ఇందిరమ్మ ఇళ్లకు బిల్లు రాలేదా.. ఈ పని చేస్తే వెంటనే పరిష్కారం

తెలంగాణలో అధికారంలోకి వచ్చిన కాంగ్రెస్ సర్కార్ పేదల సొంతింటి కలను సాకారం చేయడం కోసం ఇందిరమ్మ ఇళ్ల పథకం ప్రారంభించింది. ఈ పథకం ద్వారా పేదలకు ఇంటి జాగాతో పాటుగా నిర్మాణం కోసం రూ.5లక్షల ఆర్థిక సాయం అందించనున్నారు. ఇప్పటికే ప్రతి నియోజకవర్గంలో 3,500 చొప్పున ఇళ్లను మంజూరు చేశారు. ప్రస్తుతం ఈ ఇళ్లు నిర్మాణ దశల్లో ఉన్నాయి. ఇదిలా ఉంటే రేవంత్ సర్కార్.. లబ్ధిదారుల మీద ఇంటి నిర్మాణ భారం తగ్గించడం కోసం అనేక చర్యలు తీసుకుంటుంది. తక్కువ ధరకే ఇసుకను సరఫరా చేయడం.. నిర్మాణ పనుల కోసం ఉపాధి హామీ పథకాన్ని అమలు చేయడం వంటి చర్యలు తీసుకుంటుంది. ఆ వివరాలు..

రాష్ట్ర ప్రభుత్వం నిరుపేదల సొంతింటి కలను నెరవేర్చాలనే సదుద్దేశంతో ఇందిరమ్మ ఇళ్ల నిర్మాణ పథకం ప్రవేశపెట్టింది. ఈక్రమంలో లబ్ధిదారుల ఎంపికతో పాటు బిల్లుల చెల్లింపు అంశంలో పారదర్శకంగా ఉండాలనే ఉద్దేశంతో.. అత్యాధునిక సాంకేతిక పరిజ్ఞానాన్ని అధికంగా వినియోగిస్తుంది. ఏఐని కూడా వినియోగించుకుంటుంది. ఇదిలా ఉంటే ఇందిరమ్మ ఇళ్ల నిర్మాణాలను పర్యవేక్షించే అధికారులు.. లంచం డిమాండ్‌ చేస్తున్నారనే ఆరోపణలు వెల్లువెత్తుతున్నాయి. ఈ క్రమంలో ప్రభుత్వం బిల్లుల చెల్లింపులో ఆలస్యాన్ని నివారించడమే కాక.. అక్రమాలకు అడ్డుకట్ట వేసేందుకు ఇప్పటికే టోల్ ఫ్రీ నంబర్‌ని అందుబాటులోకి తెచ్చింది. ఈ నంబర్‌కు కాల్ చేసి ఫిర్యాదు చేస్తే.. సమస్య వెంటనే పరిష్కారం అవుతుందని.. బిల్లులను విడుదల చేస్తారని తెలిపారు.

ఇందిరమ్మ ఇళ్ల పథకం బిల్లుల ఆలస్యం జరుగుతుండటంతో.. దీని గురించి తెలుసుకునేందుకు లబ్ధిదారులు.. ఆఫీసుల చుట్టూ తిరగాల్సి వస్తుంది. అలానే పలువురు సిబ్బంది లంచం డిమాండ్ చేస్తున్నారంటూ ఫిర్యాదులు వెల్లువెత్తాయి. దీంతో ప్రభుత్వం ఇందిరమ్మ ఇళ్ల లబ్ధిదారుల కోసం కాల్ సెంటర్, టోల్‌ఫ్రీ నంబర్‌ ప్రవేశపెట్టారు. దీంతో లబ్ధిదారులు ఈ నంబర్‌కు కాల్ చేసి సమస్యలు విన్నవిస్తున్నారు. లంచం డిమాండ్ చేసే అధికారుల మీద ఫిర్యాదు చేస్తున్నారు. అధికార యంత్రాంగం వీటి పరిష్కారం కోసం కృషి చేస్తోంది.

అలానే పొరుగు సేవల సిబ్బంది లంచం అడుగుతున్నారని.. ఇసుక బజార్లలో కూడా శాండ్ జారీ చేసే అంశంలో కూడా జాప్యం జరుగుతుందని తెలిపారు. ఇలాంటి సమస్యల గురించి ఫిర్యాదు చేయడం కోసం ప్రభుత్వం కాల్ సెంటర్ తోపాటు నంబర్ 18005995991 సంప్రదించి తమ సమస్యల గురించి ఫిర్యాదు చేయవచ్చు.