న్యూ ట్రెండ్.. బర్త్ డే సెలబ్రేషన్స్

ఈరోజుల్లో వేడుకలు అంటే కేవలం ఆహారం, అలంకరణ, సంగీతం మాత్రమే కాదు.. ప్రతి ఒక్కరూ తమ వేడుకను ప్రత్యేకంగా జరుపుకోవాలని కోరుకుంటారు. పుట్టినరోజు వేడుకలు, పెళ్లిళ్లు, బేబీ సెర్మనీలు, ఫంక్షన్లు.. ఏ సందర్భమైనా అతిథులకు చిన్న బహుమతులు ఇవ్వడం ఒక సంప్రదాయం. గతంలో చాక్లెట్లు లేదా స్వీట్లు పంచేవారు. కానీ ఇప్పుడు ఆ సంప్రదాయం కొత్త రూపం దాల్చింది. ఫోటో ప్రింటెడ్ చాక్లెట్లు అనే ట్రెండ్ చుట్టాలకు, ఫంక్షన్‌కు వచ్చిన బంధులవులకు ఒక వినూత్న అనుభవాన్ని ఇస్తోంది.

చాక్లెట్ అంటే రుచికరమైన తీపి మాత్రమే అని అనుకునే రోజులు పోయాయి. ఇప్పుడు అది ఒక మధుర జ్ఞాపకంగా మారింది. ఉదాహరణకు.. పుట్టినరోజు చేసుకునే చిన్నారి ఫోటోతో ఉన్న చాక్లెట్లు ఇచ్చినప్పుడు బంధువులు లేదా స్నేహితులు ఆ వేడుకను సులభంగా గుర్తుంచుకుంటారు. పెళ్లిళ్లలో వరుడు-వధువు ఫోటోతో ముద్రించిన గిఫ్ట్‌లు బహుమతిగా ఇస్తే.. అది సాధారణ గిఫ్ట్ కంటే ప్రత్యేకంగా అనిపిస్తుంది. బేబీ సెర్మనీల్లో పసిపాప ఫోటోతో చాక్లెట్లు ఇవ్వడం తల్లిదండ్రుల ప్రేమను, ఆ వేడుకలోని ఆనందాన్ని చాటుతుంది.

ఫోటో ప్రింటెడ్ చాక్లెట్ల ధర ఒక్కొక్కటి రూ. 5 నుంచి రూ. 20 వరకు ఉంటుంది. కనీసం 100 చాక్లెట్ల ఆర్డర్ నుంచి మాత్రమే తయారు చేస్తారు. ఆర్డర్ చేసేటప్పుడు కస్టమర్ ఫోటో, డిజైన్ లాంటివి వాట్సాప్ ద్వారా పంపిస్తే, వాటినే కవర్‌పై ప్రింట్ చేస్తారు. ఎక్కువగా ఇన్‌స్టాగ్రామ్, యూట్యూబ్ పేజీల ద్వారా వారిని సంప్రదించి ఆర్డర్ ఇవ్వాల్సి ఉంటుంది.

కస్టమైజ్డ్ గిఫ్టుల విభాగం..

ఈ వ్యాపారులు కేవలం చాక్లెట్లకే పరిమితం కాకుండా మరిన్ని వినూత్న ఉత్పత్తులు అందిస్తున్నారు. స్ట్రింగ్ థ్రెడ్ పోర్ట్రెయిట్ ఆర్ట్, బేబీ సెర్మనీ నేమ్ రివీల్, 3D బాక్స్ ఫ్రేమ్‌లు, స్ట్రింగ్ థ్రెడ్ నేమ్‌ప్లేట్లు, పర్ల్ బాక్స్ ఫ్రేమ్‌లు, మనీ కార్డులు, సొంపు బాక్స్ వంటి బహుమతులు కూడా అందుబాటులో ఉన్నాయి.

ఒక సాధారణ చాక్లెట్‌ను ఈ విధంగా వ్యక్తిగత రూపంలో ఇవ్వడం వల్ల అతిథులకు మరపురాని అనుభూతి కలుగుతుంది. రుచి మాత్రమే కాదు.. దానిపై ముద్రించిన ఫోటో చూసి ఆ వేడుక మధురంగా గుర్తుకు వస్తుంది. ఇది సాంప్రదాయ బహుమతులకు ఆధునికతను జోడించినట్లే అవుతుంది. భవిష్యత్తులో ఈ వ్యాపారం మరింత విస్తరించే అవకాశం ఉంది. పాఠశాల వార్షికోత్సవాలు, కార్పొరేట్ ఈవెంట్స్, సీజనల్ ఫెస్టివల్స్‌లో కూడా ఈ ఫోటో చాక్లెట్లు బహుమతులుగా ఇవ్వబడుతున్నాయి. తక్కువ ఖర్చుతో ఎక్కువ ఆకర్షణ కలిగించడం వీటి ప్రత్యేకతగా చెప్పుకోవచ్చు.