తెలంగాణలో గ్రామ పంచాయతీ ఎన్నికలు సమీపంలో – నోటిఫికేషన్‌తో వేడి!

2024 జనవరి 31న తెలంగాణలో సర్పంచుల పదవీకాలం ముగిసిన సంగతి తెలిసిందే. అప్పటి నుంచి ఇప్పటికే సుమారు ఒకటిన్నరేళ్లు గడిచినా, గ్రామ పంచాయతీ ఎన్నికల నిర్వహణ మాత్రం ఆలస్యమవుతోంది.ఇందులో భాగంగా తాజాగా రాష్ట్ర ఎన్నికల సంఘం కీలక అప్డేట్‌ను విడుదల చేసింది. గ్రామ పంచాయతీ ఎన్నికల నిర్వహణకు సంబంధించి పోలింగ్ కేంద్రాల ఏర్పాటుతో పాటు తుది ఓటర్ల జాబితా విడుదల కోసం నోటిఫికేషన్ విడుదల చేసింది. స్థానిక సంస్థల ఎన్నికలపై దాఖలైన పిటిషన్ల విషయంలో, తెలంగాణ హైకోర్టు ఈ ఏడాది జూన్ 25న తుది తీర్పును ప్రకటించిన సంగతి తెలిసిందే. మూడు నెలల్లో గ్రామ పంచాయతీ ఎన్నికలు నిర్వహించాలని హైకోర్టు రాష్ట్ర ప్రభుత్వానికి, ఎన్నికల సంఘానికి ఆదేశాలు జారీ చేసింది. వీలైనంత త్వరగా, 30 రోజుల్లో వార్డుల విభజన పూర్తి చేయాలని కోర్టు సూచించింది.ఇప్పటికే సర్పంచుల పదవీకాలం ముగిసి ఒకటిన్నరేళ్లు అయినప్పటికీ, ప్రభుత్వం ఎన్నికల నిర్వహణలో జాప్యం చేస్తోందని పేర్కొంటూ 6 పిటిషన్లు హైకోర్టులో దాఖలయ్యాయి. సర్పంచుల పాలన లేకపోవడంతో గ్రామాల అభివృద్ధి ఆగిపోయిందని, బీఆర్‌ఎస్ మరియు బీజేపీ పార్టీలు ఆరోపిస్తున్న సంగతి తెలిసిందే.ఈ కేసుపై జస్టిస్ టి. మాధవీదేవి తీర్పు ఇచ్చారు. మొదటగా, పిటిషనర్ల తరఫున న్యాయవాదులు వాదనలు వినిపించారు. సర్పంచుల పదవీకాలం ముగిసిన తర్వాత కూడా ఎన్నికలు నిర్వహించకపోవడం, రాజ్యాంగం మరియు తెలంగాణ పంచాయతీరాజ్ చట్టాలకు విరుద్ధమని పేర్కొన్నారు. సర్పంచులను తప్పించి పంచాయతీల బాధ్యతను ప్రత్యేక అధికారులకు అప్పగించడం వల్ల ప్రజల సమస్యలు పరిష్కారం కావడంలేదని వాదించారు. వారు ఇతర బాధ్యతల్లో ఉండటంతో గ్రామాలపై సమగ్ర దృష్టి పెట్టలేకపోతున్నారని వెల్లడించారు.ఇక రాష్ట్ర ఆర్థిక సంఘం నుంచి నిధులు వస్తాయని చెప్పిన ప్రభుత్వ హామీపై ఆధారపడి, చాలా మంది సర్పంచులు తమ సొంత నిధులతో అభివృద్ధి పనులు చేపట్టారని పేర్కొన్నారు. ప్రస్తుతం నిధుల కొరత వల్ల వారు తీవ్ర ఇబ్బందులు పడుతున్నారని తెలిపారు. కేంద్ర ప్రభుత్వ పథకాల కింద రావాల్సిన నిధులు కూడా రాకపోవడం వల్ల పరిస్థితి మరింత సంక్లిష్టంగా మారిందని చెప్పారు.దీని నేపథ్యంలో, తక్షణమే గ్రామ పంచాయతీ ఎన్నికలు నిర్వహించాలని లేదా పాత సర్పంచులకు బాధ్యతలు అప్పగించాలని పిటిషనర్లు కోరారు. వాదనలు పరిశీలించిన హైకోర్టు తుది తీర్పు ఇచ్చింది. ఆ తీర్పు మేరకు రాష్ట్ర ఎన్నికల సంఘం ఎన్నికల నిర్వహణకు సిద్ధమవుతోంది.