ఈ రోజు ఎంతో సంతోషంగా ఉందన్న మంత్రి కోమటిరెడ్డి

నల్గొండ ప్రభుత్వ సాధారణ ఆసుపత్రిలో కొత్త అధ్యాయాన్ని రాసే విధంగా ఆధునిక లాప్రోస్కోపీ యూనిట్ ప్రారంభమైంది. ఈ యూనిట్‌ను కోమటిరెడ్డి ప్రతీక్ ఫౌండేషన్ ఆధ్వర్యంలో ఏర్పాటు చేసి.. పద్మ విభూషణ్ గ్యాస్ట్రోఎంటరాలజీ నిపుణులు డా. నాగేశ్వర్ రెడ్డి, డా. జీవీ రావు సమక్షంలో.. రాష్ట్ర రహదారుల మరియు భవనాల శాఖ మంత్రి కోమటిరెడ్డి వెంకట్ రెడ్డి ప్రారంభించారు. ఈ సందర్భంగా మంత్రి మాట్లాడుతూ.. “ప్రజలకు నాణ్యమైన ఆరోగ్య సేవలు అందించడమే నా ప్రధాన లక్ష్యం. నల్గొండ, పరిసర గ్రామాల్లో ప్రజలు ఖరీదైన లాప్రోస్కోపీ సర్జరీ కోసం హైదరాబాద్ లేదా ఇతర నగరాలకు వెళ్లాల్సిన అవసరం లేకుండా ఇప్పుడు స్థానికంగానే ఈ సేవలు పొందగలరు” అని తెలిపారు.

లాప్రోస్కోపీ సర్జరీలు అంటే చిన్న రంధ్రాల ద్వారా నిర్వహించే ఆధునిక శస్త్రచికిత్సలు. ఇవి రోగులకు తక్కువ నొప్పి, తక్కువ రక్తస్రావం, తక్కువ ఇన్ఫెక్షన్ ప్రమాదం కలిగించడంతో పాటు తక్కువ రోజుల్లోనే కోలుకునే అవకాశం కల్పిస్తాయి. అందువల్ల ఈ సాంకేతికతను “మినిమల్లీ ఇన్వేసివ్ సర్జరీ” అని కూడా పిలుస్తారు. నల్గొండలో ఇలాంటి సదుపాయం అందుబాటులోకి రావడం వైద్యరంగంలో ఒక పెద్ద ముందడుగు అని వైద్య నిపుణులు అభిప్రాయపడ్డారు.

కోమటిరెడ్డి ప్రతీక్ ఫౌండేషన్ తరఫున ఇప్పటికే అనేక సామాజిక సేవా కార్యక్రమాలు నిర్వహించబడ్డాయి. ఈసారి ఆరోగ్య రంగంపై ప్రత్యేక దృష్టి సారించి, ప్రభుత్వ ఆసుపత్రుల్లో ఆధునిక వైద్య పరికరాలు, కొత్త విభాగాలు ఏర్పాటు చేసే దిశగా కృషి కొనసాగుతుందని మంత్రి స్పష్టం చేశారు. “ప్రైవేట్ ఆసుపత్రులు మాత్రమే కాకుండా ప్రభుత్వ ఆసుపత్రుల్లో కూడా ఉత్తమ సదుపాయాలు ఉండాలి. పేద, మధ్యతరగతి ప్రజలు కూడా అధునాతన వైద్యం పొందగలగాలి” అని అన్నారు. వైద్య రంగంలో విశిష్ట సేవలందిస్తున్న డా. నాగేశ్వర్ రెడ్డి, జివి రావు గారితో కలిసి ఈ కార్యక్రమంలో పాల్గొనడం నాకు ఎంతో సంతోషం కలిగించిందని మంత్రి తన ఆనందాన్ని వ్యక్తం చేశారు.

ఇక ఇదే కార్యక్రమంలో పాల్గొన్న డా. నాగేశ్వర్ రెడ్డి మాట్లాడుతూ.. గ్రామీణ ప్రాంతాల్లో అధునాతన చికిత్స అందించడం సమాజానికి గొప్ప సహకారం అని.. ఇలాంటి యూనిట్లు మరిన్ని జిల్లాల్లో స్థాపించబడాలని ఆకాంక్షించారు. నల్గొండ GGHలో లాప్రోస్కోపీ యూనిట్ ప్రారంభం కావడంతో.. భవిష్యత్తులో వందలాది రోగులు స్థానికంగానే నిపుణుల సలహాలు, శస్త్రచికిత్సలు పొందే అవకాశం ఉంది.