హైదరాబాద్‌లోని బాపూ ఘాట్‌లో నివాళులు హాజరైన గవర్నర్ జిష్ణు దేవ్‌ వర్మ, ముఖ్యమంత్రి రేవంత్ రెడ్డి

జాతిపిత మహాత్మా గాంధీ జయంతి సందర్భంగా తెలంగాణ రాష్ట్రవ్యాప్తంగా ఘన నివాళులు అర్పించారు. హైదరాబాద్‌లోని లంగర్‌హౌజ్‌లో ఉన్న బాపూ ఘాట్‌ వద్ద గురువారం జరిగిన అధికారిక కార్యక్రమంలో రాష్ట్ర గవర్నర్ జిష్ణు దేవ్‌ వర్మ, ముఖ్యమంత్రి రేవంత్ రెడ్డి పాల్గొన్నారు. ఇరువురు నేతలు గాంధీ సమాధి వద్ద పుష్పగుచ్ఛాలు ఉంచి శ్రద్ధాంజలి ఘటించారు. అనంతరం గాంధీ విగ్రహంపై పూల రేకులు చల్లి తమ భక్తిని చాటుకున్నారు.ఈ కార్యక్రమంలో శాసనమండలి ఛైర్మన్ గుత్తా సుఖేందర్ రెడ్డి, శాసనసభ స్పీకర్ గడ్డం ప్రసాద్ కుమార్, టీపీసీసీ అధ్యక్షుడు మహేశ్ కుమార్ గౌడ్, ప్రభుత్వ ప్రధాన కార్యదర్శి రామకృష్ణారావు సహా పలువురు ఉన్నతాధికారులు, ప్రజాప్రతినిధులు పాల్గొన్నారు. అనంతరం అక్కడి ప్రార్థనా మందిరంలో నిర్వహించిన సర్వమత ప్రార్థనల్లో నేతలందరూ పాల్గొన్నారు.ఈ సందర్భంగా ముఖ్యమంత్రి రేవంత్ రెడ్డి ‘ఎక్స్’ వేదికగా గాంధీజీని స్మరించుకున్నారు. సత్యం, అహింస, సహనానికి గాంధీజీ ప్రతీక అని ఆయన కొనియాడారు. ఇదే రోజు జయంతి జరుపుకుంటున్న మాజీ ప్రధాని, భారతరత్న లాల్ బహదూర్ శాస్త్రికి కూడా ఆయన నివాళులర్పించారు. ‘జై జవాన్, జై కిసాన్’ నినాదంతో శాస్త్రి దేశాన్ని మేల్కొలిపారని సీఎం గుర్తుచేసుకున్నారు.బీఆర్ఎస్ వర్కింగ్ ప్రెసిడెంట్ కేటీఆర్ కూడా మహాత్ముడికి నివాళులర్పించారు. సత్యం, అహింసలే అత్యంత శక్తిమంతమైన ఆయుధాలని గాంధీజీ ప్రపంచానికి చాటిచెప్పారని కేటీఆర్ తన ‘ఎక్స్’ పోస్టులో పేర్కొన్నారు. ఆ మహనీయుడి ఆశయాలే తెలంగాణ ఉద్యమానికి స్ఫూర్తినిచ్చాయని, ఆయన చూపిన మార్గం దేశ ప్రగతికి ఎప్పటికీ వెలుగునిస్తుందని అన్నారు.