పాత్ర పోషిస్తారని భట్టి విక్రమార్క తెలిపారు.

ఈ సమీక్షా సమావేశంలో ఇంధన శాఖ ముఖ్య కార్యదర్శి సందీప్ కుమార్ సుల్తానియా, వ్యవసాయ శాఖ కార్యదర్శి రఘునందన్ రావు, గిరిజన సంక్షేమ శాఖ కార్యదర్శి శరత్, డిప్యూటీ సీఎం ప్రత్యేక కార్యదర్శి కృష్ణ భాస్కర్, ఇతర ఉన్నతాధికారులు పాల్గొన్నారు. ఈ పథకం ద్వారా గిరిజన రైతుల సాగునీటి సమస్య పరిష్కారం అవ్వడమే కాక.. వారి ఆర్థిక స్థితిగతులు కూడా మెరుగుపడతాయని ప్రభుత్వం భావిస్తోంది.