తెలంగాణలో స్థానిక సంస్థల ఎన్నికలపై ట్విస్ట్

తెలంగాణ రాష్ట్రంలో స్థానిక సంస్థల ఎన్నికల నిర్వహణపై న్యాయపరమైన వివాదం కొనసాగుతోంది. ఈ ఎన్నికలకు సంబంధించి తెలంగాణ హైకోర్టు ఇచ్చిన తీర్పును సవాలు చేస్తూ.. ఓ వ్యక్తి సుప్రీంకోర్టులో అప్పీలు దాఖలు చేశారు. ఇది రాష్ట్రంలో రాబోయే ఎన్నికల ప్రక్రియపై ఉత్కంఠను పెంచింది.

సుప్రీంకోర్టులో స్థానిక ఎన్నికల పిటిషన్

తెలంగాణలో జరగనున్న ఎంపీటీసీ, జడ్పీటీసీ, గ్రామ పంచాయతీ ఎన్నికలకు సంబంధించిన అంశాలపై వంగ గోపాల్ రెడ్డి అనే వ్యక్తి సెప్టెంబర్ 29న సర్వోన్నత న్యాయస్థానంలో పిటిషన్ వేశారు. తెలంగాణ హైకోర్టు ఇటీవల ఇచ్చిన ఉత్తర్వులను ఈ పిటిషన్‌లో ఆయన సవాల్ చేశారు. ముఖ్యంగా రిజర్వేషన్లు మొత్తం 50 శాతం పరిమితిని దాటాయని, ఇది సర్వోన్నత న్యాయస్థానం గతంలో ఇచ్చిన తీర్పులకు విరుద్ధమని ఆయన పిటిషన్లో పేర్కొన్నట్లు తెలుస్తోంది. జస్టిస్ విక్రమ్‌నాథ్ నేతృత్వంలోని ధర్మాసనం అక్టోబర్ 6వ తేదీన ఈ పిటిషన్‌పై విచారణ చేపట్టనుంది.

ఈ న్యాయపరమైన సవాళ్లు ఎదురవుతున్నప్పటికీ.. తెలంగాణ రాష్ట్ర ఎన్నికల సంఘం ఇప్పటికే స్థానిక ఎన్నికలకు నగారా మోగించింది. ఎంపీటీసీ (మండల పరిషత్ ప్రాదేశిక నియోజకవర్గాలు), జడ్పీటీసీ (జిల్లా పరిషత్ ప్రాదేశిక నియోజకవర్గాలు), మరియు గ్రామ పంచాయతీ ఎన్నికలకు సంబంధించిన షెడ్యూల్‌ను అధికారులు ప్రకటించారు. రాష్ట్రవ్యాప్తంగా ఈ ఎన్నికలను మొత్తం ఐదు దశల్లో నిర్వహించనున్నారు. తొలి రెండు దశల్లో ఎంపీటీసీ, జడ్పీటీసీ ఎన్నికలు జరుగుతాయి. మిగిలిన మూడు దశల్లో గ్రామ పంచాయతీ ఎన్నికలను నిర్వహించడానికి ఎన్నికల కమిషన్ సిద్ధమైంది.

తెలంగాణలో ఇటీవల అధికారాన్ని చేపట్టిన కాంగ్రెస్ ప్రభుత్వం ఈ స్థానిక సంస్థల ఎన్నికలను అత్యంత ప్రతిష్టాత్మకంగా భావిస్తోంది. అసెంబ్లీ ఎన్నికల విజయం తర్వాత, గ్రామీణ స్థాయిలో తమ పట్టును నిరూపించుకోవడానికి ఈ ఎన్నికలు కాంగ్రెస్‌కు కీలకం. ముఖ్యంగా.. అధికార మార్పిడి తర్వాత సంక్షేమ పథకాల అమలును ప్రజలు ఎలా అంచనా వేస్తున్నారో తెలుసుకోవడానికి ఈ ఎన్నికలు ఒక పరీక్షగా మారనున్నాయి.

మరోవైపు.. అధికారంలో ఉన్నప్పుడు స్థానిక సంస్థలపై పూర్తి ఆధిపత్యం చెలాయించిన బీఆర్‌ఎస్ పార్టీ, ఈ ఎన్నికల్లో తిరిగి తమ బలం నిలబెట్టుకోవాలని ప్రయత్నిస్తోంది. బీజేపీ కూడా గ్రామీణ ప్రాంతాల్లో బలోపేతం కావడానికి ఈ ఎన్నికలను ఒక అవకాశంగా చూస్తోంది. ఈ నేపథ్యంలో.. సుప్రీంకోర్టు తీర్పు ఎన్నికల షెడ్యూల్‌పై ఎలాంటి ప్రభావం చూపుతుందనేది రాజకీయ వర్గాల్లో ఆసక్తికరంగా మారింది.