మీకు కావాల్సిన బైక్ తక్కువ ధరలో కొనుక్కోవచ్చు ఇక్కడ

కూరగాయలు, పశువులు, మేకలు లాంటి సంతలను ఇప్పటి వరకు మనం చూశాము.. విన్నాము. కానీ కామారెడ్డి జిల్లాలో గత ఆరు సంవత్సరాల నుంచి ఇక్కడ ప్రతీ గురువారం ఓ విచిత్రమైన సంతను నిర్వహిస్తున్నారు. అదే బైక్‌ల సంత. ఇది విన్నవారికి.. చూసిన వారికి ఎంతో ప్రత్యేక ఆకర్షణగా నిలుస్తోంది. సీఎస్‌ఐ చర్చి మైదానంలో జరుగుతున్న ఈ అంగడిలో వివిధ గ్రామాల నుంచి వ్యాపారులు, కొనుగోలుదారులు హాజరవుతారు.

ఇక్కడ అమ్మకానికి వచ్చే ద్విచక్ర వాహనాలను ముందుగా నిర్వాహకులు పత్రాలు పరిశీలించి.. అన్నీ చట్టబద్ధంగా ఉన్నాయో లేదో ధృవీకరించాకే మార్కెట్‌లో ఉంచుతారు. దీనికోసం వాహన యజమానుల నుండి కేవలం రూ.50 ఫీజు వసూలు చేస్తారు. ఈ ప్రక్రియతో వినియోగదారులు నమ్మకంగా వాహనాలను కొనుగోలు చేసే అవకాశం పొందుతున్నారు. ధరపై చర్చించి ఇష్టమైన బైక్‌ను సొంతం చేసుకోవడం ఇక్కడి ప్రత్యేకత.

నిర్వాహకుడు ప్రతి ట్రాన్సాక్షన్‌పై స్వల్ప కమీషన్ తీసుకుంటారు. దీని వల్ల మార్కెట్ క్రమపద్ధతిలో కొనసాగుతుంది. ప్రతీ వారమూ 40 నుండి 50 బైక్‌లు ఇక్కడ అమ్ముడవుతుంటాయి. ముఖ్యంగా గ్రామీణ ప్రాంతాల నుండి రైతులు, కార్మికులు తక్కువ ధరలో వాహనం కొనుగోలు చేసేందుకు ఈ బైక్ బజార్‌ను ఆశ్రయిస్తున్నారు. కొత్త బైక్‌లు కొనలేని యువత కూడా ఇక్కడి ద్విచక్ర వాహనాలను ఎంచుకుంటున్నారు.

ఈ సంతతో స్థానిక ఆర్థిక వ్యవస్థకు ఊతం లభిస్తోంది. పాత వాహనాల విక్రయం మాత్రమే కాకుండా.. అక్కడే ఉన్న టీ దుకాణాలు, ఫుడ్ స్టాళ్లు కూడా ఆదాయం పొందుతున్నాయి. కొనుగోలుదారులు ఒకచోట అనేక వాహనాలను చూసి పోల్చుకునే అవకాశం కలిగించడం ఈ మార్కెట్ ప్రత్యేకత. అంటే వివిధ రకాలు కంపెనీల బైక్స్ ఒకే దగ్గర దర్శనం ఇవ్వడంతో వినియోగదారుడు తనకు నచ్చిన బైక్స్ కొనుగోలు చేయవచ్చు. వీటి ధరలు కూడా చాలా తక్కువగా ఉంటాయిన అక్కడి నిర్వాహకులు చెబుతున్నారు. బైక్ మోడల్ ను బట్టి.. ధరలు ఉంటాయని పేర్కొన్నారు.

ఇలాంటి సంతలు ఒక రకంగా సెకండ్‌ హ్యాండ్ వాహన మార్కెట్‌ను గ్రామీణ స్థాయిలో బలోపేతం చేస్తున్నాయడలో ఎలాంటి సందేహం లేదు. భవిష్యత్తులో ఈ సంతను మరింత విస్తరించి.. రిజిస్ట్రేషన్ ఫెసిలిటీ, బీమా పునరుద్ధరణ, తక్షణ రిపేర్ సర్వీసులు కల్పిస్తే మరింత మంది ప్రజలకు ఉపయోగకరంగా మారుతుంది.