తెలంగాణకు మరో నాలుగు కేంద్రీయ విద్యాలయాలు

తెలంగాణ రాష్ట్రంలోని విద్యా రంగం బలోపేతానికి కేంద్ర ప్రభుత్వం అదనపు చేయూతను అందించింది. రాష్ట్రానికి కొత్తగా నాలుగు కేంద్రీయ విద్యాలయాలను మంజూరు చేసినట్లు కేంద్ర మంత్రి కిషన్ రెడ్డి వెల్లడించారు. ఈ నిర్ణయం రాష్ట్రంలోని వెనుకబడిన ప్రాంతాల విద్యార్థులకు ఉత్తమ విద్యను అందించడంలో కీలక పాత్ర పోషిస్తుంది.

రాష్ట్రానికి నాలుగు కొత్త కేంద్రీయ విద్యాలయాలు

ఇప్పటికే తెలంగాణలో ఉన్న 35 కేంద్రీయ విద్యాలయాలకు ఈ నాలుగు కొత్త పాఠశాలలు తోడవుతాయి. మారుమూల ప్రాంతాల్లో ప్రాథమిక స్థాయి నుంచి సెకండరీ స్థాయి వరకు నాణ్యత కలిగిన విద్య అందుబాటులోకి వస్తుంది. ఈ కొత్త విద్యాలయాలు ఏర్పాటు కానున్న ప్రాంతాలు ఇలా ఉన్నాయి.

భద్రాద్రి కొత్తగూడెం జిల్లా కేంద్రం.. ఇది ఆకాంక్షాత్మక జిల్లా పరిధిలో ఉన్నందున, స్థానిక విద్యార్థులకు ఇది ఎంతో ప్రయోజనకరం. ములుగు జిల్లా కేంద్రం.. ఇది గిరిజన ప్రాంతం కావడంతో, గిరిజన విద్యార్థులకు కేంద్ర విద్యా ప్రమాణాలు లభిస్తాయి. జగిత్యాల జిల్లా - చెల్గల్ (జగిత్యాల రూరల్ మండలం).. ఈ ప్రాంతంలోని విద్యార్థులకు మెరుగైన పాఠశాల విద్యను అందుబాటులోకి తెస్తుంది. వనపర్తి జిల్లా - నాగవరం శివార్.. ఇక్కడి విద్యార్థులు కూడా కేంద్ర ప్రభుత్వ పాఠశాలల్లో చదువుకునేందుకు అవకాశం దక్కుతుంది. కేంద్ర మంత్రి ఈ సందర్భంగా ప్రధానమంత్రి నరేంద్ర మోదీ, కేంద్ర విద్యాశాఖ మంత్రి ధర్మేంద్ర ప్రధాన్ కు కృతజ్ఞతలు తెలియజేశారు.

కేంద్రీయ విద్యాలయాల మంజూరుతో పాటు.. గత రెండు సంవత్సరాలలో తెలంగాణకు కేంద్రం విద్యాభివృద్ధి కోసం భారీగా నిధులను కేటాయించింది.

పీఎం-శ్రీ స్కూల్స్.. రాష్ట్రంలో నాణ్యమైన సెకండరీ విద్యా ప్రమాణాలు పెంచడానికి రూ. 400 కోట్ల వ్యయంతో 832 పీఎం-శ్రీ స్కూల్స్‌ను కేంద్రం ఆమోదించింది. పీఎం-శ్రీ స్కూల్స్ ఇన్ తెలంగాణ దేశవ్యాప్తంగా ఎక్కువ నిధులు అందుకున్న రాష్ట్రాలలో ఒకటిగా నిలిచింది. సమగ్ర శిక్షా అభియాన్ .. ఈ పథకం కింద పాఠశాల విద్యా అభివృద్ధికి సుమారు రూ. 2,000 కోట్లకు పైగా నిధులను కేటాయించింది.

సెంట్రల్ ట్రైబల్ యూనివర్సిటీ: ములుగు జిల్లాలో సమ్మక్క, సారక్క సెంట్రల్ ట్రైబల్ యూనివర్సిటీ ఏర్పాటు కోసం రూ. 1,000 కోట్లతో పనులు ప్రారంభించనుంది. ములుగు సమ్మక్క సారక్క కేంద్రీయ గిరిజన విశ్వవిద్యాలయం గిరిజన యువత ఉన్నత విద్యకు ఒక గొప్ప అవకాశంగా మారుతుంది. ఇప్పటికే చుట్టూ గోడ నిర్మాణానికి పనులు ప్రారంభం అయిన విషయం తెలిసిందే.