టాలీవుడ్‌కు సమర్థవంతమైన పర్యవేక్షణ యంత్రాంగం ఏర్పాటు

తెలుగు సినీ పరిశ్రమలో తరచూ తలెత్తుతున్న వివాదాలకు శాశ్వత పరిష్కారం చూపే దిశగా తెలంగాణ ప్రభుత్వం దృష్టి సారించింది. పరిశ్రమ కార్యకలాపాలను పర్యవేక్షించేందుకు ఒక సమర్థవంతమైన యంత్రాంగాన్ని ఏర్పాటు చేయాలని ముఖ్యమంత్రి రేవంత్ రెడ్డి ప్రతిపాదించారు. నిర్మాతలు, కార్మికులు, ప్రభుత్వ భాగస్వామ్యంతో ఒక ఉమ్మడి విధానాన్ని రూపొందించాల్సిన అవసరం ఉందని ఆయన అభిప్రాయపడ్డారు.ఆదివారం తెలంగాణ రాష్ట్ర చలనచిత్ర అభివృద్ధి సంస్థ ఛైర్మన్, ప్రముఖ నిర్మాత దిల్ రాజు నేతృత్వంలో పలువురు టాలీవుడ్ నిర్మాతలు, దర్శకులు ముఖ్యమంత్రి రేవంత్ రెడ్డితో ఆయన నివాసంలో సమావేశమయ్యారు. ఇటీవల సినీ కార్మికులు చేపట్టిన సమ్మెను ముఖ్యమంత్రి జోక్యంతో విరమించిన నేపథ్యంలో ఈ భేటీకి ప్రాధాన్యత ఏర్పడింది.ఈ సందర్భంగా సీఎం మాట్లాడుతూ సినీ పరిశ్రమలో సానుకూల వాతావరణం ఉండటం చాలా ముఖ్యమని అన్నారు. కార్మికుల సమస్యల పరిష్కారానికి వారితో కూడా చర్చలు జరుపుతామని హామీ ఇచ్చారు. “సినిమా తెలంగాణకు ఒక ముఖ్యమైన పరిశ్రమ. సమ్మెల వంటి సమస్యలతో దాని కార్యకలాపాలకు ఆటంకం కలగకుండా చూడాల్సిన బాధ్యత ప్రభుత్వానిది. నిర్మాతలు, కార్మికుల సంబంధాల్లో సంస్కరణలు రావాలి. నిర్మాతలు కార్మికుల పట్ల మానవత్వంతో వ్యవహరించాలి” అని ఆయన సూచించారు.పరిశ్రమలో దీర్ఘకాలిక అవసరాలు, సంస్కరణలను వివరిస్తూ ఒక శ్వేతపత్రం సిద్ధం చేస్తామని సీఎం తెలిపారు. చట్టానికి లోబడి అందరూ పనిచేయాలని, పరిశ్రమలో గుత్తాధిపత్యాన్ని లేదా వ్యవస్థలను నియంత్రించే ప్రయత్నాలను ప్రభుత్వం సహించబోదని ఆయన స్పష్టం చేశారు. వివాదాల్లో ప్రభుత్వం నిష్పక్షపాతంగా వ్యవహరిస్తూ, అన్ని వర్గాలకు న్యాయం జరిగేలా చూస్తుందని సినీ ప్రముఖులకు భరోసా ఇచ్చారు.తెలుగు సినిమాను ప్రపంచ వేదికపై నిలబెట్టడమే తమ ప్రభుత్వ లక్ష్యమని రేవంత్ రెడ్డి పునరుద్ఘాటించారు. తెలంగాణలో మరిన్ని తెలుగు చిత్రాల షూటింగ్‌లను ప్రోత్సహించాలన్నారు. నూతనంగా పరిశ్రమలోకి వచ్చేవారికి నైపుణ్య శిక్షణ అందించేందుకు ప్రత్యేక కార్పస్ ఫండ్ ఏర్పాటు చేస్తామని, రాబోయే స్కిల్ యూనివర్సిటీలో సినీ రంగానికి అవసరమైన ప్రత్యేక శిక్షణా సౌకర్యాలు కల్పిస్తామని ఆయన వివరించారు.ఈ సమావేశంలో ప్రముఖ నిర్మాతలు అల్లు అరవింద్, డి. సురేశ్‌ బాబు, జెమినీ కిరణ్, శ్రవంతి రవికిషోర్, డీవీవీ దానయ్య, అనిల్ సుంకర, శరత్ మరార్‌తో పాటు దర్శకులు త్రివిక్రమ్ శ్రీనివాస్, బోయపాటి శ్రీను, సందీప్ రెడ్డి వంగ, వంశీ పైడిపల్లి, అనిల్ రావిపూడి తదితరులు పాల్గొన్నారు.