ఆ జిల్లాలో మేక మాంసం పేరుతో దారుణం

జగిత్యాల జిల్లాలో ప్రజల ఆరోగ్యాన్ని ప్రమాదంలోకి నెట్టిన ఒక సంఘటన సంచలనాత్మకం అయింది. ఇబ్రహీంపట్నం మండలంలోని వర్షకొండ గ్రామంలో.. అనారోగ్యంతో చనిపోయిన మేక మాంసాన్ని కోసి విక్రయించిన ఘటన స్థానికుల్లో ఆగ్రహం రేపింది. ఆదివారం కావడంతో గ్రామస్తులు మటన్ కొనుగోలు చేసుకున్నారు. అయితే వండే సమయంలో దుర్వాసన రావడంతో నిజం బయటపడింది. గ్రామస్థులు వెంటనే కమిటీకి సమాచారం అందించగా.. పోలీసులు సంఘటనా స్థలానికి చేరుకుని ఆ మాంసాన్ని స్వాధీనం చేసుకొని నిర్వీర్యం చేశారు.

భయాందోళనలో ప్రజలు..

ఈ సంఘటనతో ప్రజలు తీవ్ర ఆందోళనకు గురయ్యారు. ఒకవైపు వారాంతం కావడంతో ఇంట్లో వండుకుని తినాలని అనుకున్న కుటుంబాలు, బయట హోటళ్లలో భోజనం చేయాలని భావించిన వారు భయాందోళనకు లోనయ్యారు. సోషల్ మీడియాలో ఈ సంఘటనకు సంబంధించిన వీడియోలు వైరల్ కావడంతో పరిసర గ్రామాల ప్రజలు మరింత అప్రమత్తమయ్యారు. కొన్ని గ్రామ కమిటీలు డప్పు చాటింపు ద్వారా ప్రజలకు హెచ్చరికలు కూడా జారీ చేశాయి. చాలా వరకు ఉమ్మడి కరీంనగర్ జిల్లాలోని మాంసం మార్కెట్లు నియంత్రణ లేకుండా సాగుతున్నాయి.

ఎక్కువ శాతం మేకలు, గొర్రెలు అధికారిక వధశాలల్లో కాకుండా బహిరంగ ప్రదేశాల్లోనే వధ చేస్తున్నారు. వాటికి ఎలాంటి వెటర్నరీ పరీక్షలు లేకుండా మాంసం మార్కెట్‌లోకి వస్తోంది. దీనివల్ల అనారోగ్యకరమైన మాంసం వినియోగదారుల భోజనంలో చేరిపోతుంది. ప్రతిరోజూ వేలాది జంతువులు వధ అవుతున్నప్పటికీ అధికారుల నిర్లక్ష్యం కారణంగా ఈ పరిస్థితి కొనసాగుతోంది. నిబంధనల ప్రకారం వెటర్నరీ అధికారులు ఆరోగ్య పరీక్షలు నిర్వహించాలి, మున్సిపల్ శాఖ స్టాంపింగ్ చేయాలి. కానీ ఈ విధానం సరిగా అమలు కావడం లేదు. దీంతో చనిపోయిన జంతువుల మాంసం కూడా అమ్మబడుతున్నదనే ఆరోపణలు వినిపిస్తున్నాయి. ఈ సంఘటన ప్రజలకు హెచ్చరికలా మారిపోయింది. ఆరోగ్య రక్షణ కోసం అధికారులు కఠిన చర్యలు తీసుకోవాల్సిన అవసరం ఎంతైనా ఉంది. లేదంటే ఇలాంటి సంఘటనలు పునరావృతమై, ప్రజల ప్రాణాలను ప్రమాదంలోకి నెట్టే అవకాశం ఉంది.