ఇంజినీరింగ్ విద్యార్థులకు షాక్: ఫీజుల పెంపుపై తెలంగాణ ప్రభుత్వ కొత్త నిబంధనలు

తెలంగాణ ప్రభుత్వం రాష్ట్రంలోని ఇంజినీరింగ్‌ మరియు వృత్తి విద్యా కళాశాలల ఫీజు నిర్మాణంలో మార్పులు తీసుకొచ్చేందుకు కీలక చర్యలు చేపట్టింది. ఇప్పటి వరకు ప్రధానంగా కళాశాలల ఆర్థిక స్థితిని ఆధారంగా తీసుకుని ఫీజు నిర్మాణాన్ని నిర్దేశిస్తే, ఇకపై విద్యా ప్రమాణాలు కూడా అంతే ముఖ్యంగా పరిగణనలోకి తీసుకోనున్నారు. ఈ మేరకు సంబంధిత శాఖ అధికారిక ఉత్తర్వులు జారీ చేసింది.ప్రభుత్వం వెల్లడించిన సమాచారం ప్రకారం, కళాశాలల పనితీరును విశ్లేషించడంలో కొన్ని ముఖ్యమైన అంశాలు కీలక పాత్ర పోషించనున్నాయి. విద్యార్థుల హాజరు శాతం మొదటి ప్రాధాన్యతగా ఉండగా, ఫేషియల్ రికగ్నిషన్‌ టెక్నాలజీ అమలును కూడా పరీక్షిస్తారు. అదేవిధంగా, ఆధార్ ఆధారిత ఫీజు చెల్లింపు విధానం, పరిశోధనలకు ఇచ్చే ప్రోత్సాహం, అర్హత కలిగిన అధ్యాపకులు, నూతన ల్యాబ్‌లు మరియు లైబ్రరీ వసతులు వంటి విద్యా మౌలిక సదుపాయాలు కూడా సమగ్రంగా పరిశీలనకు లోనవుతాయి.ఈ విధంగా, కళాశాలలు విద్యా ప్రమాణాల్లో మెరుగైన పనితీరు చూపించగలిగితేనే ఫీజు పెంపుకు అర్హత పొందుతాయని ప్రభుత్వం స్పష్టంగా తెలిపింది.ఈ వివరాలను సమగ్రంగా పరిశీలించిన తరువాతే ప్రతి కళాశాలకు అనుగుణంగా ఫీజును నిర్ణయిస్తారు.ఫలితాలు, ప్లేస్‌మెంట్‌లు కీలకంకళాశాలలో విద్యార్థుల ప్లేస్‌మెంట్‌ శాతం, డిమాండ్ ఉన్న కోర్సులు, మరియు పరిక్షల్లో ప్రదర్శించే ఫలితాలు కూడా ఫీజుల పరంగా ప్రభావితం చేస్తాయి. మంచి ఫలితాలు చూపే సంస్థలకు మాత్రమే తగినంతగా అధిక ఫీజు వసూలు చేసే అవకాశం ఉంటుందని ప్రభుత్వం పేర్కొంది.తెలంగాణ ప్రభుత్వం తీసుకొచ్చిన కొత్త ఫీజు విధానం ప్రకారం, నిబంధనలు పాటించని కళాశాలలకు ఇకపై ఉపశమనముండదని అధికారులు స్పష్టం చేశారు. జాతీయ, అంతర్జాతీయ స్థాయిలో కళాశాలకు లభించిన ర్యాంకింగ్‌లు, అలాగే ప్రభుత్వ నిబంధనల అమలులో చూపే సమగ్రత కూడా ఫీజుల నిర్ణయానికి కీలకంగా మారనుంది. నిబంధనలను గౌరవించని కళాశాలలకు అధిక ఫీజులను అనుమతించకూడదనే దృక్పథంతో ప్రభుత్వం ముందుకెళ్తోంది.ఈ విధానం ద్వారా విద్యార్థులకు నేరుగా ప్రయోజనం కలుగుతుందని నిపుణుల అభిప్రాయం. అధిక ఫీజులు వసూలు చేయాలంటే, ప్రతి సంస్థ విద్యా నాణ్యతను మెరుగుపర్చడం తప్పనిసరిగా మారుతుంది. దీనివల్ల కళాశాలల మధ్య నాణ్యమైన విద్య కోసం ఆరోగ్యకరమైన పోటీ చిగురించనుందని భావిస్తున్నారు. ఇది విద్యా రంగంలో నాణ్యత ప్రమాణాలను కొత్త స్థాయికి తీసుకెళ్లే అవకాశం కల్పిస్తుంది.ఇంతటితో కాదు, రాబోయే రోజుల్లో ఫీజుల నిర్ణయంలో NBA, NAAC వంటి అక్వ్రిడిటేషన్ సంస్థల ప్రమాణాలతో పాటు పరిశ్రమలతో భాగస్వామ్యం, స్టార్ట్‌అప్స్‌కు ప్రోత్సాహం వంటి అంశాలనూ ప్రభుత్వమే పరిగణనలోకి తీసుకోనుందని సంకేతాలు వెలువడుతున్నాయి. ఈ మార్గంలో విద్యా రంగంలో పారదర్శకతను పెంచుతూ, వాణిజ్య ధోరణిని తగ్గించాలన్నదే ప్రభుత్వ లక్ష్యంగా కనిపిస్తోంది.