తెలంగాణలో దగ్గు సిరప్ నిషేధం: ప్రభుత్వ కీలక నిర్ణయం

దేశవ్యాప్తంగా చిన్నారుల మరణాలకు కారణమవుతున్న కోల్డ్ రిఫ్ దగ్గు సిరప్‌పై నిషేధం వరుసగా కొనసాగుతోంది. మధ్యప్రదేశ్‌లో ఈ సిరప్‌ వల్ల 11 మంది చిన్నారులు మృతి చెందారు. ఈ ఘటనలపై రాష్ట్ర ముఖ్యమంత్రి మోహన్ యాదవ్ తీవ్రంగా స్పందించి, రాష్ట్రవ్యాప్తంగా కోల్డ్ రిఫ్ సిరప్ అమ్మకాలు నిషేధించేందుకు ఆదేశాలు జారీ చేశారు.ఈ సంఘటన తర్వాత, రాజస్థాన్, తమిళనాడు, కేరళల్లో కూడా ముగ్గురు చిన్నారులు ప్రాణాలు కోల్పోవడంతో ఆయా రాష్ట్రాల్లోనూ సిరప్‌పై నిషేధం విధించబడింది.తాజాగా, తెలంగాణ ప్రభుత్వం కూడా ఈ సిరప్‌ను నిషేధిస్తూ కీలక ప్రకటన చేసింది. ప్రజలు ఈ సిరప్‌ను వినియోగించకూడదని హెచ్చరిస్తూ, రాష్ట్ర డ్రగ్స్ కంట్రోల్ అడ్మినిస్ట్రేషన్ (DCA) అధికారికంగా సూచించింది. ఈ నేపథ్యంలో ప్రజలకు అప్రమత్తంగా ఉండాలని సూచిస్తూ ఓ ప్రకటన విడుదల చేసింది.దేశ వ్యాప్తంగా చిన్నారుల మృతితో కేంద్ర ప్రభుత్వం కూడా అప్రమత్తమైంది. అనేక రాష్ట్రాలు కోల్డ్ రిఫ్ సిరప్‌ను తక్షణం నిలిపివేస్తున్నాయి. తెలంగాణ ప్రభుత్వం ఈ దిశగా స్పందించి, మార్కెట్ల నుంచి ఈ సిరప్‌ను ఉపసంహరించాలంటూ అధికారులకు ఆదేశాలు జారీ చేసింది.
*ప్రమాదకరమైన బ్యాచ్ వివరాలు:ఈ సిరప్‌ను తమిళనాడులోని కాంచీపురం జిల్లాలో ఉన్న శ్రీసాన్ ఫార్మా తయారు చేసింది. సమస్యాత్మకంగా గుర్తించబడిన బ్యాచ్ నెం: SR-13, తయారీ తేది మే 2025, గడువు తేది ఏప్రిల్ 2027. దీనిలో పారాసిటమాల్, ఫెనైల్‌ఎఫ్రిన్ హైడ్రోక్లోరైడ్, క్లోరోఫెన్నిరామిన్ మలియేట్ వంటి ఘాటైన కాంపౌండ్లు ఉన్నాయి.ఈ బ్యాచ్‌కు చెందిన సిరప్ ఎవరి వద్దనైనా ఉన్నా, వెంటనే వాడకూడదని, స్థానిక డ్రగ్ కంట్రోల్ అధికారులను సంప్రదించాలని తెలంగాణ DCA సూచిస్తోంది. అలాగే, ఈ ఉత్పత్తి సమాచారాన్ని టోల్ ఫ్రీ నంబర్: 1800-599-6969 (ఉదయం 10:30 నుంచి సాయంత్రం 5:00 వరకూ) కాల్ చేసి తెలియజేయవచ్చని పేర్కొంది.