రేషన్ కార్డుదారులకు బ్యాడ్ న్యూస్.. ఈ నెల బంద్

తెలంగాణ రాష్ట్రంలో దశాబ్ద కాలం తర్వాత నూతన రేషన్ కార్డుల పంపిణీ జరిగింది. కొత్త కుటుంబాలకు కార్డులు మంజూరు కావడంతో పాటు, పాత కార్డులలో పేర్ల చేర్పులు, మార్పులు కూడా పూర్తయ్యాయి. ఈ కొత్త లబ్ధిదారులతో సహా పాత కార్డుదారులు కూడా ఇకపై ప్రభుత్వం సరఫరా చేసే సన్నబియ్యాన్ని స్వీకరిస్తున్నారు. ఈ నేపథ్యంలో, లబ్ధిదారులకు మల్టీపర్పస్ సంచుల్లో బియ్యం అందించేందుకు ప్రభుత్వం ఒక బృహత్తర కార్యక్రమానికి శ్రీకారం చుట్టింది.

రేషన్ సంచుల పంపిణీకి బ్రేక్..

తెలంగాణ ప్రభుత్వం ప్రవేశపెట్టిన ఈ కొత్త విధానంలో భాగంగా ప్రతి లబ్ధిదారునికి 6 కిలోల బియ్యం పట్టే విధంగా, ప్రత్యేకంగా డిజైన్ చేసిన సంచులను అక్టోబర్ నెల బియ్యంతో పాటు పంపిణీ చేయాలని నిర్ణయించారు. ఈ సంచులను ముఖ్యమంత్రి రేవంత్ రెడ్డి ప్రభుత్వం కేవలం బియ్యం కోసం మాత్రమే కాకుండా, ప్రజలు కూరగాయలు, సరుకులు లేదా ఇతర వస్తువుల రవాణాకు కూడా వాడుకునేలా మల్టీపర్పస్ రూపొందించింది.

ఈ సంచులు ప్లాస్టిక్ వాడకాన్ని తగ్గించేందుకు, పర్యావరణ హితంగా, ఎక్కువ కాలం మన్నికగా ఉండేలా ప్రత్యేక శ్రద్ధ తీసుకుని తయారు చేశారు. వీటిని ఇప్పటికే అన్ని జిల్లా కేంద్రాలకు చేర్చగా, సివిల్ సప్లై శాఖ అధికారులు మండలాల స్టాక్ పాయింట్లకు కూడా సరఫరా చేశారు.

ఎన్నికల కోడ్ ప్రభావం..

వాస్తవానికి.. అక్టోబర్ 1వ తేదీ నుంచే ఈ కొత్త సంచుల ద్వారా బియ్యం పంపిణీ చేయాల్సి ఉంది. కానీ.. అనూహ్యంగా రాష్ట్రంలో స్థానిక సంస్థల ఎన్నికల కోడ్ అమలులోకి రావడంతో ఈ కార్యక్రమానికి తాత్కాలికంగా విరామం లభించింది. ఈ సంచులపై మూడు రంగులు, ముఖ్యమంత్రి రేవంత్ రెడ్డి, మంత్రి ఉత్తమ్ కుమార్ రెడ్డి ఫోటోలతో పాటు, ప్రభుత్వ ఆరు గ్యారెంటీలకు సంబంధించిన లోగో కూడా ముద్రించారు. ఈ రాజకీయ గుర్తులు ముద్రించడం వలనే ఎన్నికల సంఘం ఈ రేషన్ బియ్యం సంచుల పంపిణీ ప్రక్రియను నిలిపివేసినట్లు తెలుస్తోంది.

ప్రభుత్వం ఈ వినూత్న కార్యక్రమం ప్రస్తుతానికి వాయిదా పడటంపై లబ్ధిదారులు నిరాశ వ్యక్తం చేస్తున్నారు. ఈ సంచులు ప్రజలకు ఎంతగానో ఉపయోగపడటంతో పాటు, పర్యావరణ పరిరక్షణకు కూడా దోహదపడతాయని అధికారులు ఆశాభావం వ్యక్తం చేశారు. ఎన్నికల కోడ్ ముగిసిన వెంటనే ఈ కార్యక్రమాన్ని తిరిగి ప్రారంభిస్తామని పౌర సరఫరాల విభాగం అధికారులు వెల్లడించారు.