60 ఫీట్లతో కొడంగల్‌లో ఎట్టకేలకు రోడ్డు విస్తరణ

ప్రస్తుతం రాష్ట్రంలో రోడ్ల విస్తరణ పనులు జోరందుకుంటున్నాయి. హైదరాబాద్, ఇతర జిల్లా కేంద్రాలతో పాటుగా గ్రామాల్లో కూడా రోడ్ల అభివృద్ధి పనులు చేస్తున్నారు. దీని కోసం భారీగా నిధులు కేటాయిస్తున్నారు. ఇప్పుడు సీఎం రేవంత్ సొంత నియోజకవర్గం కూడా ఈ జాబితాలో చేరింది. కొడంగల్‌లో రోడ్ల విస్తరణ పనులు మొదలవుతున్నాయి. ముఖ్యమంత్రి రేవంత్ రెడ్డి ఇంటి నుంచే ఈ పనులకు శ్రీకారం చూడుతున్నారు. ఆ వివరాలు..

ఎన్నో ఏండ్లుగా విస్తరణకు నోచుకుని కొడంగల్ పట్టణ రోడ్లకు మహర్దశ పట్టనుంది. ఇక్కడ ప్రధాన రహదారి నిర్మాణ పనులు ఎట్టకేలకు ప్రారంభం అయ్యాయి. సీఎం చొరవతో ఇక్కడ రోడ్ల నిర్మాణం, అభివృద్ధి పనులు వేగం పుంజుకున్నాయి. ఈక్రమంలో ఆర్ అండ్ బీ, మున్సిపల్ అధికారులు బుధవారం కొడంగల్ వచ్చి.. రోడ్డు విస్తరణకు మార్కింగ్ చేశారు. ముఖ్యమంత్రి రేవంత్ రెడ్డి ఇంటి నుంచే రోడ్డు విస్తరణ పనులకు అధికారులు శ్రీకారం చుట్టారు.

రోడ్డు విస్తరణ పనుల్లో భాగంగా సీఎం రేవంత్ ఇంటి నుంచి 60 ఫీట్లతో రోడ్డును విస్తరించనున్నారు. రేవంత్ నివాసం నుంచి వినాయక చౌరస్తా మీదుగా.. వెంకటేశ్వర స్వామి ఆలయం వరకు రోడ్డును విస్తరించనున్నారు. 60 ఫీట్లతో రోడ్డు విస్తరణ పనులు చేయనున్నట్లు మున్పిపల్ కమిషనర్ బలరాం నాయక్ వెల్లడించారు. ఈ 60 ఫీట్ల రోడ్డుకు మధ్యలో డివైడర్‌తో పాటుగా సెంట్రల్ లైటింగ్‌ను కూడా ఏర్పాటు చేయనున్నారు.

కొడంగల్ పట్టణంలో రోడ్లు విస్తరించాలని ఈ ప్రాంత వాసులు ఎప్పటి నుంచో విన్నవించినా లాభం లేకుండా పోయింది. అయితే ఎట్టకేలకు సీఎం రేవంత్ రెడ్డి చొరవతో.. కొడంగల్ రోడ్డు విస్తరణకు ఆటంకాలు తొలగిపోవడం పట్ల స్థానికులు హర్షం వ్యక్తం చేస్తున్నారు. రహదారి విస్తరణ పనులు ప్రారంభం కావడంతో ఇన్నాళ్లు పడిన ఇబ్బందులు తొలగిపోతాయి అంటున్నారు. అయితే కొందరు జనాలు మాత్రం అధికారులు ఇచ్చిన మార్కింగ్ ప్రకారం విస్తరణ ఉంటుందా లేదా అని అనుమానం వ్యక్తం చేస్తున్నారు. మరోపక్క రోడ్డుకు ఇరువైపులా ఉన్న షాపులు, ఇండ్ల యజమానులు తమ నివాసాలు, షాపులను కొల్పోవాల్సి వస్తుందని ఆందోళన వ్యక్తం చేస్తున్నారు.

ఇదిలా ఉంటే దసరా పండుగ సందర్భంగా తెలంగాణ ముఖ్యమంత్రి రేవంత్ రెడ్డి ఈరోజు అనగా అక్టోబర్ 2 తన సొంత నియోజకవర్గం కొడంగల్‌ పర్యటనకు వెళ్తున్నారు. సొంత ఊరి ప్రజలు, కుటుంబ సభ్యులతో కలిసి తన స్వగ్రామం కొండా రెడ్డిపల్లిలో దసరా వేడుకల్లో పాల్గొనబోతున్నారు. అలానే దసరా పండుగ సందర్భంగా తెలంగాణ ప్రజలకు సీఎం రేవంత్ శుభాకాంక్షలు తెలిపారు.