సైబర్ కేటుగాళ్ల కొత్త దందా,,,, సజ్జనార్ వార్నింగ్ ట్వీట్

భారత్- పాకిస్తాన్ సరిహద్దుల్లో తీవ్ర ఉద్రిక్తతలు చోటు చేసుకున్నాయి. ఇటీవల జరిగిన పహల్గాం ఉగ్రదాడికి ప్రతీకారంగా భారత్ 'ఆపరేషన్ సింధూర్' చేపట్టగా.. పాకిస్తాన్, పాక్ ఆక్రమిత కాశ్మీర్‌లోని ఉగ్ర స్థావరాలపై దాడులు నిర్వహించారు. ఈ దాడుల్లో దాదాపు 100 మంది ఉగ్రవాదులు హతమయ్యారు. దీనికి ప్రతిస్పందనగా.. పాకిస్తాన్ భారత భూభాగంలోని సైనిక స్థావరాలను లక్ష్యంగా చేసుకుని క్షిపణులు,డ్రోన్లతో దాడులకు ప్రయత్నించింది. అయితే భారత భద్రతా దళాలు పాకిస్తాన్ ప్రయత్నాలను సమర్థవంతంగా తిప్పికొట్టాయి. ఈ పరిణామాల నేపథ్యంలో రెండు దేశాల మధ్య తీవ్రమైన ఉద్రిక్త వాతావరణం నెలకొంది. సరిహద్దు ప్రాంతాల్లో భద్రతను కట్టుదిట్టం చేశారు.

అయితే భారత్-పాకిస్తాన్ సరిహద్దుల్లో నెలకొన్న ఉద్రిక్తతలను సైబర్ నేరగాళ్లు సొమ్ము చేసుకునేందుకు సిద్ధమయ్యారు. ప్రజల భయాందోళనలను ఆసరాగా చేసుకుని కొత్త తరహా మోసాలకు పాల్పడుతున్నారు. ఈ నేపథ్యంలో టీజీఎస్ఆర్టీసీ ఎండీ, వీసీ సజ్జనార్ శుక్రవారం 'ఎక్స్' వేదికగా ప్రజలను అప్రమత్తం చేశారు. సరిహద్దుల్లోని ఉద్రిక్త పరిస్థితులను వివరిస్తూ చేస్తూ, సైబర్ నేరగాళ్లు ఆర్మీ అధికారులమని నమ్మబలుకుతూ విరాళాలు అడుగుతున్నారని సజ్జనార్ తెలిపారు. ఇలాంటి నకిలీ ఆర్మీ అధికారుల పట్ల అప్రమత్తంగా ఉండాలని ఎటువంటి విరాళాల సందేశాలను గుడ్డిగా నమ్మి డబ్బులు పంపవద్దని ఆయన సూచించారు.

కేంద్ర ప్రభుత్వానికి చెందిన సైబర్ దోస్త్ విడుదల చేసిన ఒక ఫోటోను సజ్జనార్ షేర్ చేశారు. ఆ ఫోటోలో, కేంద్ర బలగాల పేరుతో కొందరు మోసగాళ్లు నకిలీ విరాళాలు సేకరిస్తున్నారని హెచ్చరించారు. ఎవరైనా విరాళం అడిగితే, నిజమైనదేనా అని పూర్తిగా విచారించుకోవాలని సూచించారు. ఒకవేళ అది నకిలీ విరాళాల అభ్యర్థన అనిపిస్తే వెంటనే దానిని రిపోర్ట్ చేయాలని cybercrime.gov.in వెబ్‌సైట్‌లో ఫిర్యాదు చేయాలని ఆయన కోరారు. సైబర్ నేరాల పట్ల ఆర్టీసీ ఎండీ సజ్జనార్ చేస్తున్న నిరంతర కృషిని పలువురు ప్రశంసిస్తున్నారు. ఉద్రిక్త పరిస్థితుల్లోనూ ప్రజలను చైతన్యవంతులను చేస్తున్న ఆయన ప్రయత్నం అభినందనీయమని కొనియాడుతున్నారు.