ఢిల్లీ సర్కార్ కీలక నిర్ణయం,,,,,తెలంగాణ భవన్‌లో మాజీ ప్రధాని పీవీ నరసింహారావు విగ్రహం

భారత మాజీ ప్రధాని, తెలుగు తేజం పాములపర్తి వెంకట నరసింహారావు (పీవీ నరసింహారావు) విగ్రహాన్ని ఢిల్లీలోని తెలంగాణ భవన్‌లో ఏర్పాటు చేయనున్నారు. ఈ మేరకు ఢిల్లీ ప్రభుత్వం కీలక నిర్ణయం తీసకుంది. పీవీ విగ్రహ ఏర్పాటుకు ఢిల్లీ మున్సిపల్ కార్పొరేషన్  ప్రతిపాదనలు సిద్ధం చేయగా.. ఢిల్లీ అర్బన్ ఆర్ట్ కమిషన్ ఆమోదం తెలిపింది. దీంతో అతి త్వరలోనే విగ్రహ నిర్మాణ పనులు ప్రారంభం కానున్నాయి.

పీ.వీ. నరసింహారావు మెమోరియల్ ఫౌండేషన్ గతేడాది ఏప్రిల్‌లోనే న్యూఢిల్లీ మున్సిపల్ కౌన్సిల్‌ కు లేఖ రాసింది. ఆంధ్ర భవన్ లేదా తెలంగాణ భవన్ ప్రాంగణంలో పీవీ విగ్రహాన్ని ఏర్పాటు చేయాలని కోరింది. విగ్రహాన్ని కాంస్యంతో తయారు చేయాలని, ఏపీ తొలి ముఖ్యమంత్రి టంగుటూరి ప్రకాశం పంతులు విగ్రహం పక్కన ఉంచాలని ప్రతిపాదించింది. ఈ ప్రతిపాదనను న్యూఢిల్లీ మున్సిపల్ కౌన్సిల్‌ ఈ ఏడాది మార్చి 27న జరిగిన సమావేశంలో చర్చకు తీసుకొచ్చింది. తాజాగా ఢిల్లీ అర్బన్ ఆర్ట్ కమిషన్ ఆమోదం లభించడంతో, తెలంగాణ భవన్‌లో పీవీ నరసింహారావు విగ్రహం ఏర్పాటుకు మార్గం సుగమమైంది. ఇది తెలుగు రాష్ట్రాల ప్రజలకు గర్వకారణం.

1921 జూన్ 28న తెలంగాణలోని కరీంనగర్ జిల్లాలో పీవీ నరసింహారావు జన్మించారు. ఆయనొక గొప్ప విద్యావేత్త, అనేక భాషల్లో ప్రావీణ్యం కలవారు. స్వాతంత్ర్య సమరయోధుడిగా, న్యాయవాదిగా, రాజకీయ నాయకుడిగా తనదైన ముద్ర వేశారు. 1991 నుండి 1996 వరకు భారతదేశానికి ప్రధానమంత్రిగా పనిచేశారు. దక్షిణ భారతదేశం నుంచి మొట్టమొదటి ప్రధానమంత్రి ఆయనే. 1991లో ఆర్థిక సరళీకరణ విధానాలను ప్రవేశపెట్టడం ద్వారా భారత ఆర్థిక వ్యవస్థను సంక్షోభం నుండి కాపాడారు.

పారిశ్రామిక లైసెన్సింగ్ రద్దు, దిగుమతి సుంకాలను తగ్గించడం, విదేశీ పెట్టుబడులను ప్రోత్సహించడం వంటి చర్యలు తీసుకున్నారు. భారతదేశపు అణు, క్షిపణి కార్యక్రమాలను ప్రోత్సహించారు. ఆయన పాలనలో జీడీపీ వృద్ధి రేటు గణనీయంగా పెరిగింది. విదేశీ మారక నిల్వలు పెరిగాయి. 2004 డిసెంబర్ 23న న్యూఢిల్లీలో మరణించారు. మరణానంతరం 2024లో ఆయనకు భారతదేశపు అత్యున్నత పౌర పురస్కారం భారతరత్న లభించింది.