మరిన్ని ప్రపంచ ఈవెంట్లకు ప్లాన్-సీఎం రేవంత్ రెడ్డి

హైదరాబాద్ నగరం ప్రపంచ స్థాయి కార్యక్రమాలకు వేదికగా మారుతోందని ముఖ్యమంత్రి రేవంత్ రెడ్డి అన్నారు. నానక్‌రామ్‌గూడలో సోనాటా సాఫ్ట్‌వేర్ కొత్త క్యాంపస్‌ను ప్రారంభించిన సీఎం.. ఆ తర్వాత నిర్వహించిన సభలో మాట్లాడారు. మిస్ వరల్డ్ వంటి గొప్ప ఈవెంట్‌ను హైదరాబాద్‌ నగరంలో నిర్వహించడం గర్వకారణమన్నారు. భవిష్యత్తులో మరిన్ని అంతర్జాతీయ కార్యక్రమాలను నిర్వహించేందుకు తమ ప్రభుత్వం ప్రణాళికలు చేస్తోందని తెలిపారు.

'రైజింగ్ తెలంగాణ' ద్వారా ఆర్థికాభివృద్ధి, పెట్టుబడులు, ఉద్యోగాలు, మౌలిక సదుపాయాలు, సంక్షేమం సమతుల్యంగా కొనసాగుతోందని సీఎం రేవంత్ రెడ్డి వెల్లడించారు. ఒక ట్రిలియన్ డాలర్ల ఆర్థిక వ్యవస్థగా ఎదగడానికి, హైదరాబాద్‌ను అద్భుతమైన నగరంగా తీర్చిదిద్దడానికి అందరి సహకారం అవసరం అన్నారు. హైదరాబాద్ అన్ని రంగాల్లో దూసుకుపోతోందని.. నగరానికి బ్రాండ్ అంబాసడర్లుగా మారి విజయాలను ప్రపంచానికి చాటాలని పిలుపునిచ్చారు.

తెలంగాణ ప్రభుత్వం నిరుద్యోగులకు ఉపాధి అవకాశాలు కల్పిస్తూనే పరిశ్రమలకు మద్దతు ఇస్తోందని రేవంత్ రెడ్డి స్పష్టం చేశారు. హైదరాబాద్ సాఫ్ట్‌వేర్, లైఫ్ సైన్సెస్‌తో పాటు ఏఐ-రెడీ డేటా సెంటర్లు, తయారీ రంగాలకు గ్లోబల్ హబ్‌గా ఎదుగుతోందన్నారు. అనేక ప్రముఖ కంపెనీలు తమ క్యాంపస్‌లను విస్తరిస్తున్నాయని తెలిపారు. డిసెంబర్ 2023 నుండి ఇప్పటి వరకు రాష్ట్రానికి రూ.3 లక్షల కోట్ల పెట్టుబడులు వచ్చాయన్నారు. ఒక లక్షకు పైగా ఉద్యోగాలు సృష్టించామని వెల్లడించారు. 2025 దావోస్ సదస్సులో తెలంగాణ రూ.1.78 లక్షల కోట్ల పెట్టుబడులు సాధించి మొదటి స్థానంలో నిలిచిందని సీఎం గుర్తు చేశారు.

పోలీసింగ్, శాంతిభద్రతలు, ద్రవ్యోల్బణ నియంత్రణ, ఉద్యోగ సృష్టి, పన్ను వసూళ్లలో రాష్ట్రం అగ్రస్థానంలో ఉందని తెలిపారు. మహిళా స్వయం సహాయక బృందాలు, రాజీవ్ యువ వికాసం ద్వారా మహిళలు, యువత సాధికారత పొందుతున్నారని సీఎం రేవంత్ వెల్లడించారు. హైదరాబాద్ ట్రాఫిక్ ఫోర్స్‌లో ట్రాన్స్‌జెండర్ స్వచ్ఛంద సేవకులను నియమించిన మొదటి రాష్ట్రం తెలంగాణ అని ఆయన గర్వంగా తెలిపారు. డ్రై పోర్టు నిర్మాణం, ఏపీ పోర్టుతో అనుసంధానం, ఫ్యూచర్ సిటీలో ఏఐ నగరం, స్కిల్స్, స్పోర్ట్స్ యూనివర్సిటీల నిర్మాణం వంటి అభివృద్ధి పనులు జరుగుతున్నాయని సీఎం రేవంత్ రెడ్డి వివరించారు.